بووبێ ئەسەر
کارێ ھەری زەحمەت ئەوە دەما مرۆڤ دەست پێ دکە. دانینا ئەساسەکی گەلەکی زەحمەتە کو دەما مرۆڤ بخوازو ئەو ساخلەم بە. ب وێ ساخلەمیێ ژی مرۆڤ بکاربە ئاڤاھیێن نوو ل سەر وی ئەساسی ئاڤا بکە. ئاھا رێباز ژی ل گۆر ڤێ ھاتیە دامەزراندن.
لەورا ژ بۆنا مە کوردان دانینا رێبازێ گەلەکی گرینگ و ب واتەیە. ژ بەر کو ئەساسێ رێبازا پیرۆز ژ عەبدولسەلامێ یەکەم دەستپێ دکە ھەتا رۆژا ئیرۆ ھەر بەردەوامە. وێ ژ ئیرۆ پێ دە ژی ھەر بەردەوام بە. ژ بەر کەسایەتیەکی ژ ھیمێن وێ یێن بنگەھین تەنێ رێزدار مەسعوود بارزانی ل ژیانێیە. ژ بەر ڤێیە کو نھا ئەرک و بەرپرسیاریەکا مەزن ل سەر ملێن وییە.
ھەبوون و ل ژیانێبوونا سەرۆکێ گەلێ کورد رێزدار مەسعوود بارزانی ب سەرێ خوە ژی شانسەک و خەزینەیەکە ژ بۆنا مە کوردان. ژ بەر کو ئەو ب خەبات و جھودێن خوەیێن ب سالان، تێ دکۆشە دا کو کوردان بکە خوەدی دەولەتەکا سەربخوە. ئانگۆ کار و خەباتێن وی ئەوە کو بارێ کەتیە سەر ملێن وی بگەهیە قۆناغا وێ. ئەڤ ژی زەحمەترین کارە کو سەرۆک مەسعوود بارزانی پێڤە رابوویە.
ئەم کورد ب شانسین کو ئیرۆ ئەم خوەدی کەسایەتیەکی ل گۆر دەستوور و بەرنامەیا رێبازێ ھاتیە پەروەردە کرنێ نە و ئەو زیندییە و د ناڤا مە دەیە. د ناڤا مە دەیە و تێدکۆشە کو کوردستانەکا سەربخوە راگھینە. ئەو شەخسیەت ئانگۆ رێزدار مەسعوود بارزانی ئیرۆ ب ھەبوونا خوە ژ بۆنا ھەمی کوردان قاوەت و ھێزە. ھەبوونا وی، ئیرۆ ل سەران سەرێ جیھانێ گارانتیا کورد و کوردستانێیە.
ژ بەر کو ئەو بەردەوامیا شێخ عەبدولسەلامێ یەکەمە کو ئەساسێ رێبازێ ژ لایێ وی ڤە ھاتبوو دانین. ئەو قۆتابیەکێ مستەفا بارزانیێ نەمرە. ئەو د دبستانا شێخ ئەحمەد و شێخ محەمەد دە قۆتابیەک بوو. ھەر وەھا جەنابێ سەرۆک مەسعوود بارزانی، ژ رۆژا بوویە پێشمەرگە و ھەتا نھا خوەستیە و دخوازە کو وەکە پێشمەرگەیەکی بژی. ژ بەر کو د ژیانا کوردان دە پێشمەرگایەتی قادا ھەری بلندیا ژیانێیە. ئەڤ مەرتەبەیەکا گەلەکی بلند، بەرز و ب روومەتە.
