دو کەچ ژ ئالیێ چەتەیێن ب ناڤێ “جوانێن شۆرەشگەر” ڤە ھاتن رەڤاندن

تەڤگەرا جوانێن شۆرەشگەر یا سەر ب رێڤەبەریا خوەسەر 2 زارۆکێن کۆچبەرێن عەفرینی ژ گوندەکی باکورێ حەلەبێ رەڤاندن و مالباتا وان بانگا ڤەگەراندنا وان دکە.

رێخستنا مافێن مرۆڤان ل عەفرینێ بەلاڤ کر، کەچا کۆچبەرا عەفرینی، سیلڤانا ئەسەد رەشید یا 14 سالی رۆژا 1 خزیرانێ ژ ئالیێ رێخستنا تەڤگەرا جوانێن شۆرەشگەر ڤە ھاتیە رەڤاندن و ھەیا نھا ت زانیاری دەربارێ وێ تونە نە.

سیلڤانا ئەسەد رەشید سالا 2010 ژدایک بوویە، ژ گوندێ چەقماقێ بچووکێ یێ عەفرینێ یە و مالباتا وێ ژ دەما داگیرکرنا عەفرینێ د سالا 2018 دە، کۆچبەری گوندێ ئوم ئەل-حۆشێ ل باکورێ حەلەبێ بوویە.

رێخستنا مافێن مرۆڤان دا زانین ژی، کەچا کۆچبەرا عەفرینی، ئەلماز فەوزی گولین یا 13 سالی رۆژا 1 خزیرانێ ژ ئالیێ رێخستنا تەڤگەرا جوانێن شۆرەشگەر ڤە ھاتیە رەڤاندن.

ئاەماز فەوزی گولین سالا 2011 ژدایک بوویە، ژ گوندێ نسریێ یێ عەفرینێ یە و مالباتا وێ ژی ژ دەما داگیرکرنا عەفرینێ د سالا 2018 دە، کۆچبەری گوندێ ئوم ئەل-حۆشێ ل باکورێ ھەلەبێ بوویە.

مالباتا ھەر دو زارۆکان (سیلڤانا و ئەلماز) بانگ ل ھەموو رێخستنێن مرۆڤی، یاسایی و یێن مافێن زارۆکان دکن کو کەچێن وان ڤەگەرینن مالێ.

تەڤگەرا جوانێن شۆرەشگەر، رێخستنەک سەر ب رێڤەبەریا خوەسەر ڤەیە و ب مەبەستا بچەککرنا جوان و زارۆکان، گەلەک زارۆک و جوانێن کورد ل ھەرێمێن جودایێن رۆژئاڤایێ کوردستانێ رەڤاندنە.

تەڤی کو ھەسەدێ د خزیرانا 2019 دە ب نەتەوێن یەکگرتی رە پلانەک ژ بۆ بداویکرن و قەدەغەکرنا تەڤلیکرنا زارۆکان د ناڤا چەکاران دە ئیمزە کربوو. لێ ژ دەما کو پەیمان ھاتیە ئیمزەکرن ڤە، رەوشا رەڤاندنا زارۆکان بداوی نەبوویە.

ل گۆری راپۆرتەکا بەرێ یا سەکرەتەرێ گشتی یێ نەتەوێن یەکگرتی، ھەسەدێ ژ تیرمەھا 2020 و ھەتا تیرمەھا 2022 دە، 829 زارۆک بچەک کربوون.