چەکدارێن پەیەدێ ئەندامەکی کۆمیتەیا شێورمەندیێ یا پەیەکە-سێ ل قامشلۆ رەڤاند
پارتیا یەکیتیا کوردستانی – سووریە (پەیەکە-سێ) راگھاند، چەکدارێن پەیەدێ ئەندامەکی کۆمیتەیا شێورمەندیێ یێ وێ پارتیێ ل باژارێ قامشلۆ رەڤاند.
مەدیایا فەرمی یا پەیەکە-سێ راگھاند، چەکدارێن پەیەدێ ئیرۆ 15 خزیرانێ ب سەر مالا ئەندامێ کۆمیتەیا شێورمەندیێ یا پەیەکە-سێ فەتحی گەدۆ دە گرت و ئەو رەڤاند.
پەیەکە-سە کو پارتیەکا د ناڤا ئەنەکەسێ دەیە دیار کر ژی، فەتحی گەدۆ 60 سالییە و نەخوەشیا دلێ ھەیە.
رەڤاندنا فەتحی گەدۆ د دەمەکێ دە یە، ئەنجوومەنا نشتمانی یا کوردی ل سووریێ (ئەنەکەسێ) بەری دو رۆژان بەلاڤ کربوو، “ژ 31 ئادارا بۆری ڤە 15 کەس ژ ئالیێ چەکدارێن سەر ب پەیەدێ ڤە ھاتنە رەڤاندن کو پرانیا وان چالاکڤان و ئەندامێن ئەنەکسەێ و پارتیێن د ناڤا وێ دە نە.”
د بن دەستھەلاتا رێڤەبەریا خوەسەر، ب دەھان ئەندام و ئالیگرێن ئەنەکەسێ و پارتیێن د ناڤا وێ دە ھاتنە رەڤاندن و گرتن، ئۆفیس و بارەگەھێن وان ھاتنە شەوتاندن و چالاکیێن وان ھاتنە قەدەغەکرن. بەرپرسێن ئەنەکەسێ ژی پەیەدێ ژ بەر ڤان ھەموو بنپێکرنان بەرپرسیار دبینە.
تێ زانین کو د 19/12/2021ان دە ژی چەتەیێن ب ناڤێ “جوانێن شۆرەشگەر” کەچا فەتحی گەدۆ یا 16 سالی ب مەبەستا چەکدارکرنا وێ د ناڤا رەفێن یەپەگێ دە رەڤاندبوو.
