ب بەرهەڤبوونا سەرۆکێ حكوومه‌تا هەرێما کوردستانێ مەسروور بارزانی، مەراسیمێن راگەهاندنا بەرنامەیا پشتەڤانیا دارایی ژ بۆ رزگاربووییێن دەستێ تەرۆریستێن داعشێ ل هۆلا سەعد عەبدولا ل باژارێ هەولێرێ ب رێ ڤە چوو.
پارەکە گۆتارا سەرۆکێ حكوومه‌تا هەرێما کوردستانێ:
ب ناڤێ خودایێ مەزن و دلۆڤان
ئامادەبووییێن رێزدار، خووشکێن رزگاربوویی یێن دەستێ ته‌رۆریستێن داعشێ، رۆژا وە بخێر و گەلەک گەلەک بخێر بێن.
ئەم ئیرۆ شەرەفمەندن کو رێزێ ل قوربانیێن رزگاربووییێن دەستێ تەرۆریستێن داعشێ دگرن. تەڤی کو ئەم ئیسال بیرئانینا 10 سالیا کۆمکوژیا شنگال و دەردۆرا وێ دکن، لێ مخابن ئێش و ئازار و دەردەسەریێن خووشك و برایێن مە یێن ئێزدی ل دەڤەرا شنگالێ پشتی دەربازبوونا 10 سالان ب سەر وێ کارەساتێ رە هێشتا بداوی نەهاتنە.
ئەم ئیرۆ ل ڤێ دەرێ گەلەک ب رێز، شکۆ و رێز ڤە هەمی قوربانیێن کۆمکوژیا دەستێ ته‌رۆریستێن داعشێ ژ خووشک و برایێن ئێزدی ببیر تینن. هەروەسا ئەم ب رێزەکە زێدە خوەراگری، قەهرەمانی و قوربانیدانا هێزا پێشمەرگەیێن کوردستانێ ژی ببیر تینن، کو ب رێبەریا سەرۆک بارزانی ته‌رۆریستێن داعشێ هاتن شکاندن و شنگال هات رزگارکرن.
پشتی 10 سالان د ڤێ کارەسات و کۆمکوژیێ رە، هێشتا رەوشا دەڤەرا شنگالێ ئاسایی نەبوویە. هەروەسا ژ بەر خوەسەپاندن و کۆمێن چەکدارێن نەقانوونی، خووشک و برایێن مەیێن ئێزدی ل کەمپان مانە و نەکاریە ڤەبگەرن جهێن خوە و ژ بەر ڤێ یەکێ ژی هەتا نها دەڤەرێن وان نەهاتنە ئاڤەدانکرن.
د ڤێ هەلکەفتنێ دە، ئەم پشتەڤانیا خوە ژ بۆ داخوازێن رەوا یێن خووشک و برایێن خوەیێن ئێزدی تەکەز دکن و پێدڤی رەوشا نەئاسایی یا شنگالێ بێ بداویئانین و په‌یمانا شنگالێ وەکی خوە بێ بجهئانین و رەوشا وێ دەڤەرێ بێ ئاساییکرن، ژ بۆ کو ئەم بکارن ب ئالیکاریا حكوومه‌تا فەدەرالی و جڤاکا ناڤدەولەتی وێ دەڤەرێ ئاڤەدان بکن و دەستهلاتا وێ دەڤەرێ ژی ژ بۆ خەلکێ رەسەنێ شنگالێ ڤەبگەرە.
ئامادەبوویییێن رێزدار، حكوومه‌تا هەرێما کوردستانێ پێنگاڤێن باش ژ بۆ سڤککرنا ئازارێن کەسووکارێن قوربانیێن دەستێ ته‌رۆریستێن داعشێ ئاڤێتنە، هەروەسا رۆلەکی گرنگ و بەرچاڤ د ئازادکرنا هەژمارەکە زێدە یا رەڤاندیێن ئێزدی و پێکهاتێن دن ژ دەستێ ته‌رۆریستێن داعشێ گێرایە و دێ ل سەر بزاڤێن خوە ژ بۆ زانینا چارەنڤیسا هەمی وان کەسێن کو هێشتا چارەنڤیسا وان دیار نینە ژی بەردەوام بە.
