شه‌نگال.. ل سه‌ر ره‌ڤاندنا 5 كه‌چێن وان هۆزه‌كا عه‌ره‌ب كارێ شه‌ر ل دژی په‌كه‌كێ دكه
ل سه‌ر ره‌ڤاندنا 5 كه‌چێن ته‌مه‌ن بچووك یێن ژ هۆزه‌كه عه‌ره‌ب ژ گوندێ «ئوم زیبان» ل سینۆرێ شه‌نگالێ، ئالۆزی ده‌ركه‌تیه و جوانێن وێ هۆزێ چه‌ك هه‌لگرتنه و كارێ شه‌ری ل دژی په‌كه‌كێ كرنه.
چاڤكانێن داركا مازی ئاشكه‌ره كرن، دوهـ رۆژا چارشه‌می 29\5\2024ێ 5 كه‌چێن ته‌مه‌نا وان د ناڤبه‌را 13 بۆ 15 سالیێ ده كو ژهۆزه‌كا عه‌ره‌ب یا نیشته‌جیها كۆمه‌لگه‌ها «ئوم زیبان» یا ل سینۆرێ شه‌نگالێ وه‌ندابوونه، پاش كو ته‌عقیبا وان هاتیه كرن ده‌ركه‌ت هۆلێ كو ژ هێلا سازیێن سڤیل یێن په‌كه‌كێ ڤه هاتنه خاپاندن و پشتره ره‌ڤاندنه.
چاڤكانیێن مه ئاشكه‌ره كرن، ئه‌و 5 كه‌چێن بچووك ژ هۆزه‌كه عه‌ره‌بن، ژ كۆمه‌لگه‌ها «ئوم زیبان» یا گرێدای ناڤچه‌یا قه‌حتانیێ یا نێزی شه‌نگالێ نه، رێخستنا په‌كه‌كێ ئه‌و ب ناڤێ ئه‌نجومه‌نێن ساخته یێن ژنان خاپاندنه و پشتره بۆ جیهه‌كێ نه‌دیار برنه.
ناڤێ كه‌چێن ره‌ڤاندی ئه‌ڤن:
زه‌حیه موتله‌گ سالح ئه‌حمه‌د دلێمی – ژ دایكبوون 2010 – ناڤێ دایكێ: زه‌هره حمێدی.
دوعا عه‌واد محه‌مه‌د دلێمی – ژ دایكبوون 2014 – ناڤێ دایكێ: جه‌واهر جاسم حموود.
شاهه سه‌میر حمێدی سالح دلێمی ژ دایكبوون 2009 – ناڤێ دایكێ: حه‌یات محه‌مه‌د حموود.
ره‌هه‌ف ناسرجاسم حموود دلێمی – ژ دایكبوون 2013- ناڤێ دایكێ: مه‌شاعل محه‌مه‌د حموود.
ریوده میه‌سر جاسم حموود دلێمی – ژ دایكبوون 2013 – ناڤێ دایكێ: منیب سه‌بیعی محه‌مه‌د.
چاڤكانیێن داركا مازی هه‌ر وها ده‌ستنیشان كرن، وێ هۆزا عه‌ره‌ب كارێ شه‌ر ل دژی په‌كه‌كێ كریه و و باره‌گه‌هێن په‌كه‌كێ یێن ل كۆمه‌لگه‌ها «ئوم زیبان» كۆنترۆل كرنه و ره‌وش ل ور پر ئالۆز بوویه، ئارتێشا ئیراقێ و ملیسێن حه‌شدا شه‌عبی و په‌كه‌كێ ژی ل خانه‌سۆرێ كه‌تنه د ره‌وشا ئاماده‌باشیێ ده.
چاڤكانیێن مه ئاشكه‌ره كرن، باڤێ یێك ژ وان كه‌چان ل گه‌ل رێخستنێن په‌كه‌كێ ته‌ڤ دگه‌ره و ئه‌و كه‌چ ب رییا وی هاتنه خاپاندن و ره‌ڤاندن.
ل گۆری ئاگاهیێن ده‌ستێ مه، نها دانوستاندن ل نێڤبه‌را هۆزا عه‌ره‌ب و فه‌رماندارییا حه‌شدا شه‌عبی تێ كرن ژ بۆ كو چاره‌نووسا وان كه‌چان بێ ئاشكه‌ره كرن و ژ بۆی مالێن وان وه‌رن ڤه‌گه‌راندن و ژ بۆی ڤێ ژی وێ هۆزێ مۆله‌ت دایه په‌كه‌كێ كو د زوو ده كه‌چێن ره‌ڤاندی ڤه‌گه‌رینن.
چاڤكانیێن داركا مازی ده‌ربارێ ره‌وشا هه‌ری داوی یا مژارا ره‌ڤاندنا 5 كه‌چێن عه‌ره‌ب ده‌ستنیشان كرن كو هێژان ئالۆزی د گوندێ «ئوم زیبان» ده هه‌یه و په‌كه‌كه ئیدیعا دكه كو هایا وێ ژ ره‌ڤاندنا وان 5 كه‌چان نینه و شێنیێن گوند ل جه‌م ئارتێشا ئیراقێ سكالا ل په‌كه‌كێ كری یه.
د ڤێ ده‌ربارێ ده پارلمه‌نته‌رێ ئیراقێ عه‌بدولره‌حیم شه‌مه‌ری گۆت كو رێخستنا په‌كه‌كێ ب ناڤێ ئه‌نجومه‌نێن ژنان كه‌چان دخاپینن و پشتره وان كه‌چان ل به‌رانبه‌ری كوژمێ 100 هه‌یا 200 دۆلاران ئه‌ركدار دكن.
هه‌ر ده‌ربارێ ره‌ڤاندن و كه‌چ و زارۆكێن كورد و نه‌ته‌وێن دن ژ هێلا ملیس و چه‌ته‌یێن په‌كه‌كێ ڤه، شێنیێن گوندێ «بئر جاری» ژی ئێریشی باره‌گه‌ها ئه‌نجوومه‌نا كاروبارێن عه‌شیران یا سه‌ر ب په‌كه‌كێ ڤه كرن و خوه‌ستن باره‌گه‌هێ بشه‌وتینن، ژ به‌ر كو كه‌چا ب ناڤێ «نه‌جود وسمی محه‌مه‌د ئه‌ل شه‌رابی» كو ژ دایكبوویا سالا 2010ێ یه، ژ هێلا چه‌ته‌یێن په‌كه‌كێ ڤه هاتبوو رازی كرن كو ته‌ڤلی رێزێ یه‌به‌شێ ل چیایێ شه‌نگالێ ببه، لێبه‌لێ ریهسپیێن گوندێ ناڤبووری پێشی ل شێنیێن گوند گرت و نه‌هشتن كو باره‌گه‌ها په‌كه‌كێ بشه‌وتینن ژ بۆ كو ئالۆزی ده‌رنه‌كه‌ڤه.
