بەرھەمێن کاریکاتۆریست دژاوار ئیبراھیم ب زەختێن پارتیا کارکەرێن کوردستانێ (پەکەکێ) ل سلێمانیێ د پێشانگەھەکێ دە ھاتن ئاستەنگکرن و ھونەرمەندی سەدەما ڤێ یەکێ ئەشکەرە کر.
رۆژا دوشەمی 24/5/2024، پێنجەمین جڤینا ناڤدەولەتی یا کاریکاتۆرێن کوردی ل سلێمانیێ ب ئارمانجا نیشاندانا وێنەیێن بەرھەمێن ھونەرمەندان یێن ل سەر نڤیسکارێ مەزن یاشار کەمال ھات لدارخستن.
کاریکاتۆریستێ ژ رۆژئاڤایێ کوردستانێ دژوار ئبراھیم ژ بۆی ئاژانسا باس نیوزێ گۆت: “ئەز وەک باشترین کاریکاتۆریستێ سالا 2023 ل ئیراقێ ھاتم ھلبژارتن و ئەز نە کەسەکم کو نوو دەست ب کار کریە، رێڤەبرێن پێشانگەهێ ژ من خواست بەرهەمەکی خوە ژ بۆی وان بشینم، من ژ وان رە کارەکی ھونەری ل سەر یاشار کەمال شاند و وان گۆت کو ئەو گهشتیە دەست مە، لێ دەما پێشانگەھ ڤەبووی، تەنێ کارێ من نەھات پێشاندان.”
گۆت ژی: چەند رۆژ بەرێ پەیوەندی ب رێکخەرێن پێشانگەھێ رە کرییە، لێ وان بەرسڤ نەدانە و گۆت: “ئەز نزانم چما تو بەرسڤێ نادی، تەڤی کو تو پەیامێن من دبینی.”
ھونەرمەندێ کورد د بەردەوامیا ئاخافتنا خوە دە گۆت: “من چ گۆمان نینە کو ئەڤ یەک د بن فشارا پارتیا کارکەرێن کوردستانێ (پەکەکێ) و ھێزێن نێزیکی پەکەکێ یێن ل رۆژئاڤایێ کوردستانێ دە ھاتیە کرن، ب تایبەتی دەما کو کەسەکی ژ رۆژئاڤایێ کوردستانێ ئانینە پێشانگەھێ و پەکەکێ ژ وان رە گۆتیە کو ئەو کاریکاتۆریستە، لەورا ناڤێ من راکرن.”
گۆت ژی: “ئەز وسا دفکرم کو سەدەما دویەم ژی ئەوە کو ئەز وێنەیێن خوە د (باس نیوز) دە دوەشینم و مخابن ھین زیھنیەتا سیاسی یا سەردەست ل سلێمانیێ پەیاما ھونەری فام ناکە، ئەگەر وسا نەبە ئەو کارەکی ھونەری ژ بەر سەدەمێن سیاسی پاشگوھ ناکە.”
داژوار ئیبراھیم د داویا ئاخافتنا خوە دە گۆت: “پارتیا کارکەرێن کوردستانێ و یەکیتیا نشتمانیا کوردستانێ من ب دژمنێ خوە دبینن ژ بەر کو ئەز ب کاریکاتۆرێن خوە خیانەت، قاچاخچیتی، دزی و گەندەلیا ھەر دو پارتیان ل پێش چاڤێن خەلکێ ئەشکەرە دکم.”
