پەدەکە دەست ب ئامادەکاریێن خوە ژ بۆ پرۆسەیا ھلبژارتنێن پەرلەمانا کوردستانێ دکە و دبێژە، “ئەم ھێڤیدارن کو ھلبژارتن ب ئاوایێ دەمۆکراسی و پاکژ و زەلال بێن کرن، کو ئەنجامێ وێ د بەرژەوەندیا خەلکێ کوردستانێ دە بە.”
بەردەڤکێ پەدەکەیێ مەحموود محەمەد ئیرۆ (چارشەمبێ، 26/6/2024) ل سەر دیارکرنا ژڤانێ نوویێ پرۆسەیا ھلبژارتنێن گەرا شەشێ یا پەرلەمانێ کوردستانێ ژ ئالیێ سەرۆکێ ھەرێما کوردستانێ نێچیرڤان بارزانی ڤە راگەھاندنەک پارڤە کر.
مەحموود محەمەد ئاماژە ژی دا، “پشتی دیارکرنا ژڤانێ نوویێ ھلبژارتنێن گەرا شەشێ یا پەرلەمانێ کوردستانێ ژ ئالیێ سەرۆکێ ھەرێما کوردستانێ نێچیرڤان بارزانی ڤە، پارتیا مە ژ بۆ پرۆسەیا ھلبژارتنێن پەرلەمانێ کوردستانێ دەست ب ئامادەکاریان دکە. ئەم ھێڤیدارن کو ھلبژارتن ب ئاوایێ دەمۆکراسی و پاکژ و زەلال بێن کرن، کو ئەنجامێ وێ د بەرژەوەندیا خەلکێ کوردستانێ دە بە.”
ناڤبری ھەروەسا گۆت، “پشتی کو د دەما بۆری دە پەدەکەیێ ھەلوەستا خوە ژ بۆ تەڤلینەبوونا د ھلبژارتنان دە راگەھاند، نھا پارەکە کێماسیێن گرێدایی رێکارێن ھلبژارتنان ھاتیە چارەکرن و پارەکە دن د چارەکرنێ دەیە و پارەکە مافێن ھەرێما کوردستانێ ھاتیە ڤەگەراندن، لەوما پەدەکە تەڤلی پرۆسەیا ھلبژارتنێن پەرلەمانا کوردستانێ دبە.”
د وێ راگەھاندنێ دە ھاتیە، “پارتیا مە ل سالا 2022 گەلەک بزاڤ کر کو بەری تەمامبوونا ژڤانێ قانوونی یێ پەرلەمانا کوردستانێ رێکارێن پێدڤی ژ بۆ پرۆسەیا ھلبژارتنێن گەرا شەشێ یا پەرلەمانێ کوردستانێ بێن دەستپێکرن، لێ مخابن گەلەک ئاستەنگ ھاتن چێکرن، کو ئەو ئاستەنگ وەکی زرارێن پرۆسەیا سیاسی و قانوونی ژ بۆ ھەرێما کوردستانێ ڤەگەریان و رەنگڤەدانەکە خراب ل بەرانبەری دەستھلاتێ و مافێن ھەرێما کوردستانێ ل دوو خوە ئانی. پشتی وێ یەکێ ژی مە بزاڤ کر وان پێشنیارێن کو ھەبوون ژ بۆ پەرلەمانێ ھلبژارتی بھێلن، ژ بۆ چارەکرنا وان ب ئاوایەکی قانوونی کو رێ ل ڤێ یەکێ ژی ھات گرتن.”
بەردەڤکێ سەرۆکاتیا ھەرێما کوردستانێ دلشاد شەھاب ئیرۆ (چارشەم، 26/6/2024) د کۆنفەرانسەکا رۆژنامەڤانی دە راگەھاند، سەرۆکێ ھەرێما کوردستانێ نێچیرڤان بارزانی ل دوو بەندا دویێ، ژ مادەیا دەھێ، ژ قانوونا سەرۆکاتیا ھەرێما کوردستانێ، ھەژمار یەکا 2005 یا راستڤەکری، بریار ل سەر دەرخستنا فەرمانا ھەرێمی یا ھەژمار 222 یا سالا 2024 دا، کو دیارکرنا رۆژا 20/10/2024 یا وەکی ژڤانێ برێڤەچوونا ھلبژارتنێن گشتی ژ بۆ گەرا شەشێ یا پەرلەمانێ کوردستانا ئیراقێ.
ھەر ل دوو وێ فەرمانا سەرۆکێ ھەرێما کوردستانێ، تەڤایا ئالیێن پەیوەندیدار ب بجھانینا کارێن پێدڤی ژ بۆ ئالیکاری و ھەڤاھەنگیێ ب کۆمسیۆنا بلندا ھلبژارتنان یا ئیراقێ رە ژ بۆ بجھانینا ڤێ فەرمانێ پابەند دبن.
ھەر ئیرۆ بەردەڤکێ حکوومەتا ھەرێما کوردستانێ پێشەوا ھەورامانی ژی د دەربارێ دەستنیشانکرنا رۆژا ھلبژارتنێن پەرلەمانێ کوردستانێ دە راگەھاند، “جڤاتا وەزیرێن ھەرێما کوردستانێ ب پرانیا دەنگان پێشوازیا ژڤانێ دیارکری یێ ھلبژارتنێن پەرلەمانێ کوردستانێ دکە، کو ژ ئالیێ سەرۆکێ ھەرێما کوردستانێ ڤە ھاتیە دیارکرن.”
