ژڤانێ نوویێ هلبژارتنێن پەرلەمانا کوردستانێ هات دیارکرن
سەرۆکێ هەرێما کوردستانێ رۆژا 20 ئۆكتۆبه‌را ئیسال 2024ێ وەکی ژڤانێ نوویێ هلبژارتنێن گشتی ژ بۆ گەرا شەشێ یا پەرلەمانا کوردستانێ دیار کر.
بەردەڤکێ سەرۆکاتیا هەرێما کوردستانێ دلشاد شەهاب ئیرۆ (چارشەم، 26.06.2024) د کۆنفەرانسەکە رۆژنامەڤانی دە راگەهاند، سەرۆکێ هەرێما کوردستانێ نێچیرڤان بارزانی بریار ل سەر دەرخستنا فەرمانا هەرێمی یا هەژمار 222 یا سالا 2024ێ دا، کو تێ دە هاتیە: ل دووڤ بەندا دویێ، مادەیا دەهێ، ژ قانوونا سەرۆکاتیا هەرێما کوردستانێ، هەژمار یەکا 2005ێ یا راستڤه‌كری، مە بریار ل سەر ڤان خالان دا:
دیارکرنا رۆژا 20.10.2024ێ وەکی ژڤانێ برێڤەچوونا هلبژارتنێن گشتی ژ بۆ گەرا شەشێ یا پەرلەمانا کوردستانا ئیراقێ.
تەڤایا ئالیێن پەیوەندیدار ب بجهانینا کارێن پێدڤی ژ بۆ ئالیکاری و هەڤاهەنگیێ ب کۆمسیۆنا بلندا هلبژارتنان یا ئیراقێ رە ژ بۆ بجهانینا ڤێ فەرمانێ پابەند دبن.
ئەڤ فەرمان ژ رۆژا دەرکەفتنا وێ تێ بجهانین و ل رۆژنامەیا فەرمی تێ بەلاڤکرن.
بەردەڤکێ سەرۆکاتیا هەرێما کوردستانێ تەکەز ژی کر، «ژڤانێ نوویێ هلبژارتنێن پەرلەمانا کوردستانێ پشتی هەلسەنگاندنەکە تەماما پێدڤیتیێن هلبژارتنان و دانووستاندنێن ب ئالیێن پەیوەندیدار رە و گوهداریکرنا دیتن و نەرینان هاتیە دیارکرن».
تەڤی کو سەرۆکێ هەرێما کوردستانێ نێچیرڤان بارزانی رۆژا 10.06.2024ێ وەکی ژڤانێ برێڤەچوونا هلبژارتنێن گەرا شەشێ یا پەرلەمانا کوردستانێ دیار کربوو، لێ ژ بەر تەڤلینەبوونا په‌ده‌كێ و پێکهاته‌یان ژ بەر بریارا دادگەها فەدەرالی ژ بۆ هلوەشاندنا 11 کورسیێن کوتایێ یێن پەرلەمانا کوردستانێ و «دەستتێوەردانێن دەرڤە و بەرهەڤکرنا دیزاینا پێشوەخت ژ بۆ هلبژارتنان»، هلبژارتن د وێ دەمێ دە نەهاتن کرن.
