دەزگەھا خێرخوازیا بارزانی ب ھەڤکاریا کۆنسولخانەیا ئیماراتا عەرەبی ل ھەولێرێ، زێدەتری 4 ملیۆن دۆلار ل سەر زارۆکێن سێوی دابەش دکە.
سەرۆکێ دەزگەھا خێرخوازیا بارزانی مووسا ئەحمەد ئیرۆ 2 خزیرانێ د کۆنفەرانسەکا رۆژنامەڤانیێ دە راگھاند، “ئەم ھێڤیدارن د رۆژا راگھاندنا پرۆژەیا ھەڤبەشا دەزگەھا خێرخوازیا بارزانی لگەل ھەیڤا سۆرا ئیماراتێ، ھەر عەزیزەک (سێوی) سوودێ ژ ڤێ پرۆژەیێ وەربگرە کو پرۆژەیەک بەرفرەھ، پەروەردەیی و ب کالیتەیە.”
مووسا ئەحمەد دا زانین: “ناڤەندێن لێکۆلینێ ل سەر ئاستا ناڤخوە و ناڤدەولەتی ھەنە، کو لێکۆلینان ل سەر کارێ خێرخوازی و پرۆژەیان دکن، کو باندۆرەکە مەزن ل سەر سوودمەندێن پرۆژەیێ کر.”
گۆت ژی: “ھەر کەسێ سوودێ ژ ڤێ پرۆژەیێ وەردگرە، دڤێت بخوینە. ئەڤ یەک بوو سەدەم کو ھەژمارا زارۆکێن کو بابێن وان د کارەساتەکێ دە مرنە و ژ دبستانێ کەتنە، کێم ببە.”
سەرۆکێ دەزگەھا خێرخوازیا بارزانی گۆت ژی: “ئەو پرۆژە دێ د رۆژێن بێ دە ل باژارێن حەلەبجە، سلێمانی، گەرمیان، کەرکووک، ھەولێر، سۆران، زاخۆ، دھۆک، شنگال، مووسل، ئەنبار و بەغدایێ دەست پێ بکە. ھەروھا ئەڤ پرۆژە دێ ل عەفرینێ ژی وەرە راگھاندن و دێ 108 زارۆک ژێ سوودێ وەربگرن.”
دیار کر ژی: “ھەژمارا سوودمەندێن پرۆژەیا ھەڤبەشا دەزگەھا خێرخوازیا بارزانی یا ل گەل ھەیڤا سۆرا ئیماراتی، 11 ھەزار و 775 زارۆکن. د ڤێ ھەیامێ دە 3 ملیۆن و 551 ھەزار و 425 دۆلار دێ ل وان بێ بەلاڤکرن. ھەروھا 3 ھەزار و 470 کەس دێ سوودێ ژ پرۆژەیا کوردستانێ وەربگرن، کو دێ ملیۆنەک و 23 ھەزار و 720 دۆلار بێ دابەشکرن. ب گشتی، 15 ھەزار و 245 زارۆک ژ پرۆژەیێ سوودێ وەردگرن.”
مووسا ئەحمەد تەکەز کر، “مە ھەول دایە ھەڤسەنگیەکە باش د ناڤبەرا پارێزگەھ و باژارۆکان دە ھەبە، کو ل ھەولێرێ 3568 زارۆک، ل دھۆک 2733 زارۆک، سلێمانی 1882 زارۆک، کەرکووک 1504 زارۆک، گەرمیانی 1734 زارۆک، حەلەبجە 160 زارۆک، نەینەوا 231 زارۆک و ئەنبار و بەغدا و تکریتێ ژی 408 زارۆک ژێ سوود وەردگرن.”
