نەرازیبوون و مانگرتنێن ل دژی نرخێ کرینا گەنم ل ناڤچەیێن جودایێن رۆژئاڤایێ کوردستانێ بەردەوامن.
ھەڤسەرۆکاتیا دەستەیا چاندنی و ئاڤدانێ یا رێڤەبەریا خوەسەر، رۆژا 26 گولانێ بریار دا کیلۆیا گەنم ب 31 سەنتان ژ جۆتکارێن دەڤەرێ بێ کرین. د دەمەکێ دە کو رێڤەبەریا خوەسەر سالا بۆری نرخێ کیلۆیا گەنم 43 سەنت دیار کربوو.
لێ بەلێ جۆتکارێن ھەرێمێ ژ ڤێ بوھایێ نە رازی نە و ژ وێ دەمێ ڤە دادکەڤن کۆلانان و داخوازا زێدەکرنا نرخێ گەنم دکن.
جۆتکار و خەلکێ رۆژئاڤایێ کوردستانێ د مانگرتنێن خوە دە داخواز ژ رێڤەبەریا خوەسەر دکن ژ بریارا خوە ڤەگەرە و دبێژن، لێچوونا چاندنا گەنم، ژ نرخێ کو ھاتیە دەستنیشانکرن زێدەترە.
ھەر چەندە جۆتکار و وەلاتی ژ ڤێ نرخێ نە رازی نە، لێ جیگرێ ھەڤسەرۆکاتیا دەستەیا چاندنیێ ئەحمەد یوونس د کۆنفەرانسەکە رۆژنەمەڤانی دە راگھاندبوو، بوھایێ گەنم یێ دەستنیشانکری (31 سەنتێن ئامەریکی) دێ وەکی خوە بە و نایێ گوھەرتن.
ھەر د ڤێ دەربارێ دە ژی، ئەنجوومەنا نشتمانی یا کورد ل سووریێ (ئەنەکەسێ) بریارا رێڤەبەریا خوەسەر یا دەستنیشانکرنا نرخێ یەک کیلۆ گەنم ب 31 سەنتان شەرمەزار کربوو و گۆتبوو، ئەڤ یەک دێ زیانێن مەزن بگھینە جۆتکاران و ئەولەھیا خوارنێ ل ھەرێمێ بخە مەترسیێ.
