پارتیا كاركه‌ران مه‌شه‌ك ل سنوونێ یا ناڤچه‌یا شه‌نگالێ ب ئێزدیێن وێ ده‌رێ لدارخست و داخوازا راكرنا ته‌جریدا ده‌ره‌و یا ل سه‌ر ئاپۆ ب ژنێن كو ته‌ڤلی مه‌شێ بوون دا گۆتن.
رێڤه‌به‌رییا خوه‌سه‌ر یا شه‌نگالێ كو به‌شه‌كی په‌كه‌كێ یه دوهـ رۆژا یه‌كشه‌می 23/6/2024ێ مه‌شه‌ك ل سنوونێ ئۆرگانیزه كر، ب ده‌هان ژن و جوانێن ئێزدی ته‌ڤلی كرن، په‌كه‌كێ ل سه‌ر زمانێ وان ژ ده‌وله‌تا ترك خوه‌ست ته‌جریدا ل سه‌ر رێبه‌رێ په‌كه‌كێ عه‌بدوللا ئۆجالان بێ راكرن.
د به‌شه‌كا به‌یانا په‌كه‌كێ ده یا كو ژ هێلا ژنێن ئێزدی ڤه هاتیه خوه‌ندن ئه‌ڤ هاتیه گۆتن:
«ئەم وەکە جڤاکا ئێزدی و ژنێن ئێزدی دەیندارێن رێبەر ئاپۆنە. ئەم ژ بۆ ئازادیا وی چ بکن ژی، نە پۆشمانن. ئەڤ فکرێ وی یێ ئازاد وێ تجاری نەیێ هەپسکرن و وێ هەر بەلاڤ ببە».
ژنێن ب ته‌مه‌ن یێن ئێزدی كو پرانی ژێ رێڤه‌به‌رییا خوه‌سه‌را شه‌نگالێ ب دارێ زۆرێ ته‌ڤلی مه‌شێ كرن نه ئاپۆ ناس دكن و نه‌ژی دزانن ته‌جریده‌ك ل سه‌ر هه‌یه یان نا، په‌كه‌كێ ب رییا سازیێن وه‌كه رێڤه‌به‌رییا خوه‌سه‌ر و رێخستنێن خوه یێن ل شه‌نگالێ تشتا كو دخوازه ب گوهێ ئێزدییان ده دبێژه و ب وان دده باوه‌ر كرن، یا راست ئێزدیێن ل وێ ده‌رێ بوونه دیلێن ده‌ستێ په‌كه‌كێ، په‌كه‌كه یا جڤاكا ئێزدی به‌ر ب په‌رستنا ئاپۆ ڤه كێش دكه.
ئاواره‌یێن شه‌نگالێ ژ ترسا په‌كه‌كێ ڤه‌ناگه‌رن
مه‌دیایا په‌كه‌كێ ووسا ئه‌ڤ نووچه ئینایه پێش كو مه‌شه‌ك گرسه‌یی ل سنوونێ ب داخوازا جڤاكا ئێزدی پێكهاتیه، لێ یا راست رێڤه‌به‌رییا خوه‌سه‌ر شه‌نگالێ هه‌ژماره‌كه ژنێن ب ته‌مه‌ن و جوانێن ئێزدی برنه سه‌ر جادێ و وێنه‌یێن ئۆجالان خستنه د ده‌ستێ وان ده و ئازادییا فیزیكی یا رێبه‌رێ خوه ب ده‌ڤێ وان به‌له‌نگازان ڤه‌دبێژه.
ژ پاش فه‌رمانا داعشێ و هه‌یا رۆژا مه یا ئیرۆ ده‌هان هه‌زار ئێزدی د كامپێن پارێزگه‌ها دهۆكێ ده مانه و ب سه‌ده‌ما داگیركرنا په‌كه‌كێ بۆ شه‌نگالێ ئه‌و نكارن ڤه‌گه‌رن وارێ خوه، ئاواره‌یێن شه‌نگالێ ژ ترسا په‌كه‌كێ ژیانا د كامپان ده هلبژارتنه، ترسا وان ژ په‌كه‌كێ یه كو زارۆیێن وان ب دارێ زۆرێ ته‌ڤلی رێخستنێن خوه بكه و وان ژی وه‌كه ئێزدیێن نها ل شه‌نگالێ وه‌كه مه‌تریاله‌ك ژبۆ ئه‌جێندایێن خوه ب كار بینه.
حكومه‌تا فه‌ده‌رال: په‌كه‌كه د شه‌نگالێ ده نینه!!
حكوومه‌تا فه‌ده‌رال یا ئیراقێ بریار گرتیه كو ل داوییا تیرمه‌ها ئیسال 2024ێ ته‌ڤ كامپێن ئاواره‌یان یێن ل هه‌رێما كوردستانێ داخه و ئێزدییان ب دارێ زۆرێ ڤه‌گه‌رینه شه‌نگالێ، حكوومه‌تا فه‌ده‌رال دبێژه په‌كه‌كه د شه‌نگالێ ده نینه، مه‌شا ئیرۆ و ب باكه‌تنا وێنه‌یێن ئۆجالان و ئالایێن رێخستنێ د جاده و كۆلانێن شه‌نگال و سنوونێ ده، به‌لگه‌یه‌ك بێ گۆمانه كو په‌كه‌كه د شه‌نگالێ ده یه و سته‌ما وێ ل سه‌ر جڤاكا ئێزدی پرسه‌كه بێ داوی یه.
