گرۆپێن چەکدارێن ئۆپۆزیسیۆنا سووریێ یێن لگەل ئارتێشا ترکیێ ھەرێما عەفرینێ داگیر کرنە، 4 وەلاتیێن کورد رەڤاندن. ھەروھا زێدەتر ژ 50 دارێن زەیتوونان ھاتن برین.
رێخستنا مافێن مرۆڤان ل عەفرینێ بەلاڤ کر، گرۆپا چەکدار یا ب ناڤێ “پۆلیسێن لەشکەری” رۆژا 27 خزیرانێ وەلاتیێ ب ناڤێ عەلی نوورەدین ژ مالا وی یا باژارێ عەفرینێ رەڤاند.
ھەروەھا راگەھاند، رەڤاندنا عەلی نوورەدین پشتی وێ تێ، ئەو بەری 2 مەھان ژ ھەرێما شەھبایێ ڤەگەریانە عەفرینێ و داخوازا ڤەگەراندنا خانیێ کربوو کو سەرکردەیەکی گرۆپا “ئسۆد ئەل-شەرقیێ” دەست دانیە سەر.
رێخستنا مافێن مرۆڤان راگھاند ژی، گرۆپا “پۆلیسێن ئازاد” رۆژا 24 ڤێ مەھێ ھەر یەک ژ یەحیا تاھا بەرەکات و زارۆکێ 15 سالی ئەدھەم دەرویش ژ باژارۆکێ جندرێسێ رەڤاندن و ھەتا نھا چارەنڤیسا وان نایێ زانین.
ھات دیارکرن، گرۆپا “پۆلیسێن ئازاد” رۆژا 25 خزیرانێ وەلاتیێ ب ناڤێ رەشید گولین ژ گوندێ ئاشک یێ رۆژئاڤا رەڤاند و پشتی ستاندنا فدیەیێ ژ وی، رۆژا دن بەردان.
رێخستنا مافێن مرڤان دا زانین ژی، د چەند رۆژێن بۆری دە ھەژمارەک ژ کەسێن ل عەفرینێ ھاتنە بجھکرن، زێدەتر ژ 50 دارێن زەیتوونان ل گوندێ فرێریێ یێ سەر ب جندرێسێ ڤە برین، تا کو وەک هەژک بفرۆشن.
شەش سال د سەر داگیرکرنا ھەرێما عەفرینێ ژ ئالیێ ئارتێشا ترکیێ و گرۆپێن چەکدار یێن سەر ب وێ ڤە دەرباس دبن و ھەتا نھا زێدەتر ژ 9 ھەزار کەس ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.
ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وەلاتیان درەڤینن و ئەشکەنجە ددن و پەرە، فدیە و باجان ژ وان دستینن.
