ئەنجوومەنا نشتمانی یا کوردی ل سووریێ (ئەنەکەسە) رەڤاندنا 2 ئەندامێن پەدەکە-سێ ژ ئالیێ گرۆپێن چەکدارێن سەر ب پەیەدێ ڤە شەرمەزار دکە و داخوازا ئازادکرنا وان یا دەملدەست دکە.
سەکرتەریا گشتی یا ئەنەکەسێ ئیرۆ ١٠ێ خزیرانێ د داخویانیەکێ دە راگھاند، ئەندامێ ئەنجوومەنا ھەرێمی یا پەدەکە-سێ عەبدلرەحمان شەنگ رۆژا 6 خزیرانێ ژ مالا خوەیا ل گوندێ تەبقا یێ سەر ب دێرکێ ڤە ژ ئالیێ گرۆپەکێ چەکداران یێ سەر ب پەیەدێ ڤە ھات رەڤاندن و ھەتا نھا چارەنڤیسا وی نە دیارە.
دیار کر ژی، ئەندامێ ئەنجوومەنا شاخێ یێ پەدەکە-سێ خالد محەمەد میرۆ ژی رۆژا 9 خزیرانێ ژ مالا خوە یا ل باژارێ دێرکێ ژ ئالیێ گرۆپەکە چەکدار یا سەر ب پەیەدێ ڤە ھات رەڤاندن.
سەکرتەریا گشتی یا ئەنەکەسێ چەکدارێن سەر ب پەیەدێ ڤە د بەر ڤان بنپێکرنان دە بەرپرس دبینە و داخوازا ئازادکرنا دملدەست یا رەڤاندیان دکە.
ھەروھا ئەنەکەسێ بانگ ل ھەموو ئالیێن پێوەندیدار و ھەڤپەیمانیا ناڤدەولەتی یا ب سەرۆکاتیا ئامەریکایێ کر کو بزاڤێن پێویست ژ بۆ رێگرتن ل ڤان بنپێکرنان بکن و فشارێ ژ بۆ ئازادکرنا رەڤاندیان و ھەموو گرتیێن ئەنەکەسێ بکن.
ل سەر درێژاھیا سالێن دەستھەلاتا رێڤەبەریا خوەسەر، ب دەھان ئەندام و ئالیگرێن ئەنەکەسێ و پارتیێن د ناڤا وێ ھاتنە رەڤاندن و گرتن، ئۆفیس و بارەگەھێن وان ھاتنە شەوتاندن و چالاکیێن وان ھاتنە قەدەغەکرن. بەرپرسێن ئەنەکەسێ ژی پەیەدێ ژ بەر ڤان ھەموو بنپێکرنان بەرپرسیار دبینە.
