ھەڤسەرۆکێ پەیەدێ رادگھینە، رێڤەبەریا خوەسەر رژدە کو ھلبژارتنێن شارەداریان د مەھا تەباخا ئیسال دە بکە، لێ ئامەریکا نە لگەل ئەنجامدانا ھلبژارتنان د ڤێ دەمێ دە یە.
ھەڤسەرۆکێ پارتیا یەکیتیا دەمۆکراتیک (پەیەدێ) سالح موسلم د ھەڤپەیڤینەکێ لگەل رۆژنامەیا “شەرق ئەل-ئەوسەت” دە گۆت: “ھلبژارتن دەستپێکێ ھاتبوون پلانکرن د 30 گولانێ دە، لێ ژ بەر کێماسیێن لۆجیستیکی یێن کۆمیسیۆنا بلندا ھلبژارتنان، ژ بۆ 11 خزیرانا 2024 ھاتن پاشخستن. لێ جارەکا دن ل سەر داخوازا ھندەک پارتیان، بۆ مەھا تەباخێ ھاتن پاشخستن.”
موسلم گۆت ژی: “سەدەمێن پاشخستنا ھلبژارتنان، نە ژ بەر ئیدیعایێن گرێدایی ھەبوونا زەختێن ئامەریکایێ و زێدەبوونا گەفێن ترکیێ بوون. ئەڤ یەک دھات پێشبینیکرن کو ئالیێن دژبەر (ترکیێ) دێ ل دژی ھەر پێنگاڤەکێ ژ بۆ برکخستنا کاروبارێن ھەرێمێن مە دەرکەڤە.”
تەکەز کر ژی: “ئەم دێ ڤان ھلبژارتنان بکن و بریار ڤەدگەرە ئالیێن بەشدار د کۆمسیۆنا بلند و ئالیێن سیاسی دە. پاشخستن ژی ژ بۆ نەھشتنا کێماسیێن کو پێشتر ھەبوون بوو. لێ دڤێت ئەڤ ھلبژارتن د رۆژا دیارکری دە بێن کرن.”
ل سەر ھەلوەستا ئامەریکایێ دەربارێ ڤان ھلبژارنان دە، موسلم گۆت: ئامەریکا ژ مە رە گۆتن “ئەم دبینن کو ھوون د ڤێ گاڤێ دە لەز دکن.”
ل سەر گەفێن ترکییێ ژی، موسلم گۆت: “گەفێن ترکییێ نە ژ بەر ھلبژارتنانە، ئەڤ 8 سالن، واتە ژ سالا 2016 ڤە ھەنە و ترکیە پێویستیا وێ ب بەهانەیان نینە، ژ بەر کو ھەبوونا ھەموو پێکھاتەیێن سووریەیێ دکە ئارمانج، ھەر پرۆژەیەکی دەمۆکراتیک دکە ئارمانج و چ بخوازە دکە. ئێریشی ھەرێمێن مە دکە، عەفرین، سەرێ کانیێ و گرێ سپی ژی داگیر کرن. ترکیە ئەڤ 8 سالن ھەبوونا کوردان دکە ئارمانج و چارەسەریا سوورییێ ئاستەنگ دکە و د جیبجیکرنا بریارا ناڤدەولەتی یا 2254 دە بوویە ئاستەنگەکە مەزن.”
