شاندەیەکا پارتییا وەلاتپارێزێن کوردستانێ (PWK) کو ژ رێڤەبرێن ڤێ پارتیێ پێک ھاتبوو، ئیرۆ 30/5/2024 ل دیاربەکرێ ژ بۆ پشتگرییێ سەرەدانا پینە کافەیێ کرن.
ل گۆری داخویانیەکا نڤێسینگەها راگەھاندنێ یا پارتییا وەلاتپارێزێن کوردستانێ، دەستەیا پارتییا وەلاتپارێزێن کوردستانێ گرتنا خوەدییێ پینە کافەیێ رەمەزان شیمشەک پرۆتەستۆ کرن و گۆتن “ئەم ل گەل پینە کافەیێ، ل گەل رێزدار رەمەزان شیمشەکن. دڤێت رەمازان شیمشەک دەملدەست بێ بەردان. پینە کافە ل زمانێ کوردی خوەدی دەردکەڤە، دڤێت ئەم ژی ل پینە کافەیێ خوەدی دەرکەڤن”.
پۆلیسێن ترکیەیێ دوھی دانێ سبەھێ 29 گولانێ ل دیاربەکرێ ب سەر کافیتەریایەکێ دە گرت و خوەدیێ وێ رەمەزان شیمشەک دەستەسەر کر، ل گۆری کەس و کارێن شیمشەک ژی، ئەو ژ بەر خزمەتا کو ب زمانێ کوردی پێشکێش دکر، ھاتیە بنچاڤکرن.
