هەڤسەرۆکێ دەم پارتیێ تونجەر باکرهان راگهاند، سەرۆکۆمارێ ترکیەیێ هەتا نها دەربارێ شەواتا مێردینێ دە ت داخویانی نەدایە. دەما مالا کورد دشەوتە، دەما ئاگر ب مالا کورد دکەڤە هەموو ئالیێن دن کۆر و کەڕ دبن.
کارڤەدانێن شەواتا دیاربەکر و مێردینێ ددۆمن. هەڤسەرۆکێ دەم پارتیێ تونجەر باکرهان، ل پارلامەنتۆیا ترکیێ د جڤینا فراکسیۆنا پارتیا خوە دە راگهاند، سیاسەتا دەستهلاتا ترکیێ ل باکورێ کوردستانێ جودا، ل ترکیێ جودایە، فرۆکە و هەلیکۆپتەرێن ڤەمراندنا ئاگر ل رۆژئاڤایێ ترکیێ نە، لێ فرۆکە، هەلیکۆپتەر و درۆنێن شەر ل باکورێ کوردستانێ نە.
هەڤسەرۆکێ دەم پارتیێ تونجەر باکرهان د جڤینا فراکسیۆن پارتیا خوە دە گۆت: «کارەساتەکە مەزن هاتە سەرێ مە. مە لێکۆلین کرن. تاکە بەرپرس هەیە کو کۆمپانیا ئەلەکتریکێ و ل سەر سەرێ خەلکێ ناڤچەیێ بوویە بەلا. پێنجی سالن تو نووژەنکرن و خزمەتگوزاری نینە، تەنێ گەلێ کورد سزا ددە. وەک قەیومانە».
بەکرهان گۆت ژی «دەما مالا کورد بشەوتە، ئەم دبینن دەستهلات کۆر و کەڕە. 10 هەلیکۆپتەرێن شەڤێ کرینە، لێ ئەڤ هەلیکۆپتەر ل کوردستانێ نینن. ل ناڤچەیێ درۆن هەنە، ئێف-16 هەنە، هەلیکۆپتەرێن شەر هەنە. بۆ زلمێ و تونەکرنێ هەنە، ئەم دیسا دبێژن دڤێ دەڤەرێ شەواتێ وەک هەرێما ئافاتێ وەرە راگهاندن و زیانێن وەلاتیان وەرە قەرەبووکرن.»
دەزگەها ڤەمراندنا ئاگر یا شارەداریا دیاربەکرێ دا خویاکرن، شەوات ژ بەر هێلێن ئەلەکتریکێ کو نەهاتنە نووژەنکرن دەرکەتیە. ل گۆر لێکۆلینان، زیانێن شەواتێ هەری کێم 700 ملیۆن لیرەیە و ئەگەر کۆمپانیا ئەلەکتریکێ دەداش بەرپرس وەرە دیتن، دڤێ هەموو زیانان قەرەبوو بکە.
