بووبێ ئەسەر
ملەتێن داگیرکری وەکە کورد و نەتەوەیێن بندەست، ھەگەر بخوازن خوە ئازاد و ب پێشڤە بخن، دڤێت ژ بۆنا خوە رێ و رێبازەکێ ئامادە بکن. ل گۆر وێ ژی ھەمی تەکۆشین و بەرخوەدانێن خوە پێک بینن. دەما ھاتە فێمکرن و زانین کو بێ رێباز ئانگۆ فەلسەفە چ ملەت نکارن خوە ئازاد بکن. بارزانیێن د تێگھشتنا ئازادیا گەلێ خوە دە بوون، ئەڤ یەک فێم کرن. لۆما دەست ئاڤێتن دانینا رێبازەکێ دا کو ملەتێ کورد بکاربە خوە ل گۆر خالێن وێ ئازاد بکە.
بارزانیان فێم کربوون کو بێ رێباز، زەحمەتە کورد بگەهنە ئازادیا خوە. ژ بەر ڤێ وان ژی ژ بۆنا کوردان رێ و رێبازەک ئانگۆ فەلسەفەیەک ئامادە کرن کو ھەمی تەکۆشینا وان یا سەد سالان ل گۆر ڤێ ھات و تێ مەشاندن.
ھەگەر ئەم ئیرۆ وەکە کورد خوەدیێ خوە و پەرچەیەکا ئازاد یا کوردستانێ بن، ئەڤ ژی ب سایا ڤێ رێبازا پیرۆزە کو ئەساسێ وێ ژ عەبدوسەلامێ یەکەم ھاتبوو دانین. عەبدوسەلامێ دووەم ئەو ب چەند خالان دەولەمەند کر.
شێخ محەمەدێ بارزانی کو د دەما خوەدە وی ژی سیستەما ئاغاتیێ ل باشوورێ کوردستانێ ل گۆر ڤێ رێبازا پیرۆز راکر. شێخ ئەحمەد ئاقلمەند و شێورمەندەکی ڤێ رێبازێ بوو. بارزانیێ مەزن ژی ل گۆر خالێن وێ، دەست ب شەرێ ئازادی و سەرخوەبوونا کوردستانێ کر. ل گۆر بیر و رامانێن سەرۆک مەسعوود بارزانی ژی باشوورێ کوردستانێ ھاتە ئازاد کرن.
ھەر چقاسی بارزانیێ مەزن کوردستانا ئازاد نەدیت ژی، لێ وی دزانبوو کو ئەڤ تەکۆشین و بەرخوەدانا رێبازێ، دێ رۆژەکێ کوردستانا ئازاد و سەربخوە بکە قسمەتێ کوردان. ژ بەر کو ئەڤ رێباز، وەکە دبستانەکێ یە. کەسێن ژیر و زانا ل گۆر خالێن د ڤێ دبستانێ دھاتن و تێنە پەروەردە و ئامادەکرن. ھەمی تەکۆشین و بەرخوەدانێن قۆتابیێن ڤێ رێبازێ ل گۆر خالێن وێ پێک دھاتن و تێن.
د سیاسەتا نەتەوەیا گەلێ کورد دە، ھندەک شەخسیەت ھەنە کو ب رۆل و ئەرکێن خوە، مۆھرا قەھرەمانیێ، ئاشتی و یەکتیێ ل دیرۆکا گەلێ کورد خستنە. ژ وان نەمران یەک ژی ئیدریس بارزانی بوو. نەمر ئیدریس بارزانی ژی یەک ژ قۆتابیێن ڤێ دبستانێ و کەسایەتیەکی ڤێ رێبازا پیرۆز بوو.
