دارکا مازی وێنە و ناڤێن وان چەتەیێن پەکەکێ پارڤە دکە یێن ئێریشی سەر بارەگەهێن ئەنەکەسێ کرین

بنپێکرنێن پەیەدێ یێن ل دژی پەدەکەسێ و ئەنەکەسێ ل رۆژئاڤا کوردستانێ بەردەوام دکن، تەڤگەرا چەتە یا ب ناڤێ “جوانێن شۆرەشگەر یا سەر ب پەیەدێ ڤە کو راستەراست فەرمانا ژ قەندیلێ وەردگرە، د مەها 3/2024 دە ل هندەک باژار و باژارۆکێن رۆژئاڤا کوردستانێ ئێریشی سەر بنکە و بارەگەهێن پەدەکەسێ کرن و د ڤان بارەگەهان دە ئالا کوردستانێ و تەڤ تشتێن د ناڤا بارەگەهان دە سۆتن و تالان کرن.

ب ئاوایەکی گشتی د مەها 3/2024 دە چەتەیێن “جوانێن شۆرەشگەر” 5 ئێریش ل سەر پەدەکەسێ و ئەنەکەسێ پێک ئانینە، ب ڤی ئاوا:

1. هەژمارەک ژ ئەندامێن چەتەیێن ب ناڤێ “جوانێن شۆرەشگەر” د 1/3/2024 دە ل باژارێ کۆبانێ ب دار و کەڤران ئێریشی سەر نڤێسینگەها پەدەکەسێ کر، ئەڤ ئێریش د دەمەکی دە پێکهات کو د ناڤا نڤێسینگەها پەدەکەسێ دە ژ بۆ سالڤەگەرا کۆچا داوی یا بابێ نەتەوا کورد “مەلا مستەفا بارزانی” مەراسیمەک هاتبوو رێکخستن، د ڤێ ئێریشێ دە چەتەیێن پەکەکێ تەڤ ئاموورێن د ناڤا نڤێسینگەهێ دە شکاندن و بێ روومەتی ب ئالا کوردستانێ و وینەیێ نەمر بارزانی کرن و چەند کەس ژی بریندار کرن.

2. ئەندامێن ڤێ تەڤگەرا چەتە “جوانێن شۆرەشگەر” د 1/3/2024 دە جارەکە دن ئێریشی سەر نڤێسینگەها پەدەکەسێ یا ل باژارۆکێ تربەسپیێ یێ سەر ب حەسەکێ ڤە کر، دەست دانی سەر ئاموورێن دەنگ و مەراسیما ژ بۆی کۆچا داوی یا نەمر مەلا مستەفا بارزانی ل ڤڕ ژی هاتبوو لدارخستن تێک دا.

3. د 10/3/2024 دە ئەندامێن ڤێ تەڤگەرا چەتە جارەکە دن ئێریش کرن سەر نڤێسینگەها پەدەکەسێ یا ل باژارێ عاموودا یێ سەر ب حەسەکێ ڤە و ئەڤ نڤێسینگەهە شەوتاندن.

4. د 10/3/2024 دە جارەکە دن ل دێرکێ ئێریشی سەر نڤێسینگەها پەدەکەسێ کرن و ئەڤ ژی شەوتاندن.

5. هەر وەها د 11/3/2024 دە ئەندامێن ڤێ تەڤگەرا چەتە ئێریش کرن سەر نڤێسینگەها پەدەکەسێ یا ل باژارێ گرکێ لەکێ و ئەڤ نڤێشینگەهە ژی شەوتاندن.

دارکا مازی ب پشت بەستن ل سەر چاڤکانیێن خوە یێن ل رۆژئاڤا کوردستانێ ناڤێن وان ئەندامێن تەڤگەرا “جوانێن شۆرەشگەر” یێن کو ئەڤ ئێریش پێکئانینە ب دەست خستنە، ناڤێن وان ئەڤن:

1. دەلیل ئارارات، 30 سالی، کادرۆیێ پەکەکێ یە، ب ئەسلا خوە ژ باکورێ کوردستانێ یە و ژ شێنیێن باژارێ ئامەدێ یە، بەرپرسێ تەڤگەرا “جوانێن شۆرەشگەر”ە ل باژارۆکێ دێرکێ.

