دەزگەھەکە راگھاندنێ یا سووری ئەشکەرە کر کو ھێزێن سووریا دەمۆکراتیک دەست ب هناردەکرنا یەکەم بەشێ گەنم کو ژ جۆتکارێن رۆژئاڤا کوردستانێ و دەڤەرێن دن یێن د بن دەستێ وێ دە کریە بۆ ناڤەندێن وەرگرتنا گەنمێن رەژیمێ ل باشوورێ باژارێ قامشلۆ کر.
تەلەڤیزیۆنا سووریێ گۆت کو، د 24 دەمژمێرێن بۆری دە، ھێزێن سووریا دەمۆکراتیک نێزیکی 100 ترومبێلێن بارهەلگر ژ خالەکا پشکنینێ یا ھێزێن رێژیمێ ل گوندەوارێ ئەل-دەمخیێ دەرباسی ھەرێمێن د بن کۆنترۆلا رێژیمێ دە ل باشوورێ باژارێ قامشلۆ کرن.
ل گۆر ژێدەرێن مەدیایی، کەمیۆنان زێدەتر ژ “2500 تۆن” گەنم ژ ناڤەندا وەرگرتنا گەنم ل گوندێ قەسراک ل باکورێ باژارێ حەسەکێ، بۆ ناڤەندێن وەرگرتنا گەنمێن رێژیمێ ل گوندەوارێ قامشلۆ بار کرن.
چاڤکانیێ ئاماژە ب وێ یەکێ ژی کر، کو کاروانەکێ کامیۆنێن بارکری ب گەنم، لگەل دەوریەیەکا ھێزێن سووریا دەمۆکراتیک، دەرباسی خالا پشکنینێ یا ھێزێن ئاساییشێ یا گرێ سپی ل سەر رێیا ناڤدەولەتی (M4) ل باکورێ حەسەکێ بوون، و گھشتن ھەرێمێن د بن کۆنترۆلا رەژیمێ دە ل باشوورێ باژارێ قامشلۆ.
ژێدەرێ مەدیایی تەکەز کر کو گەنم د ناڤ جەوالان دە ل کامیۆنان هاتبوو بارکرن، ئەڤ ژی ژ بەر نەبوونا ناڤەندێن پاراستنا گەنم (سایلۆ) ل جەم رێژیما سووریێ.
ل گۆری مالپەرا تەلەفزیۆنا سووریێ، د مەھا گولانا بۆری دە ھەڤدیتنێن بەرفرەھ د ناڤبەرا بەرپرسێن دارایی یێن رێڤەبەریا پەیەدێ یێن سەر ب پەکەکێ و بەرپرسێن رەژیمێ دە ھاتن ئەنجامدان، کو د ئەنجامێ دە لھەڤکرنەک هات ئیمزە کرن کو 500.000 تۆن گەنم ب نرخێ 36 سەنتێن ئامەریکی ژ رەژیمێ رە بێ شاندن.
چاڤکانیا مەدیایی ئاماژە ب وێ یەکێ ژی کر، کو پشترە کادرۆیێن پەکەکێ بەرپرسێن رێڤەبەریا پەیەدێ یا د ئەنجوومەنا جیبجیکار و ئەنجومەنا ئابۆری و چاندنیێ دە ئاگاھدار کرن کو ب بەھانەیا نەبوونا بوودجەیا دارایی و تژیبوونا سایلۆیان ب گەنمێ سالا دەرباسبوویی ئەو گەنمێ جۆتکاران ب نرخێ زێدەتر ژ 32 سەنتێن ئامەریکی ناکرن.
رێڤەبەریا پەیەدێ نرخێ کرینا گەنم ژ جۆتکاران ب 31 سەنتێن ئامەریکی ژ بۆی ھەر کیلۆیەکێ دیار کریە، و نرخێ نوو ژ سالا بۆری کێمترە، کو سالا بۆری 43 سەنتێن ئامەریکی بۆ هەر کیلۆیەک گەنم هاتبوو دیارکرن، ئەڤ د دەمەکی دە یە کو رەژیمێ نرخێ کرینا گەنم بۆ هەر کیلۆیەکی 36 سەنتێن ئامەریکی دیار کربوو.
