پارتیا كاركه‌ران 12 كه‌چ و خۆرتێن دن یێن هێژان د ته‌مه‌نا زارۆكتیێ ده ره‌ڤاندنه، وێنه‌یێن وان پارڤه‌كرن و ب ده‌ڤێ وان دبێژه كو ئه‌وان ژ بۆی رێبه‌رتیێ به‌رێ خوه دان چیا.
مه‌دیایا په‌كه‌كێ ئیرۆ رۆژا پێنجشه‌می 20/6/2024ان نووچه‌یا ته‌ڤلیبوونا 12 زارۆكێن كوردان ژ كه‌چ و خۆرتان ئینایه پێش و ل سه‌ر نڤیساندیه، ئه‌م ته‌ڤلی رێبه‌رتیێ ببن، ئەم ئێدی سانیەکێ ژی بێی رێبەرتی ژیانێ قەبوول ناکن و دێ قەبوول نەکن!
پارتیا كاركه‌ران، ژ بۆی چێكرنا شه‌رڤانان پشتبه‌ستنێ ل سه‌ر خاپاندن و ره‌ڤاندنا زارۆكێن كوردان ژ هه‌ر چار په‌رچه‌یێن كوردستانێ ب تایبەت رۆژئاڤا کوردستانێ دكه، ئه‌ڤ یێك ژ هێلا رێخستنێن ناڤده‌وله‌تی و رێخستنێن پاراستنا مافێن زارۆكان ته‌سپیبت كریه، ئه‌ڤ پارتی كو مرۆڤ دكاره ناڤێ پارتیا زارۆككوژان لێ بكه، زارۆكێن كوردان د ره‌ڤینه و ب ده‌ستێ ئارتێشتا ده‌وله‌تا داگیركه‌ر دده كوشتن و پشتره تێ و دبێژه ئه‌و فه‌دایێ رێبه‌ر بن!.
د نووچه‌یا ئیرۆ یا مه‌دیایا په‌كه‌كێ ئانفێ ده، وێنه‌یێن 12 كه‌چ و خۆرتێن دن یێن زارۆك كو ته‌مه‌نا وان د نێڤبه‌را 12 بۆ 14 سالیێ ده یه، پارڤه‌كریه و گۆتی یه كو ئه‌و ل په‌ی شۆپا ئاپۆ و فه‌لسه‌فا ئاپۆ هاتنه، په‌كه‌كێ داخویانیه‌كی ب وان دایه گۆتن و تێ ده ل سه‌ر ده‌ڤێ وان زارۆكێن به‌له‌نگاز گۆتیه كو ئاپۆ و په‌كه‌كه عه‌شق و ئیراده‌یا وانه و ئه‌وێ ئێدی سانیەکێ ژی بێی رێبەرتی ژیانێ قەبوول ناکن و دێ قەبوول نەکن.
د نها دە پەکەکە پرانیا زارۆکان ب رێیا رێخستنا «جوانێن شۆرەشگەر» یا کو ل رۆژئاڤا کوردستانێ د بن سەیوانا پەیەدێ دە خەباتێ دکە دخاپینە، درەڤینە و تەڤلی ناڤا رەفێن خوە دکە، پشترە د چاپەمەنیا خوە دە وسا بەرچاڤ دکە کو ئەڤ زارۆک ب بریارا خوە و ل پەی شۆپا ئۆجالان هاتنە و تەڤلی ناڤا رەفێن وان بوونە، لێ یا راست ئەڤ زارۆک ب ئاخافتنێن جور بە جور تێن خاپاندن و پشترە دبن قوربانیێن بەرژەوەندیێن پەکەکێ.
پەکەکە ب پارڤەکرنا وێنەیێن کەچێن جوان و بەدەو دخوازە روویێ خوە یێ تاری ڤەشیرە و ب ڤێ رێیێ گەلێ کورد ب گشتی و ب تایبەتی جوانان بخاپینە، پەکەکە د چاپەمەنیا خوە دە ب نیشاندانا دیمەنێن جوان ژ کەزی و بسکێن کەچێن کورد هەول ددە جوانان بخاپینە و وان تەڤلی ناڤا رەفێن خوە بکە، لێ بەلێ د نها دە روویێ رەشێ پەکەکێ ژ هەر کەسی رە ئەشکەرە بوویە و هەژمارەک هەری کێم یا جوانان یان ب خاپاندن تەڤلی پەکەکێ دبن، یان ژی ب رێیا رەڤاندنێ و ب دارێ زۆرێ دهێن چەکدارکرن.
