ھێزێن سووریەیا دەمۆکراتیک (ھەسەدێ) راگھاند، د ئێرشێن ئارتێشا ترکیەیێ ل سەر قامشلۆ و تل حەمیسێ دە، 4 شەرڤانێن وان ھاتنە کوشتن.
ناڤەندا راگھاندنێ یا ھەسەدێ د داخویانیەکێ دە دیار کر، ئارتێشا ترکیەیێ دوھی ئێڤارێ ب درۆنان 8 جاران ئێرشی خالێن ھەسەدێ، مال و ئۆتۆمۆبیلێن سڤیلان کرن.
دا زانین ژی، درۆنێن ترکیەیێ ل ھەرێما تل حەمیسێ خالەکا ھەسەدێ و ل دەردۆرا باژارێ قامشلۆیێ خالەکا ھێزێن ئەرکا خوەپاراستنێ بۆمبەباران کرن. ھەروھا ل قامشلۆ دو جاران مالێن سڤیلان و 3 جاران ژی ئۆتۆمۆبیلێن سڤیلان بۆمبەباران کرن.
ل گۆری داخویانیا ناڤەندا راگھاندنێ یا ھەسەدێ ئاشکەرە کر، ئامبولانسا کو ھەول ددا کوشتی و برینداران راکە نەخوەشخانەیێ ژی ھات ئارمانجکرن.
ئاشکەرە کر ژی، د ئەنجاما وان 8 ئێریشان دە، 4 شەرڤانێن ھەسەدێ ھاتن کوشتن و 11 کەسێن سڤیل ژی بریندار بوون.
ئەڤ ئێریشێن ترکیەیێ پشتی وێ تێن، سەرۆککۆمارێ ترکیەیێ رەجەب تەییب ئەردۆگان بەری دو رۆژان گەفا وێ یەکێ خواربوو کو ئەو ب چ ئاوایی رێ نادن ھبژارتنێن شارەداریان ل رۆژئاڤایێ کوردستانێ و ناڤچەیێن رێڤەبەریا خوەسەر بێن کرن.
ل گۆری زانیاریان، ژ دەستپێکا 2024 ڤە ئارتێشا ترکییێ 77 جاران رۆژئاڤایێ کوردستانێ ئارمانج کریە و د ئەنجامێ دە 24 کەس ھاتنە کوشتن و 37 کەس ژی بریندار بوونە، د ناڤا وان دە 16 سڤیل ھەنە.
