فەرماندارەکی بەرێ یێ پەکەکێ ئاشکەرا کر، یەنەکە دژی بەحسکرنا پرۆسەیا خاپاندن و ب زۆرێ چەکدارکرنا زارۆکێن سلێمانیێ یە ژ ئالیێ پەکەکێ ڤە، ژ بەر کو ئەو ھەردو پارتی تاوانێن یەک ڤەدشێرن و ھەڤکاریا یەک دکن.
چەند رۆژ بەری نھا پشتی بەلاڤبوونا ھەڤپەیڤینەکا باس نیوسێ یا ل گەل فەرماندارەکی پەکەکێ کو راگەھاندبوو، پەکەکە ل سینۆرێ سلێمانی و گەرمیانێ ھێزا چەکدار ئاڤا دکە و دخوازن قەندیل و سلێمانیێ (ئەو ھەڤپەیڤین د رۆژنامەیا خەبات دە ژی ھات بەلاڤ کرن) چاپەمەنیا یەنەکێ و بەرپرسێن وێ پارتیێ نەرحەت بوون و کەتنە بەلاڤکرنا تۆمەت و بوختانێن جودا جودا ل دژی پەدەکێ.
دەربارێ ڤێ شەپرزەبوونا یەنەکێ دە فەرماندارێ بەرێ یێ پەکەکێ مەحموودێ رەش راگەھاند: “یەنەکە ل سینۆرێ خوە ھەڤکاریێ ل گەل پەکەکێ دکە، یەکەم؛ ئاڤاکرنا زێدەتری 18 رێخستنێن سەر ب پەکەکێ ل ناڤ باژارێ سلێمانیێ، کو بودجە و پارەیەکی زێدە ژ بۆ وێ تێ خەرجکرن و بنکەیێن وان ژی ھەنە. یا دویەم؛ رێدایینا ب ھەبوونا فەرمانداریا پەکەکێ ل ناڤ باژارێ سلێمانیێ کو بەشەک ژ وان ژ بۆ کۆمکرنا ھەڤکاریێن دارایی ل سلێمانیێ نە. درۆنێن ترکیێ بەری نھا 3 فەرماندارێن پایەبلندێن پەکەکێ ل ئەزمەر کرن ئارمانج و ھاتن کوشتن. چاوا ئەو ھەرسێ فەرماندار داکەتن ناڤ باژار؟ کی زانیاری دان ترکیێ؟ کی ئەزمەر نیشانی وان دا؟ سێیەم: ل سینۆرێ سلێمانیێ ھەلیکۆپتەرێن ھێزێن ھەڤپەیمان ژ ئالیێ یەنەکێ ڤە ژ بۆ رێڤەبەرێن پەکەکێ ھاتینە بکارئانین، ئەو بوو ل سینۆرێ دوھۆکێ ژ وان ھەلیکۆپتەران کەتن خوارێ. چارەم: ل سینۆرێ سلێمانیێ ب ھەڤکاریا فەرماندارێن یەنەکێ و ل سینۆرێ حەلەبجە ژی ب بەلگە ڤە چەند فەرماندارەکێن یەنەکێ ب ئۆتۆبووسان کەچ و زارۆکێن وی باژاری برنە بۆ قەندیلێ. یەک ژ وان کەسێن کو ھەڤکاریا وان کریە فەرماندارەکی ب ناڤێ س.گ یە کو فەرماندارەکی لەشکەری یێ یەنەکێ بوویە.”
مەحموودێ رەش گۆت: “ل سینۆرێ سلێمانیێ ل ناڤچەیا کفری و گەرمیان، شارباژێر و سینۆرێ سیامێوە ل پێنجوێن و ل دەڤەرا راپەرینێ چالاکیێن پەکەکێ یێن لەشکەری ھەنە، ھەتا یەک ژ فەرماندارێن هێزێن 70 یێن یەنەکێ ل سینۆرێ راپەرین ب دەستێ پەکەکێ ھات کوشتن و ھەتا نھا ژی یەنەکێ ھەلوێست نیشان نەدایە. دەرڤەیی وێ ژی د ھەیاما چار سالێن بۆری دە 48 رێڤەبەرێن مەزن یێن پەکەکێ ل سلێمانیێ ھاتنە کوشتن، ل گەل 90 ئەندامێن کادرۆیێن وێ پارتیێ ھەر ل سلێمانیێ ھاتن کوشتن، ل گەل وێ 4 بەرپرسێن ترکمەنان ژ ئالیێ پەکەکێ ڤە ل سلێمانیێ ھاتن تەرۆر کرن. یەنەکێ بخوە رێ دایە وی شەری ئێدی ژ بۆ چ نیگەران دبە؟ دەرڤەیی وێ پەکەکە ل سلێمانیێ مژوولێ دانووستان و بازرگانیا کرین و فرۆتنا ئۆتۆمۆبیلایە کو جیھێ وان ئاشکەرا نەبە. ئەڤ مەترسیا ھەری مەزنە ل سەر خەلکێ سلێمانیێ. بۆ نموونە کەسەکی ئۆتۆمۆبیل کریە، نەزانیە ھەتا چ دەمەکی فەرماندارێ پەکەکێ ئەو ئۆتۆمۆبیل ئاژۆتیە، پشترە ھاتیە دەستنییشان کرن و ژ ئالیێ ترکیێ ڤە بوویە ئارمانجا ئێریشێ، لێ پشترە ئاشکەرا بوویە کو ئەو خەلکێ سڤیلە.”
