پرۆسەیا عه‌ره‌بکرنا کەرکووکێ گه‌هشتیه ئاستەکە مەترسیدار و ب دەهان بەلگەیێن عه‌ره‌بکرنێ و ئینانا عه‌ره‌بێن باژارێن دن یێن ئراقێ بۆ ناڤەندا کەرکووکێ و دەردۆرا وێ هاتنە ئەشکەرەکرن.
هەولدانێن گوهەرتنا دەمۆگرافیا باژارێ کەرکووکێ پشتی 16ێ جۆتمەها 2017ێ گه‌هشتیه ئاستەکێ مەترسیدار و باندۆر ل سەر پاشەرۆژا باژێر کریە و بوویە مەترسی ل برینا کەرکووکێ ژ ناسنامەیا خوە یا کوردستانی. ئەڤ د دەمەکێ دا یە بریارە پرۆسەیا سەرژمێریا گشتی یا نفووس و خانیان د مژدارا بهێت دا بهێته کرن.
عه‌ره‌بکرنا کەرکووکێ د 7 سالێن دەستهلاتا راکان جبووری دا، ژ عه‌ره‌بکرنا رژێما بەرێ یا ئیراقێ زێدەتر هاتیە کرن
ل گۆری بەلگەیان، عه‌ره‌بکرنا کەرکووکێ د 7 سالێن بۆری دە د سەردەما دەستهلاتا راکان جبووری دا، ژ عه‌ره‌بکرنا رژێما بەرێ یا ئیراقێ زێدەتر هاتیە کرن، ڤەگوهەزتنا ناسنامەیان، فۆرمێن خوارنێ، پشتگریا خانیان، دامه‌زراندن و دابەشکرنا زەڤیان، رێ و رێبازێن هەری بەربەلاڤێن عه‌ره‌بکرنا کەرکووکێ نە.
بەرپرسێ ئۆفیسا کەرکووکێ یا دەستەیا ناڤچەیێن کوردستانی یێن دەرڤەیی ئیدارەیا هەرێما کوردستانێ کاروان کەمەرخان دبێژە، ژ 16ێ جۆتمەهێ ڤە عه‌ره‌بکرنا کەرکووکێ بەردەوامە، وەک میناک د هەفتەیا یەکەما پشتی بوویەرێن 16ێ جۆتمەهێ دا، مالباتێن عه‌ره‌ب ژ دەڤەرێن دن ئینان و ل کەرکووکێ بجهـ کرن. هەروه‌ها ناسنامە، فۆرمێن خوارنێ و کارتێن نشتەجهبوونێ بۆ وان هاتنە دان، کو ئەڤه ژی پر خەتەرناکە».
ئەڤ پلانا عه‌ره‌بکرنێ د دەمەکێ دا یە، بریارە ئیراق د مەها مژدارا ئیسال دا سەرژمێریا گشتی بكه‌ت، ژ بەر باندۆرا وێ ل سەر پاشەرۆژا کوردێن کەرکووکێ ژی، کورد ڤێ سەرژمێریێ رەد دکن.
ژ ئالیێ خوە ڤە، جیگرێ سەرۆکێ پارلامەنتۆیا ئیراقێ شاخەوان ئەبدوڵاهـ ژی راگهاند، د رەوشا نها دە ئەم ئەنجامێن سەرژمێریێ رەد دکه‌ین و ناس ناکه‌ین. نابیت سەرژمێری ل کەرکووکێ بهێته کرن، گەر بهێته خواستن کو پرۆسە ل کەرکووکێ بهێته کرن، دڤێت ل گۆری هن پیڤانان بهێته کرن. ژ بلی ڤان پیڤانان، ئەم ل کەرکووکێ دانپێدانێ ب سەرژمێرییان ناكه‌ین و وەکە سەرژمێریا 1977 و 1997ێ لێ بنێرن. مە گۆتیه عه‌ره‌ب و ترکمەنان، یان دڤێت سەرژمێری ل کەرکووکێ نه‌هێته کرن یان ژی ب میكانزما کو ئەم دخوازین بهێته کرن، ئەگەر ب ڤێ رێكێ نه‌بیت، ئه‌م دانپێدانێ پێ ناكه‌ین».
تەدبیرێن نشتەجهکرنا عه‌ره‌بێن هاوردە ل کەرکووک و ناڤچەیێن کوردستانی یێن دەرڤەیی ئیدارەیا هەرێما کوردستانێ و سەرژمێری، ل دژی مادەیا 140 یا دەستوورا ئراقێ یە.
ل گۆری بەلگە و ئاماران، ژ 16ێ جۆتمەهێ ڤە زێدەتری 100 هەزار مالباتێن عه‌ره‌ب ژ باژارێن دن ئیناینه کەرکووکێ، ب ڤێ پێنگاڤێ ژی عه‌ره‌بکرنا ڤی باژاری کەتیە قۆناغەکا مەترسیدار و د ڤێ رەوشێ دا ئه‌نجامدانا سەرژمێریێ دێ زیانێ گه‌هینیته کوردان.
