تەڤگەرا :جوانێن شۆرەشگەر” کو راستە راست فەرمانا ژ قەندیلێ وەردگرە ل ھەرێما شەھبایێ یا ل باکورێ حەلەبێ زارۆکەکی 15 سالی دەما مەھەکێ یە رەڤاندیە و داییکا وی بانگا ڤەگەراندنا وی دکە.
رێخستنا مافێن مرۆڤان ل عەفرینێ بەلاڤ کر، تەڤگەرا جوانێن شۆرەشگەر ل ھەرێما شەھبایێ زارۆکێ 15 سالی یێ ب ناڤێ عەلی جەلال سەیدۆ ژ رۆژا 21 نیسانا بۆری ڤە رەڤاندیە و ل بارەگەھەکێ ھەسەدێ تەڤلی خولەکا راھێنانا چەکداری کریە.
دیار کر ژی، عەلی جەلال سیدۆ ژدایکبوویێ سالا 2009 یە و ژ گوندێ ھەیاتێ یێ عەفرینێ یە کو پشتی داگیرکرنا عەفرینێ ژ ئالیێ ئارتێشا ترکییێ و گرۆپێن چەکدار ڤە، لگەل مالباتا خوە کۆچی باژارێ حەلەبێ کربوو و پشتی ئەردھەژا 6 شباتێ ژی، مالباتا وی کۆچی ھەرێما شەھبایێ بوونە.
سەکینا سەیدۆ کو داییکا وی زارۆکییە، ب رێیا ڤیدیۆیەکێ بانگ ل فەرماندارێ گشتی یێ ھەسەدێ مەزلووم عەبدی و ھەڤسەرۆکا دەستەیا تێکلیێن دەرڤە یا رێڤەبەریا خوەسەر ئیلھام ئەحمەد کر کو کورێ وێ ڤەگەرینن ناڤا مالباتێ.
ھەروھا داییکا عەلی بانگ ل ھەموو رێخستنێن مرۆڤی، یاسایی و یێن مافێن زارۆکان کر کو کورێ وێ ڤەگەرینن مالێ.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکاران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن چەتەیێن ب ناڤێ “جوانێن شۆرەشگەر” شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھەسەدێ بکن تا کو چارەنڤیسا زارۆکێن وان دیار بکن.
