پەدەکە دێ بەشداری ھلبژارتنێن پارلامەنتۆیا کوردستانێ ببە

 بەردەڤکا کۆمیسیۆنا ھلبژارتنان یا ئیراقێ دبێژە، پەدەکێ داخوازا خوە یا بەشداریا د ھلبژارتنێن پارلامەنتۆیا ھەرێما کوردستانێ دە نیشان دایە.

بەردەڤکا کۆمسیۆنا بلندا سەربخوەیا ھلبژارتنان یا ئیراقێ جومانا خەلایی ئیرۆ 9 خزیرانێ راگھاند، پارتیا دەمۆکراتا کوردستانێ (پەدەکێ) نامەیەکا فەرمی ژ بۆ ئۆفیسا کارووبارێن پارتیێن سیاسی یێن کۆمیسیۆنێ شاندیە و داخوازا خوە ژ بۆ بەشداربوونا د ھلبژارتنێن پارلامەنتۆیا کوردستانێ دە نیشان دایە.

ھەر چەندە سەرۆکێ ھەرێما کوردستانێ نێچیرڤان بارزانی رۆژا 10 خزیرانا 2024 ژ بۆ ھلبژارتنێن پارلامەنتۆیا ھەرێما کوردستانێ دەستنیشان کربوو، لێ بەلێ ژ بەر بەشدارنەبوونا پەدەکێ و پێکھاتەیان، ژ بەر بریارا دادگەھا فەدەرالا ژ بۆ بەتالکرنا 11 کورسیێن کوتایێ یێن پارلامەنتۆیا کوردستانێ و “دەستوەردانا دەرڤە و ئامادەکرنا دیزاینەکا پێش وەختا ھلبژارتنێ”، ھلبژارتن جارەکە دن ھات پێشخستن.

ئەنجوومەنا بلند یا دادوەرییا ئیراقێ رۆژا 21 گولانێ بریار دا کو ژ 100 کورسیێن پارلامەنتۆیا ھەرێما کوردستانێ، 5 کورسیێن پارلامەنتۆیا ھەرێما کوردستانێ ژ بۆ پێکھاتەیان بێن تەرخانکرن، ئانکو دێ 95 کورسیێن گشتی ھەبن، پێنج یێن دن دێ ژ بۆ پێکھاتەیان بێنە تەرخانکرن.

کۆمیسیۆنا بلندا سەربخوەیا ھلبژارتنان رۆژا 5 ئیلۆنێ ژ بۆ لدارخستنا ھلبژارتنێن پارلامەنتۆیا ھەرێما کوردستانێ پێشنیار کریە و ئەڤ پێشنیار ب فەرمی ژ بۆ سەرۆکاتیا ھەرێما کوردستانێ شاندیە.

کۆمیسیۆنێ ژی ژ 8 ھەتا 13 خزیرانا 2024، دەریێ تۆمارکرنا ھەڤپەیمانی، پارتیێن سیاسی، کاندیدێن سەربخوە و کاندیدێن پارتیان ڤەکریە. ھەر پارتی یان ژی کەسەک کو بخوازە بەشداری ھلبژارتنێن پارلامەنتۆیا 2024 ببە، دکارە سەردانا ئۆفیسێن کۆمیسیۆنێ یێن ل پارێزگەھان بکە.”