تەڤگەرا جوانێن شۆرەشگەر یا سەر رێڤەبەریا خوەسەر ڤە زارۆکەکە کۆچبەرا عەفرینی ل باژارێ قامشلۆ رەڤاند و دیا وێ بانگا ڤەگەراندنا وێ دکە.
دایکا ب ناڤێ سەوسەن حسۆ ژ کوردستان24ێ رە گۆت، کەچا وێ رووکەن عەمۆ یا 14 سالی رۆژا 6 ڤێ مەھێ ژ ئالیێ رێخستنا تەڤگەرا جوانێن شۆرەشگەر ڤە ھاتیە رەڤاندن و ھەیا نھا ت زانیاری دەربارێ وێ تونە نە.
دا زانین ژی، کەچا وێ رووکەن سالا 2010 ژدایک بوویە، ژ گوندێ ئاقیبێ یێ سەر ب عەفرینێ ڤەیە و ژ دەما داگیرکرنا عەفرینێ د سالا 2018 دە، ئەو کۆچبەری قامشلۆ بوونە.
سەوسەن حسۆ، بانگ ل ھەموو رێخستنێن مرۆڤی، یاسایی و یێن مافێن زارۆکان دکە کو کەچا وێ ڤەگەرینن مالێ.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
مالباتێن زارۆکێن رەڤاندی ژی کریارێن تەڤگەرا جوانێن شۆرەشگەر شەرمەزار دکن و بانگ ل رێخستنێن کو گرینگیێ ددن مافێن زارۆکان، رێخستنێن ناڤدەولەتی و ئالیێن پێوەندیدار دکن کو فشارێ ل رێڤەبەریا خوەسەر و ھسدێ بکن تا کو چارەنڤیسا زارۆکێن وان دیار بکن.
