مەزنترین گۆرا قوربانیێن دەستێ داعشێ ل نه‌ینه‌وایێ تێ ڤەکرن
پشتی 10 سالێن بەندەمانێ، گۆرا ب کۆما عەلۆ عەنتەر ل سنۆرێ باژارکێ تەلەعفەرێ ل دەشتا نه‌ینه‌وایێ تێ ڤەکرن و چاڤێ وەلاتیێن ئێزدی ل وێ گۆرێ یە ژ بۆ کو ب روفاتێن پرانیا قوربانیێن خوە شا ببن. شێورمەندەکی سەرۆکوەزیرێ ئیراقێ ژی داخوازا پشکنینا DNA ژ کەسوکارێن قوربانیان دکە ژ بۆ کو ئەو روفات بێن ناسکرن.
مەزنترین گۆرا ب کۆما قوربانیێن دەستێ چەکدارێن داعشێ ل نێزی باژارکێ ته‌له‌عفه‌رێ تێ ڤەکرن. هەژمارەکە زێدە یا وەلاتیێن ئێزدی، کو هەتا نها چارەنڤیسا هەژمارەکە زێدە یا ئەندامێن مالباتێن وان دیار نینە، ب کنجێن رەش و گری ڤە ل دۆر چالا عەلۆ عەنتەر کۆم بوونە کو تێ تەخمینکرن گەلەک وەلاتیێن ئێزدی د وێ چالێ دە هاتبن بنئاخکرن.
چالا عەلۆ عەنتەر یەک ژ وان مەزنترین گۆرێن ب کۆمە یێن کو تاوانێن داعشێ دسەلمینن. د وێ دەمێ دە داعشێ کو پارێزگەها نه‌ینه‌وایێ کۆنترۆل کربوو، زێدەترین تاوانێن گولەبارانکرنا وەلاتیان د وێ چالێ دە هاتنە کرن. کەسوکارێن قوربانیێن دەستێ داعشێ ژی دخوازن ب زووترین دەم ئەو گۆر بێ ڤەکرن و پشکنینێن ناسکرنێ ژ روفاتێن قوربانیان رە بێن کرن.
پشتی دەربازبوونا 10 سالان ل سەر تاوانا ژەنۆسیدکرنا وەلاتیێن ئێزدی ل سەر دەستێ چەکدارێن رێکخستنا داعشێ، ژ نوو حکوومەتا ئیراقێ و رێکخستنان دەست ب ڤەکرنا وێ گۆرا بکۆم کریە و ژ بەر زێدەهیا هەژمارا هەستیێن قوربانیان نزانن هەژمارا روفاتان چەندە.
شێورمەندێ سەرۆکوەزیرێ ئیراقێ زێدان خەلەف د ڤی واری دە گۆت، «هەتا نها هەژمارا قوربانیان نەهاتیە دیارکرن لێ پێشتر ژ ئالیێ مەدیایان ڤە هاتبوو بەلاڤکرن کو ب سەدان روفات د وێ گۆرا ب کۆم دە هەنە. د ناڤ وان دە ژی ژن، زارۆک، جوان و دانعەمر هەنە کو چەکدارێن داعشێ ئەو گولەباران کرنە و ئاڤێتنە ناڤ وێ چالێ، لەوما ژی ئەم داخوازێ ژ کەسوکارێن قوربانیان دکن کو پشکنینا DNA بکن ژ بۆ کو ئەو روفات بێن ناسکرن».
ژ پشتی ئازادکرنا باژارێ مووسلێ و دەشتا نه‌ینه‌وایێ ژ دەستێ چەکدارێن داعشێ هەتا نها، 61 گۆرێن ب کۆمێن قوربانیێن دەستێ داعشێ هاتنە ڤەکرن و نێزی 240 روفاتێن قوربانیان ب کەسوکارێن وان هاتنە دان، لێ هێشتا چ ژ چارەنڤیسا هەژمارەکە زێدە یا رەڤاندیێن ئێزدی نەهاتیە زانین و تێ تەخمینکرن کو پرانیا وەلاتیێن ئێزدی یێن وندا د وێ گۆرا بکۆم دە بن.
چالا عەلۆ عەنتەر دکەڤە باکورێ رۆژئاڤایێ باژارکێ تەلەعفەرێ، کووراتیا وێ 15 مەترە. ب گۆتنا شاهدان، ئەو یەک ژ مەزنترین گۆرێن ب کۆمێن قوربانیێن دەستێ داعشێ یە و تێ تەخمینکرن کو نێزی دو هەزار کەسان تێ دە هاتبن بنئاخکرن کو پرانیا وان وەلاتیێن ئێزدی، پارەک شیعەیێن تەلەعفەرێ و هەژمارەک ژی سونەیێن باژارێ مووسلێ بن.
تەڤی دژواریا ڤەکرنا وێ گۆرێ ژ بەر بارانێن دەهـ سالێن بۆری، بریارە د دەما چار مەهان دە ئەو پرۆسە بێ بداویئانین.