حكوومه‌تا هەرێما کوردستانێ هەروەسا ژ بۆ ناساندنا تاوانێن داعشێ وەکی جینۆساید و تاوانێن شەری کار کریە. ژ بۆ ڤێ مەرەمێ ژی، ب پشتەڤانیا جڤاکا ناڤدەولەتی ژ بۆ لێکۆلینێ ل سەر تاوانێن داعشێ، مە داخواز کر کو دادگەهەکە تایبەتمەند ژ بۆ دارزاندنا ته‌رۆریستێن داعشێ ل سەر تاوانێن وان یێن ناڤدەولەتی بێ دامەزراندن، لێ مخابن ئەڤ بزاڤ هەتا نها ژی ل سەر ئاستێ فەدەرالی وەکی پێدڤی پێشوازی لێ نەهاتیە کرن.
ئەم دەستخوەشیێ ل وان هەمی وەلاتان دکن یێن کو تاوانێن ته‌رۆریستێن داعشێ ل دژی کوردێن ئێزدی ب ئاوایەکی فەرمی وەکی جینۆساید ناساندنە.
ئەم هێڤیدارن جڤاکا ناڤدەولەتی ژ بۆ کێمکرنا ئێش و ئازارێن خووشک و برایێن مەیێن ئێزدی و ڤەگەراندنا ئاوارەیان ژ بۆ جهێن وان ب سەربلندی و ئازادی هەڤکار و ئالیکارا مە بە.
گەلی رێزداران، قوربانیێن رزگاربووییێن دەستێ داعشێ تەڤی وان هەمی ئێش و ئازار و دەردەسەریێن رووبروویی وان بوونە، لێ جهێ دلخوەشی و شانازیێ یە کو ئەو ب ئاوایەکی خوەراگرانە ل سەر بزاڤ و کارکرن و دەستبەرنەدانێ بەردەوامن، پێخەمەتی بەردەوامیدانا ب ژیانێ و گەلەک ژ وان ژی بوونە نموونە و سەمبۆلێن ژێهاتن و چیرۆکێن ئیلهامدێر ژ خوەراگری و سەرکەفتنێ.
ئەز دلخوەش بووم کو مەها بۆری، ل ناڤ ئاهەنگا سەرکەفتنێ یا خوەندەکارێن زانینگەها ئامەرێکایی یا کوردستانێ ل دهۆکێ، من خەلاتا شەرەفا خوەراگریێ پێشکێشی یەک ژ رزگاربووییێن دەستێ داعشێ دا، کو ئەو ژی خانم شرین خێرۆ خودێدا بوو، کو ل زانینگەها ئامەریکایی ب ئاوایەکی گەلەک سەرکەفتیانە خواندنا خوە تەمام کر و باوەرنامە وەرگرت.
سەرپێهاتیا وێ خانمێ چیرۆکەکە کێموێنەیە، کو تەڤی رەڤاندن و دەستەسەرکرنا وێ ژ بۆ چەند سالان ژ ئالیێ داعشێ ڤە، ل سەر بەردەوامبوونێ ل سەر خواندنێ رژد بوو و بوو نیشانا خوەراگریا خووشک و برایێن مەیێن ئێزدی.
خووشک و برایێن ئێزدی پارەکە گرنگ و ڤەنەقەتیایی یا گەلێ کوردستانێ نە و مەراسیمێن وان یێن دینی ژی ب زمانێ زەلالێ کوردینە. د سەر هەمی پلان و بزاڤێن نەهەزان ژ بۆ ڤەقەتاندنا وان ژ خەلکێ کوردستانێ رە، ئەو هەر ژ کەڤن دە پێکهاتەیەکە رەسەنا گەلێ کوردستانێنە و پارەکە گرنگا وێ پێکڤه‌ژیانێ نە یا کو ل هەرێما کوردستانێ هەیە.
