ناڤەندا رەوشەنبیری و جڤاکی یا لالەشێ دبێژە، سەد سالن چەند ئالی ھەول ددن ئێزدیان وەکە بەشەکێ رەسەن یێ گەلێ کورد، ژ کۆکا وێ یا دیرۆکی ڤەقەتینن.
ناڤەندا چاند و جڤاکی یا لالەشێ دوھی 22/6/2024 داخویانیەک بەلاڤ کر و تێ دە گۆت: ژ دەما دامەزراندنا دەولەتا ئیراقێ ڤە، ب تایبەتی ژ سالێن شێستی یێن سەدسالا بۆری ڤە، چەند ئالیان ب ئارمانجێن پێشوەخت ھەول دانە کو ئێزدیان وەکە بەشەکێ رەسەن یێ گەلێ کورد، ژ کۆکا وێ یا دیرۆکی ڤەقەتینن.
تەکەز کر ژی: “ئۆلا ئێزدیاتیێ یا کەڤنار، یەک ژ وان ئۆلانە کو کورد پێ باوەرن و تەڤی ھەموو کارەسات، نەحەقی، زولم و قرکرنێن کو ژ دەستپێکا دیرۆکێ ڤە رووبروو وان بوونە، لێ ناسنامەیا خوە یا ئەتنیکی و بەرماھیێن مەعنەوی پاراستیە و ھەموو مەتنێن پیرۆز یێن ئۆلێ ب کوردی تێن خوەندن و ئایینێن وێ ژی مینا یێن ھەر ئۆلەکا دن یێن کوردستانێ، تێن جێبەجێکرن.
ناڤەندا چاند و جڤاکی یا لالەشێ ددە زانین، کوردستان وەلاتێ یەکەمێ ئێزدیانە و پەرەستگەھا لالەشی د دلێ کوردستانێ دەیە. ئێزدی لگەل برایێن خوە یێن ژ ئۆلێن دن یێن کوردستانێ دیرۆک، ئەردنیگاری و زمانەکی وان یێ ھەڤپار ھەیە.
ھەروھا دبێژە: “ئەم وەک ناڤەندا چاندی و جڤاکی یا لالەشێ د وێ باوەریێ دە نە کو ژ بۆ ناسکرنا جینۆسایدا ئێزدیان ژ ئالیێ دادگەھا تاوانان یا ناڤدەولەتی ڤە، ژ بۆ پێکانینا دادپەروەری و سزاکرنا تاوانباران، قەرەبووکرنا قوربانیان و ژنووڤەئاڤاکرنا دەڤەرێن مە ب تایبەت شەنگالێ، ئاساییبوونا رەوشا باژێر دوور ژ ھەر کێشەیەکا سیاسی و چەکداری کار دکن. ئەڤ ژ ژ کارێن پێشینە نە کو دڤێت ھەر کەس ل سەر بخەبتە و خوە دووری مژارێن کو برینێن ئێزدیان کوورتر بکە، بخە.”
ناڤەندا رەوشەنبیری و جڤاکی یا لالەش بانگ ل ھەموو ئالیێن ئێزدیان دکە کو ب رێ و رێبازێن خوەیێن سیاسی و رەوشەنبیری، رێزێن خوە بکن یەک و زمانێ دیالۆگا براتییێ ئاڤاکەر ژ بۆ گۆتووبێژکرنا ھەموو مژارێن گرێدایی جڤاکا خوە و خورتکرنا پێوەندیێ براتی و خوەشەویستی لگەل ھەموو پێکھاتەیێن کوردستانی و ئیراقی بپەژرینن.
ناڤەندا رەوشەنبیری و جڤاکی یا لالەش د داویا داخویانیا خوە دە گۆت: “ئەم بانگ ل حکوومەتا فەدەرال و حکوومەتا ھەرێما کوردستانێ دکن کو ھەموو مافێن رەوایێن پێکھاتەیا ئێزیدی گارانتی بکن و وان ل گۆری پرەنسیبێن دادپەروەریا جڤاکی بەشداری د برێڤەبرنا ئالیێن جودایێن دەولەتێ دە بکن و د ماف و ئەرکان دە جوداکاریێ د ناڤبەرا پێکھاتەیان دە نەکن.
ئەنجوومەنا رووحانی یا ئێزدیان ژی رۆژا 8/6/2024 دەربارێ ھەولێن چەند ئالیان ب رێیا پارلامەنتۆیا ئیراقێ، ژ بۆ گوھەرتنا ناسنامەیا ئێزیدیان ژ کوردی بۆ نەتەوەیەکا سەربخوە، داخویانیەک وەشاند.
د داخویانیێ دە ھات تەکەزکرن: “ئەنجوومەنا رووحانی یا ئێزدیان ب توندی ھەر ھەولەک ژ بۆ گوھەرتنا ناسنامەیا ئێزدیان ژ کوردی بۆ ھەر نەتەوەیەکا دن و دەستکاریکرنا ل ڤێ ناسنامەیێ رەد دکە. ئێزدی بەشەکێ بنگەھین یێ گەلێ کوردن و رھێن وان یێن دیرۆکی و چاندی ب کووراھی د خاکا کورد دە چەسپاندی نە.”
ئەنجوومەنا رووحانی دا زانین، “ئێزدیتی ئۆلەکا کەڤنارە کو دیرۆکا وێ ب ھەزاران سالانە و بەشەک ژ میراسا کەڤنارا گەلێ کوردە. ئێزدی ب زمانێ کوردی دئاخڤن، عادەتێن وان ل گۆری چاندا گشتی یا کوردییە. ئێزدیان تەڤی دژواری و چەوساندنێن کو روو ب روو وان بوونە، ب سەدسالان ناسنامەیا خوەیا ئۆلی و نەتەوی پاراستنە.”
ئەنجوومەنا رووحانی یا ئێزدیان تەکەزی ل سەر وێ یەکێ دکە کو پێویستە رێز ل ناسنامەیا کوردێن ئێزیدی بێ گرتن و ھەولا گوھەرتن و سەختەکرنێ نەیێن دایین. د بەردەوامیا داخویانیێ دە ھات گۆتن ژی: “پاراستنا ڤێ ناسنامەیێ مافەکی خوەزایی و ئەرکەکی پیرۆزە و بەشەکێ بنگەھین یێ پاراستنا میراتەیێن چاندی و ئۆلی یێن گەلێ ئێزدی و گەلێ کورد ب گشتییە.”
