د 3 رۆژان ده بالافرێن تركیێ 14 جاران ئێریشی گوندێن دهۆكێ كرییه و 49 مووشه‌ك لێ باراندنه
خه‌ته‌رییا په‌كه‌كێ ل سه‌ر گوندێن پارێزگه‌ها دهۆكێ پڕ زێده‌بوویه، ب ئاوایه‌كی ته‌نێ د 3 رۆژێن رابووری ده ئارتێشا تركیێ ب سه‌ده‌ما لڤ و ته‌ڤگه‌رێن رێخستنێ 14 جاران ئێریشێ گوندێن ده‌ردوورا دهۆكێ كری یه و 49 گوللـه‌تۆپ و مووشه‌ك لێ باراندنه.
ئێریشێن هه‌وایی و به‌ژاهی یێن ده‌وله‌تا ترك ل دژی په‌كه‌كێ ل سینۆرێ پارێزگه‌ها دهۆكێ پڕ دژوار بوونه، ب ئاوایه‌كی د 3 رۆژێن رابووری ده، 11 گوند و ناڤچه‌یێن دیار یێن دهۆكێ و یێن گه‌شتیاری ژی تێ ده، كه‌تنه به‌ر ئێریشان و زراره‌كه مه‌زن ب شێنیێن وان كه‌تیه.
داركا مازی ئامارا 3 رۆژێن رابووری، ئانگو 6، 7 و 8 یێن خزیرانا 2024ێ یێن ئێریشان ده‌ستخستنه، ل گۆری وێ 14 ئێریش ل سه‌ر 11 گوند و ناڤچه‌یان هاتنه كرن، بالافر و تۆپخانه‌یێن ئارتێشا تركیێ، 49 گوللـه‌تۆپ و مووشه‌ك ل سه‌ر وان گوندان باراندنه.
گوند و ده‌ڤه‌رێن دهۆكێ یێن كو ژ 6 ڤێ مه‌هێ ڤه ب سه‌ده‌ما په‌كه‌كێ راستی بۆمبه‌بارانێ هاتین ئەڤن:
گوهه‌رزێ
گه‌لیێ بازێ
ده‌رگه‌لا مووسا به‌گێ
ئاقارێ گوندێن بازێ و بێلیزانێ
گه‌لیێ بێشیلێ
گه‌لیێ هه‌سپا
ده‌ریێ بێرا
پشتا گه‌لیێ دێره‌شێ
گه‌لیێ شێرانه
ئاقارێ سگێرێ
گه‌لیێ بیێ و گیزێ
ئێریش ووسا هاتنه ئه‌نجام دایین:
ل 2024/6/6ێ:
دەمژمێر 11:17 سپێدێ بالافرێن ئارتێشا تركیێ تۆنێلا هنداڤی گوندێ گوهه‌رزێ ل ناحیا دێرەلۆکێ ل دەڤەرا نهێلیا بۆردۆمانکرییە و یێك مووشەک لێدایە.
ده‌مژمێر 11:10 تا 11:55 بالافرێن ئارتێشا تركیێ گەلیێ بازێ ل دەڤەرا به‌رواری بالا بۆردۆمانكرییه و دو مووشه‌ك لێخستنه.
ده‌مژمێر 2:00 پشتی نیڤرۆ بالافران ئاقارێ گوندێ ده‌رگه‌لا مووسا به‌گێ ل ده‌ڤه‌را به‌رواری بالا بۆردۆمانكرییه و دوو مووشه لێخستنه، هه‌ر وها ده‌مژمێر 5:00 تا 5:25 ئێڤارێ 5 مووشه‌ك ل هه‌مان جهی دا نه.
دەمژمێر 12:00 تا 12:40 نیڤرو تۆپخانێن ئارتێشا تركیێ د ناڤبەرا ئاقارێ گوندێن بازێ ی بێلیزانێ – دەڤەرا بەرواری بالا بۆردۆمانکرینە و 9 گوللـه‌تۆپ لێدانە.
