مالپەرا سەرۆکاتیا ھەرێما کوردستانێ راگھاند، شاندەکا پلەبلند یا ھەرێما کوردستانێ دێ بەشداری مەراسیما بەھیا سەرۆککۆمارێ ئیرانێ یێ کۆچکری ببە.
ل گۆری داخویانیێ، شاندەکا پلەبلند یا ھەرێما کوردستانێ کو ژ سەرۆکێ ھەرێما کوردستانێ نێچیرڤان بارزانی، سەرۆکوەزیر مەسروور بارزانی، جیگرێ سەرۆکێ ھەرێمێ مستەفا سەیید قادر، جیگرێ سەرۆکوەزیر قوباد تالەبانی و وەزیرێ ناڤخوە رێبەر ئەحمەد پێک تێ، دێ بەشداری مەراسما سەرساخیا سەرۆککۆمارێ ئیرانێ یێ کۆچکری ئیبراھیم رەیسی و شاندا پێ رە، ببن، و سەردانا کۆمارا ئیسلامییا ئیرانێ بکن.
ھەلیکۆپتەرا سەرۆککۆمارێ ئیرانێ ئیبراھیم رەیسی و شاندا پێ رە رۆژا 19 گولانێ، دانێ ئێڤاری ل پارێزگەھا تەوریزێ کەتبوو خوارێ.
پشتی 18 دەمژمێران لێگەرینێ، ھەلیکۆپتەر شکیایی ھات دیتن و مەدیایا فەرمی یا ئیرانێ ژی راگھاند، ھەر 9 کەسێن د ھەلیکۆپتەرێ دە بوون، جانێ خوە ژدەست دانە، کو د ناڤا وان دە سەرۆککۆمارێ ئیرانێ ئیبراھیم رەیسی و وەزیرێ دەرڤە حوسێن ئەمیر عەبدوللاھیان ژی هەبوون.
