دادگەها فەدەرالی بریارا دانا پێنج کورسیان ژ بۆ پێکهاته‌یان پەژراند
دادگەها بلندا فەدەرالی یا ئیراقێ بریارا دەستەیا دادوەریێ یا هلبژارتنێن ئیراقێ ژ بۆ دانا پێنج کورسیێن پەرلەمانا کوردستانێ ژ بۆ پێکهاته‌یان د چارچۆڤەیا 100 کورسیێن پەرلەمانێ دە پەژراند.
دەستەیا دادوەریێ یا هلبژارتنان، کو گرێدایی ئەنجوومەنا بلندا دادوەریێ یا ئیراقێ یە، د بەرسڤا هەژمارەکە سکالایان دە کو ژ ئالیێ پێکهاته‌یێن هەرێما کوردستانێ ڤە هاتنە پێشکێشکرن، بریار دا کو د چارچۆڤەیا 100 کورسیێن پەرلەمانا کوردستانێ دە، پێنج کورسی ژ بۆ پێکهاته‌یان بێن تەرخانکرن. یانی 95 کورسی دێ گشتی بن، پێنج کورسیێن دن ژی دێ گرێدایی پێکهاتان بن.
دادگەها بلندا فەدەرالی یا ئیراقێ ئیرۆ (سێشەم، 21.05.2024) بریارا دەستەیا دادوەریێ یا هلبژارتنێن ئیراقێ پەژراند. ل دووڤ تەکستا وێ بریارێ کو دوهی (دوشەم، 20.05.2024) دەرکەفتیە؛ پێنج کورسیێن پێکهاتان ب ڤی ئاوایی ل سەر پارێزگەهێن هەرێما کوردستانێ تێن پارڤەکرن:
هەولێر: دو کورسی (یەک ژ بۆ کرستیانان و یەک ژ بۆ ترکمەنان)
سلێمانی: دو کورسی (یەک ژ بۆ کرستیانان و یەک ژ بۆ ترکمەنان)
دهۆک: یەک کورسی ژ بۆ ئەرمەنان.
پێشتر دادگەها فەدەرالی یا ئیراقێ بریار دابوو کو هەژمارا کورسیێن پەرلەمانا کوردستانێ ژ بۆ 100 کورسیان کێم بکە، کۆمسیۆنا بلندا سەربخوە یا هلبژارتنان ژی ل دووڤ وێ بریارێ ئەو کورسی ب ڤی ئاوایی ل سەر پارێزگەهێن هەرێما کوردستانێ بەلاڤ کربوون: 34 کورسی ژ بۆ هەولێرێ، 38 کورسی ژ بۆ سلێمانیێ، 25 کورسی ژ دهۆکێ و سێ کورسی ژی ژ بۆ هەلەبجەیێ.
