6 سازی و رێخستنێن یاسایی و مافێن مرۆڤان کریارێن تەڤگەرا جوانێن شۆرەشگەر یێن ل دژی ئەنەکەسێ شەرمەزار دکن و دیار دکن، ئەو ل دژی یاسایێن ناڤدەولەتی و بنپێکرنا ئازادیا دەربرینێ نە.
کۆمیتەیا کوردی ژ بۆ مافێن مرۆڤان ل سووریێ (راسد)، رێخستنا مافێن مرۆڤان ل سووریێ – ماف، رێخستنا بەرەڤانیا ل گرتیێن رایێ ل سووریێ (رەوانگەھ)، رێخستنا کوردی ژ بۆ مافێن مرۆڤان ل سووریێ (داد)، یەکیتیا گشتی یا نڤیسکار و رۆژنامەڤانێن کورد ل سووریێ (نڤێسینگەها یاسایی) راپۆرەک دەربارێ رەڤاندنا ئەندامێن ئەنەکەسێ و شەوتاندنا ئۆفیسێن ئەنەکەسێ و پارتیێن وێ ژ ئالیێ تەڤگەرا جوانێن شۆرەشگەر ڤە بەلاڤ کر.
وان رێخستنان ئاماژە ب وێ یەکێ کرن، د ھەیاما 2 مەھان دە، جوانێن شۆرەشگەر 8 ئەندامێن پارتیێن د ناڤا ئەنەکەسێ دە رەڤاندنە و 11 ئۆفیسێن وان شەوتاندنە.
ھەروھا دیار کرن، کریارێن ژ ئالیێ جوانێن شۆرەشگەر ڤە ھاتنە کرن، ل دژی ھەموو قانوون، پەیمان و بەلگەیێن خوەجھی، ھەرێمی و ناڤدەولەتی یێن تایبەت ب پاراستنا مافێن مرۆڤانە، ب تایبەتی بەندا 10 یا بەیاننامەیا جیھانی یا مافێن مرۆڤان یا کو ژ ھێلا نەتەوەیێن یەکگرتی ڤە د سالا 1948 دە ھاتیە وەشاندن و خالێن (1.14 و 5.17)یێن پەیمانا ناڤدەولەتی یا ل سەر مافێن مەدەنی و سیاسی کو ژ ھێلا نەتەوەیێن یەکگرتی ڤە د سالا 1966 دە ھاتیە دەرخستن.
ئەو ھەر 6 رێخستن دبێژن: “ئەم دبینن کو کریارێن رێخستنا جوانێن شۆرەشگەر کرنە، بنپێکرنا ئەشکەرە یا یاسایێن ناڤدەولەتی یێن گرێدایی مافێن مرۆڤان، ئازادیا رامان و دەربرینێ و بنپێکرنا ئەشکەرە یا یاسایێن ئاسمانی و ئەخلاقییە و دڤێت ئەو دەرکەڤن پێشبەری دادگەھێن ئاشکەرە کو رێخستنێن مافێن مرۆڤان و پارێزەرێن سەربخوە یێن مالباتێن گرتیان ژی تێ دە بەشدار ببن.
ھەروھا ئەو سازی و رێخستن بانگ ل سازیێن مافێن مرۆڤان یێن ھەرێمی و ناڤنەتەوەیی دکن کو ڤان تاوانێن ل پەی ھەڤ، بەردەوام و سیستەماتیک شەرمەزار بکن و پارتیا یەکیتیا دەمۆکراتیک (پەیەدە) ل ھەمبەر ڤان تاوانان بەرپرسیار ببینن.