وەکە مە بەرێ ژی ئانیبوو زمان یێن کو ھەر ئەندام ئانگۆ بنگەهێن ڤێ رێبازێ ل گۆر دەم و زەمانێ تێدە ژیابوون، ھندەک شۆرەش پێک ئانیبوون. ب گۆتنەکا دن، ھەمی رێبەر و قەھرەمانێن ڤێ رێبازێ، محەقەق شۆرەشەک و گوھەرادنێن گرینگ د دەما خوە دە پێک ئانیبوون و تینن. نھا ژی دخوازم ڤەگەرم ل سەر کەسایەتیەکی ھێژا، زانا ژیر و ژێھاتی، نەمر ئیدریس بارزانیێ کو ئەو ژی ھیمەکی گران یێ ڤێ رێبازێ بوو. ئەم ب ھەڤرە فێم بکن کا نەمر ژ بۆنا ئازادیا کوردستانێ چ کار و خەبات کر بوو.
نەمر ئیدریس بارزانی د شەر و تەکۆشینا ئازادیا کوردستانێ دە رۆلەک تەیبەت ھەبوو. ئەو نە تەنێ شەرڤان و د ڤی واری دە لەشەکەری بوو. نەمر ب ھەلوەست، کریار و بوویەرێن خوە وەکە رێڤەبرەکی ڤێ رێبازا پیرۆز بوو. لۆما لڤ و تەڤگەرێن نەمر ل گۆر ڤێ پێک دھاتن. د ناڤا کارێن وی دە خالا یەکەم و گرینگ، ل ھەڤکرن و ب ھەڤرە کارکرنا پارتیێن کوردستانی بوو. نەمر ل باشوورێ کوردستانێ د بن سیوانەکا نەتەوەیی دە، ھەمی پارتیێن ھەیی ب جھ کرن. ژ بەر کو د خالێن ڤێ رێبازێ دە خالا ل ھەڤکرن و دامەزراندنا ئەنیەکا نەتەوەیی ھەبوو. ئەڤ ژی ل سەر دەستێ نەمر ھاتە ئاڤاکرن. ئانگۆ پێک ھات.
نەمر ئیدریس بارزانی خوەدیێ خوە و چەند تایبەتمەندیان بوو کو ب کێم سەرۆک و رێڤەبرێن کوردستانێ و جیھانی رە ژی ھەبوون ئان ھەنە. ژ بۆنا کو ئەو بکاربە ھەمی رێخستن و پارتیێن باشوورێ کوردستانی ل گۆر خالێن رێبازا پیرۆز و د بن سیوانەکا نەتەوەیی دە بکە یەک، گەلەک خەبات، جھد و ھەولدان کر. د ڤێ ھەلوەستا خوەیا نەتەوەیی دە ب سەر کەت.
ژ بەر یەکیتی و ب ھەڤرە کارکرنا پارتیێن کوردستانی گەلەکی زۆر و زەحمەت بوو. لێ نە بێ ئیمکان بوو. لەورا نەمر ئیدریس بارزانی ژی ل گۆر دەستوور و بەرنامەیا رێبازێ دەست ئاڤێت ڤی کاری و ب سەر ژی خست..
نەمر ئیدریس بارزانی ئەو زۆر و زەحمەتی ب کەد و ھەلوەستا خوە، ل گۆر رێبازا پیرۆز چ پارتیێن ل باشوورێ کوردستانێ ھەبوون، ب خەباتێن دوور و درێژ، ب بێهنفرەهیەکا جامێرانە و ب ھەلوەستا خوەیا نەتەوەیی، ھەولا دامەزراندنا ئەنیا نەتەوەیی دا. نەمر ئەو داخوازا گەلێ کورد یا ب سالان پێک ئانی. ئانگۆ دامەزراندنا ئەنیا کوردستانی، ھاتە ب جھ کرن.
ھەلبەت ئەڤ نە کارەکی ھێسان بوو کو کەسەک بکاربە پارتیێن کوردستانی د بن کۆنەکی نەتەوەیی دە ژ بۆنا بەرژەوەندیا گەلێ خوە بگهینە ھەڤ. لێ دەما مرۆڤ ببە خوەدی رێباز ئانگۆ فەلسەفەیەکا نەتەوەیی ھەمی کارێن ئازادی و سەرخوەبوونا کوردستانێ ھێسان دبە.
