سەرۆک مەسعوود بارزانی د پەیامەکێ دە ب بۆنەیا 48 سالڤەگەرا شۆرەشا گولانێ راگھاند، ئەو دەستکەفتێن بدەست کەتنە بەرھەما خوینا شەھیدان، ئێش و خەبات و کەدا گەل، پێشمەرگە و خەباتکارێن شۆرەشا گولانێ و ھەموو شۆرەشێن گەلێ کوردستانێیە.
پەیاما سەرۆک مەسعوود بارزانی:
ب ناڤێ خوەدێیێ بەخشندە و میھریبان
شۆرەشا گولانێ قۆناغەکا گرینگا دیرۆکا گەلێ مە و ئەزموونەکا گرانبەھایا بەرخوەدان و رابوونا گەلێ کوردستانێیە. د رەوشا پشتی نسکۆ و کۆچبەریێ دە و د بن زەختێن جودایێن نەیاران دە، شۆرەشا گولانێ ب پلانەکا ھوور و باوەریەکا بلند ھاتە دەستپێکرن.
شۆرەشا گولانێ کو ھلگرێ نرخ و ئارمانجێن شۆرەشا مەزنا ئیلۆنێ بوو، پەیامەک زەلال دا ھەموو نەحەز و نەیارێن گەلێ کوردستانێ کو تەڤی ھێز و زۆرداریا دژمنان و ھەبوونا پلانگێریێن جودا ژی، گەلێ کوردستانێ خوە نەدا دەست و کورێن وی تێکۆشینا خوە دەرباسی قادا تێکۆشینێ یا راستی کو خاکا پیرۆزا کوردستانێیە، بکن.
د 48 سالڤەگەرا شۆرەشا گولانێ دە، سلاڤ ل گیانێ یەکەم شەھیدێ شۆرەشا گولانێ سەیید عەبدوللاھ حاجی عۆمەرانی و ھەموو شەھیدێن کورد و کوردستانێ دشینن و وان تێکۆشەر و قەھرەمانان ت جاری ژ بیر ناکن کو د خەباتا پێشمەرگایەتی و پارتیتی و خەباتا نێھێنییا ناڤ باژار و ل کۆچبەریێ دە، رۆلا وان ھەبوو و قوربانی دان و دیرۆک ژ گەلێ خوە دروست کرن.
ئەڤ دەستکەفتێن کو ب دەست کەتنە، بەرھەما خوینا شەھیدان، ئێش و کەدا گەل، پێشمەرگە و خەباتکارێن شۆرەشا گولانێ و ھەموو شۆرەشێن گەلێ کوردستانێ نە.
مەسعوود بارزانی
26 گولانا 2024
