چەکدارێن تەڤگەرا ب ناڤێ “جوانێن شۆرەشگەر” یا کو راستەراست فەرمانا ژ قەندیلێ وەردگرە، زارۆکەکا دن ژ ھەرێما شەھبا ل گوندەوارێ حەلەبێ رەڤاندن.
رێخستنا مافێن مرۆڤان ل عەفرینێ د داخویانیەکێ دە راگھاند کو چەکدارێن تەڤگەرا “جوانێن شۆرەشگەر” یا گرێدایی ھێزێن سووریەیا دەمۆکراتیک د 6/6/2024 دە زارۆکا ب ناڤێ بەیان محەمەد فەحام یا 14 سالی رەڤاند. فەحام، رۆژا (25/1/2010) ژ داییک بوویە.
ل گۆری داخویانیا رێخستنێ، زارۆکا تەمەن بچووک پشتی چاڤدێریا مالا وێ و چوونا مالباتا وێ ژ بۆ داوەتەکێ ل دەرڤەیی گوندی ھاتیە رەڤاندن، و هاتیە برن بۆ کامپا پەروەردا لەشکەری یا ل تل سووسن ژ بۆی کو وێ بکن چەکدار د ناڤا رەفێن ھێزێن پاراستنا ژنێ دە.
رێخستنێ ئاماژە ب وێ یەکێ ژی کر، کو ئەندامێن “جوانێن شۆرەشگەر” ئەڤ کەچ ل ترومبێلێ سوار کریە، تەڤی قیرینا کەچێ، پارچەیەک دانینە سەر دەڤێ وێ و ب زۆرێ ئەو رەڤاندیە.
رێخستنێ تەکەز کر کو مالباتا زارۆکا رەڤاندی سەردانا ھەموو بارەگەھێن ئەولەکاری و لەشکەری یێن گرێدایی رێڤەبەریا پەیەدێ ل دەڤەرێ کرینە، لێ ڤان سازیێن پەیەدێ بێ ئاگاهیا خوە ژ مژارێ راگهاندیە.
تەڤی کو ھەسەدێ د خزیرانا 2019 دە لگەل نەتەوێن یەکگرتی پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکداران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.
