دادگەھا بلند یا تاوانان یا پارێزگەھا جۆلەمێرگێ ل سەر تاوانا تەرۆرێ سزایێ 19 سالان و شەش مەھێن زیندانیکرنێ ژ بۆ سەرۆکێ ژ کار دەرخستی یێ شارەداریا جۆلەمێرگێ محەمەد سدیق ئاکش دەرخست.
دادگەھا بلند یا تاوانان یا پارێزگەھا جۆلەمێرگێ ئیرۆ (چارشەمبێ، 5/6/2024) روونشتنا خوە یا 61 یا دارزاندنا ئەندامێ دەم پارتیێ و سەرۆکێ ژ کار دەرخستی یێ شارەداریا مەزنان یا پارێزگەھا جۆلەمێرگێ محەمەد سدیق ئاکش ب رێ ڤە بر، کو دەستپێکا دۆزا دارزاندنا وی ژ بۆ سالا 2014 ڤەدگەرە و داوی بریار ل سەر وێ دۆزێ دا کو ب تۆمەتا سەرکرداتیا رێکخستنا چەکداری و تەرۆری سزایێ 19 سال و شەش مەھێن زیندانیکرنێ ژێ رە دەرخست.
ل دوور مەدیایا ترکیەیێ، د وێ روونشتێ دە رێ ب محەمەد سدیق ئاکش ھات دان کو بەرگریێ ژ خوە بکە و داخواز کریە کو دادگەھا تێھەلچوونێ ل سەر بریارا دادگەھا تاوانان یا جۆلەمێرگێ رابوەستە.
ھەروەسا ئەو تۆمەتێن کو ئەو ل سەر ھاتیە دارزاندن رەد کرنە و راگەھاندیە کو، “ئەو تۆمەت ژ ئالیێ داخوازکەرێ گشتی ڤە ئاراستەیی وی ھاتنە کرن ژ بەر کو وی چ تاوان نەبوونە و ھزر ژی د رەڤینێ دە نەکریە.”
دارزاندنا سەرۆکێ ژ کار دەرخستی یێ جۆلەمێرگێ د چارچۆڤەیا بجھانینا رێکارێن توند یێن ئەولەھیێ دە ب رێ ڤە چوو، ئەو ژی پشتی کو بەری سێ رۆژان ھات دەستەسەرکرن و نھا پۆستێ سەرۆکاتیا شارەداریا جۆلەمێرگێ ژ ئالیێ قەیوومی ڤە تێ برێڤەبرن، کو وەزارەتا ناڤخوە یا ترکیەیێ کەسەکی دن ژ بۆ وی پۆستی راسپارتیە.
د هەمان دەمێ دە پارێزگەرێن دیاربەکر و وانێ ژ بۆ رێگرتنا ل چێبوونا ئالۆزی و خوەنیشاندانان بریارا قەدەغەکرنا ھەمی چالاکیێن مەدەنی ل وان باژاران دا، ئەڤ ژی پشتی کو ھەڤسەرۆکێ دەم پارتیێ داخوازا دیارکرنا نەرازیبوونا سەرانسەری ل دژی دەستەسەرکرن و دارزاندنا محەمەد سدیق ئاکش ژ ئالیگرێن خوە و وەلاتیێن باکورێ کوردستانێ کربوو.
