سازیەکا چاپەمەنیێ ئاشکەرا کر، ھێزەکا ئەولەھیا یەنەکێ ل خالا کۆنترۆلێ یا کۆیە رۆژنامەڤانەک گرت و ب ئۆتۆمۆبیلەکا لەشکەری ڤە ژی ژن و زارۆکێن وی ژ بۆ سلێمانیێ ڤەگوھەستن.
پێگەھەک ب ناڤێ سازیا مەدیایی یا تیوار کو دەمەکە ل تۆرا جڤاکی نووچەیان بەلاڤ دکە د ڤێ دەربارێ دە داخویانیەک بەلاڤ کر و راگەھاند: “شەڤا بۆری ھێزەکا ئەولەھیا یەنەکێ، بێژەر و رۆژنامەڤانێ سازیا مە شاکار ستار رەڤاندیە.”
ھەروھا راگەھاند، ل راوەستگەهێ ئانکو خالا کۆنترۆلێ یا کۆیە، بێژەر و رۆژنامەڤان شاکار ستار د دەما ڤەگەرا ژ سلێمانیێ بۆ ھەولێرێ و ل راوەستەکا ئاشتی یا کۆیە ژ ئالیێ ھێزەکا ئەولەھیا یەنەکێ ڤە ھاتیە گرتن.
ل گۆر ھەمان داخویانیێ ھاتیە راگەھاندن، گرتنا شاکار ستار ل گەل ھەڤژین و دو زارۆکێن وی پێکھاتیە و دەست دانینە سەر ئۆتۆمۆبیلا وی ژی و ژن و زارۆکێن وی ب ئۆتۆمۆبیلەکا لەشکەری ڤە ژ کۆیە بۆ سلێمانیێ برنە.
ل گۆر دەزگایێ مەدیا تیوار راگەھاندیە: “بوویەر دەمژمێر 10:45 شەڤا بۆری پێکھاتیە و ھێزێن ئەولەھیا ئاساییشا یەنەکێ شاکار ستار بۆ گرتیگەھەکا سلێمانیێ ڤەگوھەستنە و ھەتا نھا چ داخویانیەک دەربارێ سەدەمێ گرتنا وی دە نەدانە. شاکار ستار تەنێ رۆژنامەڤانە و کارێ پیشەیی یێ خوە وەک بێژەر کریە. ت رێخستنەکا پاراستنا مافێن رۆژنامەڤان و مەدیا و ئەو کەسێن ب ناڤێن چالاکڤانێن سلێمانیێ ل ھەمبەر ڤێ ھەلوێستەک نیشان نەدانە و بنپێکرنا ل ھەمبەر شاکار ستار و مالبات و زارۆکێن وی ھاتیە کرن بێدەنگی ھەلبژارتنە. لێ ژ ئالیێ دن ڤە ھەر بوویەر و رەوشەکا ل سینۆرێ ھەولێر و دوھۆکێ چێبە ب دەھان ھەلمەت و بەیانامەیێن نەرازیبوونێ ل سلێمانیێ دھاتن بەلاڤ کرن و رێکدخستن.”
د ڤێ دەربارێ دە سازیێن پەیوەندیا خوە ب مافێ مرۆڤان ڤە هەیی ل ھەمبەر ڤێ بنپێکرنا ئاشکەرایا ھێزێن ئەولەھیا یەنەکێ تێن ئاگاھدار کرن و بەرپرسیارتیا پاراستنا ژیانا رۆژنامەڤانێ ناڤبۆری ژی دخن ستوویێ وێ ھێزا ئەولەھیێ.
