راگھاندنا پەکەکێ دوھ د مالپەرا خوە دە نووچەیەک بەلاڤ کر و لیستەیا ناڤێن کوردێن د ناڤ ھێزێن پاسەوانێن سینۆرێن ئیراقێ دە بەلاڤ کر. و ب ڤێ لیستەیا ناڤێن کو ب دەست خستبوو ھەول دا کو پرۆپاگاندایا خوە بکە و پەدەکێ تاوانبار بکە. پەکەکە ژ بۆ کو نووچەیا خوە راست نیشان بکە، ڤیدیۆیا 4 سال بەرێ یا هن پێشمەرگەیان کو ل ئاکادەمیا لەشکەری یا زاخۆیێ پەروەردە ددیت و د ناڤا کولانێن زاخۆیێ مژوولی مەشا لەشکەری بوون پارڤە کر، و راگهاند ئەو دیمەن بوونە جھێ گومانێ د ناڤ گەل دە. لێ بەلێ دەما ئەو وێنە ھاتن کشاندن کوردان 200 مەتران وێڤەتر دلسۆزی و بەختەوەرییا خوە نیشانی پێشمەرگێ کوردستانێ ددا.
پاسەوانێن سینۆرێ ئیراقێ ژ کێ پێکتێ؟
دەولەتا ئیراقێ د ناڤا ھێزێن خوە یێن لەشکەری دە ژ بۆ پاراستنا سینۆران خوەدی ھێزەکا لەشکەری یا جودایە و ئەڤ ھێزە ژی وەکە پاسەوانێن سینۆرێن ئیراقێ تێن پێناسەکرن. ھێزێن پاسەوانێن کوردستانێ ژی پێکھاتەیەکە کو ب ھەماھەنگی لگەل وەزارەتا پێشمەرگە تەڤدگەرە و تەڤ ژ کوردان پێک تێن.
حکوومەتا ھەرێما کوردستانێ ژ بۆ رێگرتنا ل پێشیا پەکەکێ و لەشکەرێن ترکیێ کو د ناڤا ھەماھەنگی و ھەڤگرتنی تەڤدگەرن، ژ بۆ پاراستنا خەلکێ سڤیل، داخواز کر کو ھێزێن پاسەوان سینۆری بەر ب دەڤەرێن ناکۆک ڤە بچن. پاسەوانێن سینۆری ب تایبەتی ل حەفتەنین، مەتینا و شێلادزێ ل گەلەک جھان ب جھ بوونە. ڤێ ھەولێ رەحەتیەکا مەزن دا گەل، لێ پلان و ئارمانجێن پەکەکێ ئاستەنگ کرن. ژ بەر ڤێ یەکێ ژی ئەڤە دو سالن پەکەکە ھەول ددە ھێزا پاسەوانێن سینۆری تەشهیر بکە.
پەکەکە لیستەیا ناڤێن پێشمەرگەیان ژ کێ وەرگرتنە؟
چاپەمەنیا پەکەکێ ب وەشاندنا لیستەیا ناڤان ئیدیعا دکە کو نووچەیێن تایبەت و گرینگ چێکرنە و ھەر چەند کەسێن کو ب مژارێ نزانن ب ڤان نووچەیان تێن سەردابرن ژی، لێ بەلێ راستی نە وسایە. ژ بەر کو پەیداکرنا وان لیستەیان ژ ئالیێ پەکەکێ ڤە تەنێ ئیسپاتا وێ پێوەندیا ڤەشارتی، قرێژ و دژە کوردە یا لگەل ئیراقێ هەیی. دەولەتا ئیراقێ ژ بەر کو پەکەکێ وەک جەحشێن خوە، واتە ئالیگرێ حکوومەتێ دبینە و ب کار تینە ئەڤ زانیاریە دانە پەکەکێ.
