وەزارەتا چاندنی و چاڤکانیێن ئاڤێ یا حكوومه‌تا هەرێما کوردستانێ راگهاند، ژ بۆ هلبەرینا زەیتا زەیتوونان، 20 هەزار دارێن زەیتوونان ل دەردۆرا هەولێرێ تێن چاندن.
ل گۆری داخویانیەکە وەزارەتا چاندنی و چاڤکانیێن ئاڤێ، پرۆژەیا چاندنا دارێن زەیتوونان ل ناحیا کەسنه‌زانێ تێ جیبجیکرن و ژ ئالیێ دەزگەها رەوانگا ڤە و ب هەڤاهەنگیا رێخستنا ئالمانی گز ڤە تێ پشتگریکرن.
هەرێما کوردستانێ ئەڤ چەند سالن بوویە ناڤەندەکە گونجاو ژ بۆ بەرهەمانینا زەیتوون و زەیتا زەیتوونان، د ڤێ چارچۆڤەیێ دە ب سەدان جۆتکاران زەڤیێن خوە ب زەیتوونان چاندنە. زەیتوون ل 7 کارگەهێن هەرێما کوردستانێ تێن گوڤاشتن.
جۆتکار شاکر مهەمەد ژ ک24ێ رە راگهاند، «ئاخا کوردستانێ زێرە و پر گونجایی یە ژ بۆ چاندنا دارێن زەیتوونان. ژ بەر دەولەمەندیا ئاخا مە و هەبوونا هەژمارەکە مەزن یا دارێن زەیتوونان، پێویست ناکە ئەم سالانە زەیتێ زەیتوونان ژ دەرڤە بینن».
سلێمان شێخۆ کو خوەدیێ کارگەهەکە زەیتوونانە دبێژە: «ئەم دکارن زەیتێ زەیتوونێ ژ ناڤخوە و دەرڤە رە دابین بکن، ئەڤ یەک دێ سوودەکە باش بدە جۆتکاران. هێڤیدارم چاندنا دارێن زەیتوونان زێدە و گەش ببە، ژ بەر کو فێدەیا مادی یا زەیتوونان هەیە».
گرنگیدان ب کەرتێ چاندنیێ، پشتەڤانیا جۆتیاران و هناردەکرنا بەرهەمێن ناڤخوەیی، ژ کارنامەیا کابینەیا نەهەما حكوومه‌تا هەرێما کوردستانێ یە و حكوومه‌ت ب رژدی کار ژ بۆ وێ مەرەمێ دکە.