سەرۆک مەسعوود بارزانی د ھەمی ژیانا خوە یا تەکۆشەر دە، ل گۆر رێبازا پیرۆز کارێ خوە کرییە و دکە. ھەر وەھا چەند شۆرەش ل سەر دەستێ وی پێک ھاتنە. ژ بەر شۆرەشێن وی، جھد و خەباتێن وی، ھەلوەستگرتن و ب ئیستیقرارا بوونا وی، ملەتێ کورد وی وەکە سەرۆک و رێبەبرێ خوە دناسن. ب ڤێ یەکێ ژی وی ھەر ھەول دایە کو ژ خەت، بیر و باوەریا رێبازێ دەرنەکەڤە. وی ب ھەولێن خوە ئەڤ رێبازا پیرۆز پێشڤەبریە. مۆدەرن کرییە. جەنابێ وی ئەڤ رێبازا پیرۆز ل گۆر دەم و سەردەمی نووژەن کرییە و پێشکێشی ملەتێ خوە، زارۆک و نەڤیێن خوە کرییە.
ھەگەر ئەم ب کورتاسی ل دیرۆکا رێزدار سەرۆک مەسعوود بارزانی بنێرن، ئەم دێ بینین کو کێم سەرۆک و سەرۆکاتی وەکە وی ل ڤێ جیھانێ پەیدا بوونە. ئەو ب ھەبوون، باوەری و نەرینێن خوەیێن نەتەوەیی، بوویە سەرۆک و رێبەرێ گەلێ خوە. بوویە سەمبۆل و نیشانا ھەبوونا گەلێ خوە. ب گۆتن و ھەلوەستێن خوە، ب نەچەماندنا خوە، بوویە ناڤدارەکی جیھانی. ژ بەر کو پرانیا مەزنێن جیھانێ ئیرۆ وی گوھداری دکن و نەرینێن وی یێن ژ بۆنا کوردستانەکا سەربخوە ل بەر چاڤ دگرن.
سەرۆک بارزانیی ژ رۆژا بوویە پێشمەرگە و ھەتا نھا د ناڤا تەکۆشینا ئازادیا گەلێ خوە دە وەکە پێشمەرگەیەکی کار و خەبات کرییە. ب ھەلوەست و نەرینێن خوە، ب باوەری و خوە راگریا خوە، ب سەبر و تەحەمولا خوە، تم ژ بۆنا ئازادیا گەلێ خوە، بێ کو تاویزەکێ بدە داگیرکەر و دژمنێ کوردان، کار و خەبات کرییە و دکە.
د ناڤا کار و خەباتێن خوە دە، جەنابێ وی قەت رۆژەکێ خوە نەچەماندیە. ھەر سەری وی بلند و ژ بۆنا بەرژەوەندیا گەلێ خوە چ پێویست بوویە ئەو کرییە. ئەو خوەدی سۆز و بریارێن خوەیە. گۆتنا وی و ھەلوەستا وی نەتەوەیییە. لۆما ژی ئەو نھا وەکە سەرۆکێ گەلێ کورد تێ بناڤکرن. جەنابێ وی ب ڤان ھەلوەستێن خوەیێن نەتەوەیی جھێ خوە د دلێ ھەر کوردپەروەرەکی دە ڤەکرییە.
وەکە من د سەری دە ژی دەستنیشان کر کو دانینا ئەساسان زەحمەتە. ھەگەر ئەساس نە ساخلەم بە، مرۆڤێ نکاریت چ ئاڤاهیان ل سەر وی ئەساسی ئاڤا بکە. لێ ئەم دبینن کو ئەساسێ ڤێ رێبازا پیرۆز ب ساخلەمی ھاتیە دانین و ئاڤاھیێن نوو ل سەر وی ئاساسێ تێنە لێکرن.
سەرۆک مەسعوود بارزانی ژی ژ رۆژا بوویە پێشمەرگە و ھەتا نھا، د ناڤا کار و خەباتێن ژ بۆنا ئازادی و سەرخوەبوونا ملەتێ خوە دە، ھم بوویە سەرۆک، رێڤەبر و ھم ژی ب دیتن و دیپلۆماسیا خوەیا ناڤنەتەوەیی بوویە شەخسیەتەکی مەزنێ جیھانی. گۆتنا وی گۆتنە. زوو ب زوو بریاران نادە و ناستینە. جەنابێ وی سیاسەتا رۆژانە نامەشینە. دووربین و خوەدی گرانیەکە ناڤنەتەوەیییە.