ئەڤ رێزلێگرتنا ئیرۆ پێشکێشکرنەکە مەهانەیە، ژ بۆ زێدەتری سێ هەزار خووشکێن ئێزدییێن رزگاربوویی یێن دەستێ ته‌رۆریستێن داعشێ. هەلبەت ب باشتربوونا رەوشا دارایی ژی، ئاستێ ئالیکاریێن مە ژ بۆ وان خوەشتڤییان دێ بەرفرەهتر ببن. ئەم هەمی ئالیکاریان ژ بۆ وان عەزیزان پێشکێش دکن، ژ بۆ کو ژیانەکە هەژی هەبە و پارەکە بچووک ژ برینێن وان بێ دەرمانکرن، نه‌خاسمه د پەیداکرنا دەرفەتێن کاری و بەردەوامیدانا ب خواندنێ و چارەسەریا وانا پزشکی دە، ئەم ل دووڤ شیانان هەمی ئاسانكارییان ژ وان رە دکن.
گەلی رێزداران، ل ڤێ دەرێ د جهێ خوە دەیە کو ئەز سپاسیەکە بێهەمپا ژ بۆ سەرۆک بارزانی و پێشمەرگەیێن قەهرەمان بکم، کو پشتی وێ رۆژا شنگال کەفتیە د دەستێن ته‌رۆریستێن داعشێ دە، جەنابێ سەرۆکی سۆز دا کو هەتا شنگال رزگار نەبە ئەو رانەوەستە. هەروەسا وی بریار دا کو ئەو ب خوە سەرکرداتیا بەرەیێ رزگارکرنا شنگالێ بکە و ئەم ژی د خزمەتا وی دە بوون.
وێ رۆژا جەنابێ وی سۆز دایی هەتا وێ رۆژێ و ئەم ل سەر چیایێ شنگالێ بوون، سەد رۆژ دەرباز بوون. گەلەک خەلکی بزاڤ دکر کو ئەڤ چیرۆک ب ئاوایەکی نەراست بێ ڤەگێران، لێ بزانن خووشک و برایێن مەیێن ئێزدی هەردەم د دلێ جەنابێ سەرۆکی دە بوون و جەنابێ سەرۆکی ژ هەر کەسەکی زێدەتر خەمخوەرێ ئێش و ئازارێن ئێزدیان بوویە و ب خوە و هەمی کەسووکار و پێشمەرگەیێن خوە ژی ڤە هەر تشتێ پێ چێبوویی کر، ژ بۆ کو سەربلندی کەرامەتا ئێزدیان ڤەبگەرینە و ته‌رۆریستێن داعشێ بشکینە.
د جهێ خوە دەیە کو ئەم ب گەرمی سپاسیا پێشمەرگەیێن قەهرەمان بکن، کو گەلەک ژ وان جانێ خوە کر قوربانی ژ بۆ کو شنگالا بلندەست بێ رزگارکرن. ئەڤرۆ ئەم ل ڤێ دەرێنە کو سپاسی و رێزێن خوە پێشکێشی خوەراگریا گەلێ خوەیێ ئێزدی بکن. د سەر ڤان هەمی نەخوەشی و تاداریێن کو ل بەرانبەری وان هاتنە کرن رە، ئەو هەر خوەراگر بوونە.نە وان ناسنامەیا خوە ژ دەست دا،نە ژی هێڤی و ئومێدێن خوە. ئیشەلا خودێ دێ وە هەر سەرفەراز بکە، کوردستان ژی دێ هەر یا ئاڤەدان بە، خووشک و برایێن مەیێن ئێزدی ژی دێ ب ژیانەکە سەربلند و ئازاد بژی.
