سەرۆکوەزیر مەسروور بارزانی تەڤلی بەھیا ئیبراھیم رەیسی و ھەڤالێن وی بوو

سەرۆکێ حکوومەتا ھەرێما کوردستانێ ل کۆنسولخانەیا ئیرانێ ل ھەولێرێ تەڤلی بەھیا سەرۆککۆمارێ ئیرانێ و ھەڤالێن وی بوو.

سەرۆکێ حکوومەتا ھەرێما کوردستانێ مەسروور بارزانی پشتی نیڤرۆیا ئیرۆ (سێشەم، 21/5/2024) ل کۆنسولخانەیا ئیرانێ ل ھەولێرێ تەڤلی بەھیا سەرۆککۆمارێ ئیرانێ ئیبراھیم رەیسی، وەزیرێ دەرڤەیێ ئیرانێ حسێن ئەمیر عەبدولاھیان و ھەڤالێن وان بوو.

پێشتر سەرۆکوەزیرێ ھەرێما کوردستانێ ژ بەر وەغەرا داویێ یا سەرۆککۆمارێ ئیرانێ، وەزیرێ دەرڤەیێ ئیرانێ و ھەڤالێن وان د بەھینامەیەکێ دە سەرەخوەشی و ھەڤخەمیا خوە ئاراستەیی رێبەراتی و حکوومەت و خەلکێ کۆمارا ئیسلامی یا ئیرانێ کربوو.

مەسروور بارزانی ئاماژە ژی دابوو، “ئەم ژ خودایێ مەزن دخوازن کو جانێ خوەدێ ژێ رازیان بخە بەر دلۆڤانیا خوە و سەبر و ھەدارێ ژی بدە بنەمال و کەسووکارێن وان و خەلکێ ئیرانێ ب تەڤاھی. د ڤێ دەما دژوار دە، ئەم ھەڤخەمی و پشتەڤانیا خوە بۆ خەلکێ کۆمارا ئیسلامییا ئیرانێ تەکەز دکین.”

ھەلیکۆپتەرا سەرۆککۆمارێ ئیرانێ ئیبراھیم رەیسی و ھەڤالێن وی پێر (یەکشەمبێ، 19/5/2024) ژ بەر خرابیا کەش و ھەوایێ ل سنۆرێ پارێزگەھا تەورێزێ کەفت. پشتی 18 دەمژمێرێن لێگەریانێ، ئەو ھەلیکۆپتەر ھات دیتن کو پووچ بووبوو.

مەدیایا فەرمی یا ئیرانێ د وی واری دە راگەھاند، “تەڤایا سوارێن وێ ھەلیکۆپتەرێ کو نەھ کەس بوون مرنە.”

سوارێن وێ ھەلیکۆپتەرێ ژی ئەڤ بوون؛ سەرۆککۆمارێ ئیرانێ ئیبراھیم رەیسی، وەزیرێ دەرڤەیێ ئیرانێ حسێن ئەمیر عەبدولاھیان، پارێزگەرێ ئازەربایجانا رۆژھلات مالک رەحمەتی، نوونەرێ ئایەتوولاھ خامنەیی ئیمام جومعە و چەند بەرپرسێن دن.