جەنابێ سەرۆک مەسعوود بارزانی د هەموو ژیانا خوە دە ژ بۆنا پێکڤەژیانەکا باش، دەمۆکراسیەکا رند و ل ئەساسێ وەکھەڤی ژ بۆنا ھەمی کەسێن ل سەر ئەردا کوردستانێ دژین و ژیانێ دکن، دخوازە. لۆما ئیرۆ ل کوردستانێ باوەریێن ئۆلی، کێمنەتەوەیان د ناڤا کوردان دە ل گۆر خالا رێبازێ یا پێکڤەژیانێ بێ سەرێشی و ئاستەنگی ل گەل ھەڤ دژین. د ڤردە رۆلا سەرۆک مەسعوود بارزانی گەلەکە.
جەنابێ وی دەما پێشمەرگە بوو، چاوا ل پێش پێشمەرگەیێن خوە دە د ناڤا ھەمی چالاکی و خەباتێ دە بوو. ئیرۆ ژی ب وێ ھەلوەستا خوەیا کوردستانی، د قادا سیاسەتا ناڤنەتەوەیی دە ژ بۆنا بەرژەوەندیێن کورد و کوردستانێ دیسا ل پێشە.
ئیرۆ ھەمی بارێ گران یێ ژ بۆنا کوردستانەکا سەربخوە، ل سەر ملێن وییە. جەنابێ وی، ب ڤی تەمەنێ خوەیێ مەزن، ب تەجروبەیێن خوەیێن ب سالان، وەکە سەرۆکەکی گەلێ خوە، ب نەرین و دیتنێن خوەیێن نەتەوەیی د ناڤا ھەولدانا دامەزراندنا کوردستانەکا سەربخوە دە یە. لۆما دڤێت کورد جەنابی وی ب تەنێ نەھێلن.
مرۆڤ دکارە گەلەک تشتان د دەربارێ رێزدار سەرۆک مەسعوود بارزانی دە بێژە و بنڤیسینە. لێ دیسا ژی مرۆڤ دێ نکاربە وان کار و خەباتێن وی هەموویان د رووپەلێن پرتووکان دە ب جھ بکە. ژ بەر ڤێیە دڤێت ھەموو کوردێن جیھانێ خوەدیتیێ ل وی بکن. جەنابی وی وەکە سەرۆکەکی کوردستانی دەستنیشان بکن. پێویستە ھەموو رێخستن، کۆمەلە و پارتیێن کوردان وی وەکە سەرۆکەکی کورد و نەتەوەیی قەبوول بکن.
دڤێت رەوشەنبیر و نڤیسکارێن کورد، ئاکەدەمسیانێن کورد، شانۆگەر و سینەماگەرێن کورد ب یەک دەنگی و یەک ھەلوەستێ ژ بۆنا گرتنا خەلاتا نۆبەلێ یا ئاشتیێ ب ھەڤرە کار بکن. دڤێت ئەڤ ببە داخوازا ھەمی کوردان کو ب ھەلوەستێن خوە، ب نەرین و دیتنێن خوە کار و خەباتێ بکن دا کو سەرۆک مەسعوود بارزانی خەلاتا نۆبەلێ یا ئاشتیێ بگرە.
کوردنۆ ژ بیر نەکن کو ھوون خوەدی شانسەک مەزن و بێ ھەمپانە کو سەرۆکەکی وە، رێبەر و بەرپرسیارەکی وە کو ستوینەکە ژ ڤێ رێبازا پیرۆز رێزدار مەسعوود بارزانی ھەیە. ڤێ شانسا خوە ب کار بینن دا کو جەنابێ وی ژی ژ بۆنا مە کوردستانەکا سەربخوە راگھینە.