دەمژمێر 2:11 نیڤرۆ بالافرێن ئارتێشا تركیێ ئاقارێ گوندێ گوهەرزا کەڤن – ناحیا دێرەلۆکێ بۆردۆمانکرییە و د ئەنجام دا شه‌وات ب گورستانا گوند كه‌ت.
ل 2024/6/7ێ:
دەمژمێر 5:00 ئێڤاری بالافرێن ئارتێشا تركیێ گەلیێ بازێ و بێلیزانێ – ناحیا کانی ماسێ بۆردۆمانکرییە و 4 مووشەک لێ باراندنه.
دەمژمێر 6:12 تا 6:20 ئێڤاری بالافرێن ئارتێشا تركیێ گەلیێ بازێ بۆردومانکرییە و دو مووشەک لێدانە، هەروەسا دەمژمێر 7:08 مەغرەب یه‌ك مووشەک ل گەلیێ هەسپا خستیه.
دەمژمێر 6:25 مەغرەب بالافرێن تركیێ دەریێ بێرا و تۆنیلا هنداڤی گوندێ گوهەرزێ – ناحیا دێرەلوک – دەڤەرا نهێلیا بۆردۆمانکرییە و دو مووشەک لێدانە، هەروەسا ل هەمان رۆژێ دەمژمێر 6:40 مەغرەبێ پشتا گەلیێ دێرەشێ و گەلی شیرانە – ناحیا دێرەلۆکێ ژ هێلا تركیێ ڤە هاتنە بۆردۆمانکرن و دو مووشەک لێدانە.
ل 2024/6/8ێ:
ده‌مژمێر 9:30 سپێدێ بالافرێن ئارتێشا تركیێ هنداڤی گەلیێ بازێ بۆردۆمانکرییە و یه‌ك مووشەک لێدایە، ل هەمان رۆژ دەمژمێر 1:43 تا 4:20 ئێڤاری گەلیێ بازێ، گەلیێ بێشیلێ، گەلیێ هەسپا، گەلیێ دەرگەلا مووسا بەگێ و گەلیێ شێلازا – دەڤەرا بەرواری باڵا بۆردۆمانکرییە و 8 مووشەک لیداینە.
دەمژمێر 400 تا 5:00 ئێڤاری تۆپخانه‌یێن ئارتێشا تركیێ هنداڤی گوندێ دەرگەلا مووسا بەگێ و گەلیێ بێشیلێ – دەڤەرا بەرواری بالا بۆردۆمانکرینە و 7 حەفت گوللـه‌تۆپ لێدانە.
دەمژمێر 5:37 ئێڤاری بالافرێن ئارتێشا تركیێ ئاقارێ گوندێ سگێرێ ۔ ناحیا دێرەلۆکێ – دەڤەرا نهێلیا و سەرێ دەریکێ بیێ و گیزێ دەڤەرا بەرێ گارەی بۆردومانکرینە و سێ مووشەک لێدانه.
ژ ده‌ستپێكا مه‌ها گولانێ ڤه ده‌وله‌تا ترك ئێریشێن ئاسمانی ل دژی په‌كه‌كێ ل باشوورێ كوردستانێ تایبه‌ت ل سینۆرێ پارێزگه‌ها دهۆكێ دژوار كرنه، په‌كه‌كێ وه‌نداهیێن مه‌زن دا نه، ئه‌ڤ یێك ل ده‌مه‌كی تێ نێزیكبوونا شه‌ر و په‌ڤچوونان بۆ سینۆرێ گوندێن پارێزگه‌ها دهۆكێ نیگه‌رانیه‌ك مه‌زن ل جه‌م شێنیێن گوندان چێكریه و په‌كه‌كه ب ڤێ یه‌كێ ب زانه‌بوون دكه و دخوازه ئه‌و گوند و هه‌رێمێن دهۆكێ ژ شێنییان وه‌رن ڤالا كرن.