دەما داگیرکەران وەلاتێ مە کوردستانا شێرین پەرچە کرن و ل ھەڤ پارڤە کرن. ب ڤێ پارڤەکرنێ ھەولا کو کورد نەبن یەک و ب ھەڤرە کار نەکن، مەژیێ وان ژی داگیر کر. ھەلوەستێن وان یێن نەتەوەیی ب رێیا سیخور و زلامێن خوە ژ ھەڤ بەلاڤ کرن. ئەڤ ھێ ژی بەردەوامە. لێ ئەڤ تەنھا ل باشوورێ کوردستانێ ب سایا ڤێ رێبازا پیرۆز ھاتیە شکاندنێ.
ژ بەر وێ داگیرکرنێ بوو کو یەکیتیا گەلێ کورد پێک نەدھات. لێ نەمر ئیدریس بارزانی ئەڤ یەک باش دزانی بوو و ل گۆر وێ ھەلوەست گرت، کار و خەباتێن بێ وەستان دۆماندن. ب ڤێ خەباتا خوە، نەمر ژ ھەمی پارتیێن کوردستانی یێن باشوورێ کوردستانێ ئەنیەکا نەتەوەیی پێک ئانی کو ئەڤ نە کارەکی ھێسان بوو، لێ نەمر پێک ئانی بوو.
ب سایا دامەزراندنا ئەنیا نەتەوەیی ئیرۆ ئەم وەکە کورد ل باشوورێ کوردستانێ خوەدیێ خوە و وەلاتەکی ئازادن. بەلێ ئەڤ ب سایا تەکۆشینا بارزانیان یا سەد سالان و ب دامەزراندنا ئەنیا نەتەوەیی یا کو ب پێشەنگیا نەمر ئیدریس بارزانی ھاتبوو دامەزراندنێ، پێک ھات. کورد ل باشوورێ کوردسانێ بوونە خوەدیێ پەرچاک ژ وەلاتێ خوە یێ ئازاد کو ئیرۆ گاڤێن بەرب سەرخوەبوونێ داڤێژە.
ژ بەر وێ ھەلوەست، جھد، کریار و پێکانینا ئەنیا نەتەوەیی بوو کو کوردان ناڤێ نەمر کرن ئەندازیارێ ئاشتی و یەکیتیا گەلێ کورد. ھەگەر نە ژ وێ ئەنیا کوردستانی با، دبوو کو ئیرۆ ئەم نە خوەدیێ خوە و ئازادیا باشوورێ کوردستانێ بوونا. خوەزی ئەندازیارەکی وەکە نەمر ئیدریس بارزانی ل باکورێ کوردستانێ ژی پەیدا ببا.
د ناڤ تەڤگەر و پارتیان دە پەیدەکرنا ئەندازیارێن ئاشتی و یەکیتیێ زۆر و زەحمەتە. لێ نەمر وەکە قۆتابیەکێ دبستانا ڤێ رێبازێ بوو. ژ بۆنا کوردستانەکا سەربخوە، ھەمی بەرژەوەندیێن خوە یێن شەخسی و حزبی ل ئالیکی دانان. تەنێ کار و خەباتا خوە یا تالی ژ بۆنا دامەزراندنا ئەنیا نەتەوەیی بر سەری. نەمر ل گۆر خالێن رێبازا پیرۆز کو مە بەرێ بەحسا وان کربوو، تەڤگەریا بوو. لەورا نەمر باش دزانیبوو، ھەگەر یەکتیا کوردان پێک نەیێ، ئازادی و سەرخوەبوونا وەلاتێ وان ژی دێ پێک نەیێ. ژ بەر کو ئەڤ خالەکا سەرەکی یا رێبازێ ب خوەیە.
نەمر ئیدریس بارزانی ب پێکانینا دامەزراندنا ئەنیا کوردستانی، خوە و ھەلوەستا خوە یا نەتەوەیی ل گۆر رێبازێ پێک ئانی کو کورد ل سەر روویێ جیھانێ بژین. کوردان ژی ئەو وەکە ئەندازیارەکی ئاشتی و یەکتیا گەلێ کورد، د دلێ خوە دە ب جھ کرن.
