پارلامەنتەرێ بەرێ یێ ھەدەپێ یێ ئامەدێ ئالتان تان یێ کو د دۆزا کۆبانیێ دە ھات بەرائەتکرن گۆت، “دەما کو 42 سالان سزا بۆ سەلاحەدین بەگ هاتیە دەرکرن، کەسێن کو ھەڤسەرۆکێن پارتیێ بوون د ناڤا ڤان 10 سالان دە شەڤەکێ ژی د گرتیگەھێ دە نەمان. د ناڤا ھەدەپێ دە ھندەک ھەڤالێن کو د ھەمان دەم دە ھەمان وەزیفە وەرگرتن، ھەمان تشت کرن، ھەمان تێکلیێن وان ھەبوون ھاتن بەرائەتکرن، ھندەک ھەڤال ب سزایێن کێم ھاتن بەردان، ھندەک ھەڤال ژی ب تایبەتی سەلاحەدین دەمیرتاش ژ 25 تا 40 سالان زێدەتر سزا وەرگرتن. ئالتان تان کو 50 سالن ل دژی توندی، تەرۆر و چەکانە، ژ بەر ئەندامەتیا رێخستنا پەکەکێ دھات دادگەهکرن. کەسێن کو ل سەر ناڤێ پەکەکێ وەکە قەیوومێن سیاسی تەڤدگەریان، ب ئاگاھیا دەولەتێ بۆ دەرڤە ھاتن رەڤاندن. سازییێن کوور یێن ل ئەنقەرەیێ چاوا رێ ب ڤان دان؟”
د دۆزا کۆبانیێ دە گەلەک سیاسەتمەدار ب تایبەتی سەلاحەدین دەمیرتاش ب دەھان سالان سزایێ گرتیگەھێ بۆ هات دەرکرن.
د دۆزێ دە ئالتان تان و ئایھان بیلگەن ژی د ناڤ دە ھندەک سیاسەتمەدارێن بەرێ یێن ھەدەپێ ھاتن بەردان.
تان دەربارێ بریارێن د دۆسیایێ دە و پێڤاژۆیا دۆزێ دە ژ بۆ سەربەستیەتێ ئاخڤی و گۆت، “ژ دەستپێکێ ڤە مە دگۆت ئەڤ دۆز نە دۆزەکا حقووقییە، بەلکو دۆزەکا سیاسییە. یا راستی پشتی دەمەکێ ڤەگوھەری دۆزا تۆلھلدانا سیاسی. نە پێکانە کو ئەم بریارێن د ڤێ مژارێ دە ھاتنە گرتن ب حقووقی بنرخینن. ھێڤیدارم ئەڤ خەلەتی د زووترین دەم دە ل دادگەھا ئیستینافێ و دادگەھا بلند بهێت پاشدەخستن و ھەموو ھەڤالێن مە بێن بەردان.”
تان د بەردەوامیا ھەڤپەیڤینێ دە وھا گۆت:
“پشتی کو ھەموو ھەڤال ھاتن بەردان، دڤێت رووبرووبوونەکا راست دەربارێ ڤێ دۆزێ چێببە. دڤێت بهێت زانین د کۆریدۆرێن تاری یێن سیاسەتا کوردی دە چ دقەومە؟ چ قەومیە؟ کی لگەل کێ پێشبرکیێ دکە؟ دڤێت ئەڤە ژی پر زەلال بێن ئەشکەرەکرن.
میناک کەسێن کو ھەڤسەرۆکێن پارتیێ بوون د ڤان دەھ سالێن داوی دە شەڤەکێ ژی د گرتیگەھێ دە نەمان. دەما کو سەلاحەدین بەگ 42 سالان سزا بۆ ھاتیە دەرکرن، گەلەک ھەڤالێن ھەڤسەرۆکێن پارتیێ و گەلەک ھەڤالێن کو خوەدی بەرپرسیاری بوون شەڤەکێ ژی د گرتیگەھێ دە نەمان. گەلەک کەسێن کو ناڤێن وان ژی د ڤێ دۆسیایێ دە جھ نەگرتبوون و گەلەک کەسێن دن ژی تەڤی کو ناڤێن وان د دۆسیایێ دە بوون ژ دۆزێ ھاتن دەرخستن.
دڤێت سیاسەتا کوردی ڤان تشتان ب ئارامی بنرخینە. بێی سڤکاتیکرن یان خەبەر گۆتن ب ھەڤدوو.
ئەز پر ئەشکەرە دبێژم. ئالتان تان کو ب سالان د ناڤا تێکۆشینا سڤیل و تێکۆشینا دەمۆکراتیک دە جھ گرت و 50 سالن ل دژی توندی، تەرۆر و چەکانە، ژ بەر ئەندامتیا رێخستنا پەکەکێ ھات دادگەهکرن. گەلەک جاران ھات بنچاڤکرن و پاسپۆرتا وی ھات دەستەسەرکرن. ب رێیا کۆنترۆلا عەدلی ھەفتیێ دو جاران ل قەرەقۆلا پۆلیسان ئیمزا کرن.
لێ ھندەک ھەڤالێن دن وەک کەسێن کو سەرۆکاتیا پارتیێ، ھەڤسەرۆکاتی و پارلەمەنتەری کرین و گھشتین مەقامێن ھەری بلند ھاتن دورخستن.
ئەز ناچم ناڤ ناڤان. بلا ئەڤ ترۆلێن پر ژیر لێ ھۆڤ ناڤان یەک ب یەک بنڤیسن. گەلەک کەس شەڤەکێ ژی د گرتیگەھێ دە نەمان.
فاکتۆرەکا دن ژی ئەوە کو گەلەک کەسێن کو ل سەر ناڤێ پەکەکێ وەزیفەدار بوون، ب ئاگاھیا دەولەتێ بۆ دەرڤە ھاتن رەڤاندن. دەستوور دان وان کو دەرکەڤن. ناڤێن وان ژی یەک ب یەک تێنە زانین.
کی ئیرۆ و ب چ ئاوایی رەڤیا دەرڤەیێ وەلات؟ چاوا ئەو خلاس بوو؟ سازیێن کوور یێن ل ئەنقەرەیێ چاوا رێ ب ڤان دان؟
