د دو رۆژێن رابووری ده ب سه‌ده‌ما لڤ و ته‌ڤگه‌رێن په‌كه‌كێ، ئارتێشا تركیێ ب ئێریشێن ئاسمانی و به‌ژاهی 5 گوند و ناڤچه‌یێن دیار یێن دهۆكێ بۆردۆمان كرنه.
ل گۆری ئامارا دو رۆژێن رابووری یا لڤ و ته‌ڤگه‌رێن په‌كه‌كێ و ئێریشێن تركیێ، ل رۆژێن 9 و 10 خزیرانا 2024ێ، ئارتێشا تركیێ 8 مووشه‌ك ل 5 گوند و گه‌لیێن دیار یێن ل سینۆرێ پارێزگه‌ها دهۆكێ دا نه و زراره‌ك مه‌زن ب ئاقار و زه‌ڤه‌یێن چاندنیێ خستیه.
ئێریش ووسا بوون:
ل 9\6\2024ێ:
– ده‌مژمێر 6:06 تا 6:16ێ ئێڤارێ بالافرێن تركیێ رۆژهلاتا تۆنه‌لا هنداڤی گوندێ گوهه‌رزێ و گه‌لیێ سه‌رگه‌لێ ل ناحیا دێره‌لۆكێ و هه‌ر وها ئاقارێ گوندێ سپیندارێ ل ده‌ڤه‌ر به‌رێ گاره بۆردۆمان كرنه و 3 مووشه‌ك لێدانه.
– ده‌مژمێر 6:20 ئێڤارێ بالافرێن تركیێ گه‌لیێ دێرا و شكه‌فتا بابه‌كرا ل ناحیا كانی ماسێ بۆردۆمان كرنه.
ل 10\6\2024ێ:
– ده‌مژمێر 7:07 مه‌غره‌ب بالافرێن تركیێ جاره‌كه دن تۆنه‌لا هنداڤی گوهه‌رزێ بۆردۆمان كریه و 2 مووشه‌ك لێخستنه.
– ده‌مژمێر 7:12 مه‌غره‌ب بالافران دیسا گه‌لیێ هه‌سپا ل ناحیا كانی ماسێ بۆردۆمان كریه و یه‌ك مووشه‌ك لێدایه.
ژ ده‌ستپێكا مه‌ها گولانێ ڤه ده‌وله‌تا ترك ئێریشێن ئاسمانی ل دژی په‌كه‌كێ ل باشوورێ كوردستانێ تایبه‌ت ل سینۆرێ پارێزگه‌ها دهۆكێ دژوار كرنه، په‌كه‌كێ وه‌نداهیێن مه‌زن دا نه، ئه‌ڤ یێك ل ده‌مه‌كی تێ نێزیكبوونا شه‌ر و په‌ڤچوونان بۆ سینۆرێ گوندێن پارێزگه‌ها دهۆكێ نیگه‌رانیه‌ك مه‌زن ل جه‌م شێنیێن گوندان چێكریه و په‌كه‌كه ب ڤێ یه‌كێ ب زانه‌بوون دكه و دخوازه ئه‌و گوند و هه‌رێمێن دهۆكێ ژ شێنییان وه‌رن ڤالا كرن.