2. خەیری، 35 سالی، کادرۆیێ پەکەکێ یە، ب ئەسلا خوە ژ باکورێ کوردستانێ یە، بەرپرسێ گشتی یێ تەڤگەرا “جوانێن شۆرەشگەر”ە ل باژارێ کۆبانیێ.

3. خەلیل کۆبانی، ژ شێنیێن کۆبانیێ یە، یەک ژ بەرپرسێن ڤێ تەڤگەرا چەتەیە ل باژارێ کۆبانیێ، بەرپرسێ یەکەمە ژ رەڤاندنا زارۆکان ل کۆبانیێ و دبە خزمێ مەزلووم عەبدی.

4. عەگید ئەحمەد، ژ شێنیێن کۆبانیێ یە، بەرپرسێ لیژنەیا پەروەردەیێ یا ڤێ تەڤگەرێ یە.

5. سیلڤا جان ئێش، ب ئەسلا خوە ژ باکورێ کوردستانێ یە، کادرۆیا پەکەکێ یە، یەک ژ بەرپرسێن ڤێ گرووپێ یە.

6. ئەحمەد دەروێش، ژ باژارێ کۆبانیێ یە، ئەندامێ لیژنەیا وەرزشی یا ڤێ تەڤگەرێ یە و کەسەکی نێزی مەزلووم عەبدی یە.

7. جەمیلە عەبدولحەلیم مەعمێ، ب کۆد ناڤێ خوناڤ عاموودا، ژ شێنیێن رۆژئاڤا کوردستانێ یە، کادرۆیا پەکەکێ و ئەنداما “جوانێن شۆرەشگەر”ە.

8. زیناوە عەبدولحەنان محەمەد، ب کۆد ناڤێ رۆکەن عەفرین، ژ شێنیێن عەفرینێ یە، کادرۆیا پەکەکێ و ئەنداما تەڤگەرا “جوانێن شۆرەشگەر”ە.

9. فاتما عەلی حسێن، ب کۆد ناڤێ ساکینا جانسس، کوردە و ژ شێنیێن رەقایێ یە، کادرۆیا پەکەکێ و ئەنداما تەڤگەرا “جوانێن شۆرەشگەر”ە.

10. موراد چەلەنگ موراد، ب کۆد ناڤێ مەزلووم کۆبانی، ژ شێنیێن رۆژئاڤا کوردستانێ یە، کادرۆیێ پەکەکێ و ئەندامێ تەڤگەرا “جوانێن شۆرەشگەر”ە.

11. محەمەد شاهین، ب کۆد ناڤێ دلگەش کۆبانی، ژ شێنیێن رۆژئاڤا کوردستانێ یە، کادرۆیێ پەکەکێ و ئەندامێ تەڤگەرا “جوانێن شۆرەشگەر”ە.

12. عیماد یەحیا عەلی، ب کۆد ناڤێ ئارارات کۆبانی، ژ شێنیێن رۆژئاڤا کوردستانێ یە، کادرۆیێ پەکەکێ و ئەندامێ تەڤگەرا “جوانێن شۆرەشگەر”ە.

13. حەقی شوکری شێخ دەمیر، ژ رۆژئاڤا کوردستانێ یە، کادرۆیێ پەکەکێ و ئەندامێ تەڤگەرا “جوانێن شۆرەشگەر”ە.

14. محەمەد خەلیل سالح، ب کۆدناڤێ شۆرەش ئێلەجاخ، ژ شینیێن رۆژئاڤا کوردستانێ یە، کادرۆیێ پەکەکێ و ئەندامێ تەڤگەرا “جوانێن شۆرەشگەر”ە.

هەر وەها ژ ئالیێ خوە ڤە زاخۆ زاگرۆس “فوزا یوسف” ئەنداما دەستەیا سەرۆکاتیا پەیەدێ، د 2/3/2024 دە ل رێمێلانێ یا سەر ب باژارۆکێ دێرکێ لگەل هندەک ژ بەرپرسێن تەڤگەرا چەتە یا ب ناڤێ “جوانێن شۆرەشگەر” جڤیابوو و ژ ان رە راگهاندبوو کو پێویست دکە ل سەر ئێریشێن خوە بەردەوام بن و بریار و تەعلیماتێن پەکەکێ یێن ژ بۆی ئێریشکرن و شەوتاندنا بنکە و بارەگەهێن پەدەکەسێ و ئەنەکەسێ وەکە هەیی ب تەمامی جیبجی بکن.