پەکەکە د چارچۆڤەیا ھەڤکاریا خوە یا لگەل پێکھاتەیێن دژە کورد، شیعەیێن د ناڤ دەولەتا ئیراقێ دە تەڤدگەرە، ئانکو پەکەکە چەکەکە کو ل دژی کوردان د دەستێ دەولەتا ئیراقێ و شیعەیێن شۆڤەنیست تێ بکار ئانین. ژ بۆ ڤێ ژی ئەڤ پێکھاتە نە تەنێ لیستەیا ناڤان ددن پەکەکێ، گەلەک زانیاری و ئامووران ژی ددن وان، وەک چەک، مووچە، دەستوورا بکارئانینا بالافرگەھان و ھتد کو ل دژی کوردان بکار بینن.
پەکەکێ ئەڤ ناڤە وەھا ب دەست خستنە. ھەروەھا ھێزێن پێشمەرگە و ھێزێن پاسەوانێن سینۆرێ ئیراقێ ژی ل سەر ئەرکا فەرمی نە. یەک ژ وان ناڤێن کۆد بکار ناینن، ئەو ھەمی مرۆڤێن ب ناڤ و نیشان، عەشیر، رێز و مالباتن. ب چ ئاوایی کەسەک پێدڤی نابینە کو خوە ڤەشێرە. پەکەکە ب ڤێ سەختەکاریێ دخوازە ھێزێن پێشمەرگە ل بەر چاڤێن خەلکێ وەک ھێزەکا نەقانوونی نیشان بدە.
پەکەکە ژ دژمنێن کورد و بارزانییان، ئالیکاریێ دستینە
ھەموو خەباتکارێن چاپەمەنیا پەکەکێ ژ کادرۆیێن ئایدۆلۆژیک و کەسێن د ناڤا سازیێن ئیستیخباراتا پەکەکێ دە کار دکن پێک تێن. ژ بۆ ڤێ ژی نووچەیێن کو پارڤە دکن، نووچەیێن قرێژ و سەختە یێن ل گۆری ئەجیندایا ڤەشارتی یا پەکەکێ تێن چێکرن.
میناک، ڤیدیۆیا پێشمەرگە کو د نووچەیێن دەربارێ ھێزێن پاسەوانێن سینۆری یێن ئیراقێ دە ھاتیە وەشاندن، چەند سال بەرێ ھاتیە کشاندن و مەشەکا لەشکەری ل دەردۆرا کامپێن وان یێن پەروەردە و راھێنانێ نیشان ددە. ھێزێن پێشمەرگە ژ ئالیێ یاسایی ڤە فەرمی نە. خوەدی مێژوویەکا دێرین و تەجرووبەکا بەرزە. ژ خەلکێ ھەرێمێ هاتیە پێکئینان. د شەرێ ل دژی داعشێ دە ب سەدان شەھید دان. نھا ژی ئامادەکاریا پاراستنا ئاخ و ئالا و نیشتیمانێ خوە ل ھەمبەر دژمنان دکە. ھەر چەند پەکەکە ل کێلەکا دژمنێن کوردستانێیە و ژ وان زێدەتر ئێرشی کوردستانێ و پێشمەرگەیان دکە، لێ ھەتا نھا ژی پێشمەرگە ھەلوەستا خوە یا بەرپرسیار و ئارام بەردەوام کریە.
لێ پەکەکە ھەر تم دخوازە لایەنگرێن خوە ب نووچەیێن دەرەو بخاپینە وزەمینەیا شەرەکی ل دژی پێشمەرگەیێن کوردستانێ ئاڤا بکە.
گەلێ کوردستانێ ژ نێز ڤە ئیراقپەرەستیا پەکەکێ دبینە و باش دزانە کو پەکەکە ھێزا ئیراقێ یە. پەکەکە ب ستراتەژییا خوە یا سییاسی یێکبوونا ئاخا ئیراقێ دپارێزە. د بن ناڤێ دیپلۆماسیێ دە، ل کو دەرێ دژمنەکی کورد و بارزانی ھەبە، ژ وان رجا دکە کو ئاریکاری بدن وان دا کو ل دژی بارزانییان شەری بکە.
