پارتییا وەلاتپارێزێن کوردستانێ (PWK) ل دیاربەکرێ، رێبەرێ نەتەوەیی یێ ملەتێ کورد شێخ سەعید و ھەڤالێن وی ببیر ئانین.
ل گۆری داخویانیەکا نڤێسینگەها راگەھاندنێ یا پارتییا وەلاتپارێزێن کوردستانێ، “رێخستنا ئامەدێ یا پارتییا وەلاتپارێزێن کوردستانێ (PWK) ب مناسەبەتا سالڤەگەرا 99ێ یا دارڤە کرنا شێخ سەعید و ھەڤالێن وی، ل ئامەدێ، سەمینەرەکا ببیرئانینێ ل دار خست.
بەردەڤکێ PWK ھانیفی تووران سمینار ب رێڤەبر. ئاخاڤفتنڤانێن سمینارێ لێکۆلینەرێ کورد کەرەم سەرحەدی و جێگرێ سەرۆکێ گشتی یێ PWK محەمەد جان ئازبای بوون.
د دەستپێکا سەمینەرێ دە ژ بۆ شەھیدێن کوردستانێ رێز ھاتە گرتن.
رێڤەبەرێ سەمینەرێ ھانیفی تووران، د دەربارێ ناڤەرۆکا سەمینەرێ، شەخسییەتا شێخ سەعید ئەفەندی یا نەتەوەیی و گرینگییا تەڤگەرا 1925 یا کوردان دە ئاخافتنەک کر.
پاشێ، جیھگرێ سەرۆکێ گشت ییێ PWK محەمەد جان ئازبای، د دەربارێ رۆلا رێخستنا ئازادییێ (کۆمیتەیا ئیستیقلالێ)، خالد بەگێ جبری و شێخ سەعید ئەفەندی؛ ئاژاوەگێرییا دەولەتا ترک یا کو بوویە سەبەب تەڤگەرا 1925 زوو و بێ ئامادەیی دەستپێبوو دە ئاگاھداری دا.
م.جان ئازبای، د بەردەوامییا ئاخافتنا خوە دە، بال کشاند سەر سییاسەتا کەمالیستان و چەپێن ترکان یا کو خوەستن تەڤگەرا ملی یا 1925 وەک تەڤگەرەکا پاشڤەروو نیشان بدن و ھەروەھا ھندەک ئالییێن سییاسی و کەسایەتێن کوردان ژی پشتگرییا ڤێ سییاسەتا کەمالیستان کرن.
ھەروەھا م. جان ئازبای د شکەستا تەڤگەرا ملی یا کورد دە، رۆلا پشتگرییا ئینگیلتەرا، فرانسا و یەکتییا سۆڤیەتی یا ژ بۆ کەمالیستان ئانی زمان.
م. جان ئازبای د بەردەوامییا ئاخافتنا خوە دە گۆت “دڤێت کورد ب خوە دیرۆکا خوە بنڤیسینن دا کو نڤشێن نوو ب ئاگاھداری و بەرچاڤکێن دەولەتا ترک ل دیرۆکا خوە نەنێرن و شیرۆڤە نەکن”.
پشتی م.جان ئازبای لێکۆلینەرێ کورد کەرەم سەرحەدی د دەربارێ تەڤگەرا 1925ێ یا ملی دە ب بەلگەیان ئاگاھدارییێن گەلەک گرینگ دان.
کەرەم سەرحەدی بەلگەیەکا نوو پێشکێش کر کو گاڤا شێخ سەعید ب ئیخانەتا ناڤخوەیی تێ گرتن، د ئیفادەیا خوەیا ئەول یا د کاراکۆلا دەولەت ترک دە دبێژە “مە ژ بۆ دەولەتا ملی یا کوردان ئەڤ تێکۆشینە مەشاندییە”.
سمینارا PWK یا تەشکیلاتا ئامەدێ یا پارتییا وەلاتپارێزێن کوردستانێ (PWK) ب مناسەبەتا سالڤەگەرا 99ێ یا دارڤە کرنا شێخ سەعید و ھەڤالێن وی ل ئامەدێ ل دار کەت، ب پرس و شیرۆڤەیێن بەشداران ب داوی ھات.
ژ بەشداران، رەوشەنبیر و سییاسەتمەدارێن کورد مەحموود کیپەر و عۆسمان کاراڤیل ژی د دەربارێ ڤێ مژارێ دە نێرینێن خوە ئانین زمان.
ل گەل سەرۆکێ گشتی یێ PWK موستەفا ئۆزچەلیک و ئەندامێن PWK، نوونەرێن PSK، HAK-PAR، DDKD، پلاتفۆرما جوانێن سەربخوە و گەلەک سییاسەتمەدار و رەوشەنبیرێن کورد ژی بەشداری سمینارێ بوون.”
