حەشارگەهەکە داعشێ ل بلنداهیێن حەمرینی هات ئارمانجکرن

د ئۆپەراسیۆنەکە ئاسمانی دە ل سەر حەشارگەهەکە داعشێ ل بلنداهیێن چیایێ حەمرینی، 3 تەرۆریستێن رێکخستنا داعشێ هاتن کوشتن.

فەرماندەیا ئۆپەراسیۆنێن هەڤپار ل ئیراقێ راگەهاند، پشتی چاڤدێریەکە هوور ژ ئالیێ شانەیا ئارمانجکرنێ یا گرێدایی فەرماندەیا وان، ئیرۆ (یەکشەم، 23.06.2024) د ئۆپەراسیۆنەکە ئاسمانی دە ب بالافرا ئێف – 16 حەشارگەهەکە داعشێ ل بلنداهیێن چیایێ حەمرینی ل سنۆرێ پارێزگەها دیالایێ وێران کر.

فەرماندەیا ئۆپەراسیۆنێن هەڤپار ئاماژە ژی دا، د ڤەرێژا وێ ئێریشێ دە سێ چەکدارێن داعشێ ل ناڤ وێ حەشارگەهێ هاتن کوشتن.

ل دووڤ وێ راگەهاندنێ، هەر د وێ ئۆپەراسیۆنێ دە هەژمارەکە شکەفت، عەمبار و حەشارگەهێن دن ژی یێن داعشێ ل وی سنۆری هاتن وێرانکرن.

ئەڤ ژی د دەمەکێ دەیە کو شەڤێدی (شەمی، 22.06.2024) د ئۆپەراسیۆنەکە هەڤپارا فەرماندەیا ئۆپەراسیۆنێن هەڤپار و دژەتەرۆرێ دە، ئێریشی سەر دو حەشارگەهێن داعشێ ل دۆزخۆرماتوو ژی هات کرن و ل دووڤ زانیاریێن دەستپێکێ حەفت ئەندامێن داعشێ هاتنە کوشتن.