فەرماندارەکی بەرێ یێ پەکەکێ رادگەھینە دەما کو ئەو د ناڤا پەکەکێ دە بوونە، یەکینە و تیمێن وان یێن تایبەت ژ بۆ شەوات دەرخستنێ ھەبوونە و دبێژە بالا پەکەکێ ل سەر جیھێن گشتی یێن ھەولێرێ بوویە.
فەرماندارێ بەرێ یێ پەکەکێ ماھر سرووج ژ باس نیوسێ رە راگەھاند: “بەرێ ناڤ پەکەکێ دە مە تیمێن شەوات دەرخستنا ل جیھێن گشتی یێن ھەولێرێ ھەبوو. تاکتیکا وێ تیمێ وھا بوو: دەستنیشانکرنا جیھێ ئارمانجێ، پشترە پەژراندنا رێڤەبەریا کەجەکێ و دویەم: دیارکرنا جیھ و دەما گونجاو بۆ ئەنجامدانا کار. سێیەم: ھەلبژارتنا کەسان ژ بۆ جێبەجێکرنا وی کاری. ئەو ژی ب دو جورەیان بوو، یەکەم: سوودوەرگرتنا ل ئەندامێن پارتیێن دن، کو نێزیکی پەکەکێ نە ل باشوورێ کوردستانێ. دویەم: بکارئانینا جوانان ژ بۆ جێبەجێکرنا ب پارەیێ پێشوەخت ڤە.”
ھەروھا گۆت: “تاکتیک وسا بوو، ھەر دەما کو ئەو کەس ل باژارێ ھەولێرێ ھات گرتن، پەکەکە دێ بەیانامەیێ بەلاڤ بکە و دێ وی تشتی ئینکار بکە و دڤێت ئەو کەس ژی ل سەر وێ یەکێ بێ پەروەردە کرن کو ببێژە ئەو کەسێ ئەز پەروەردە کرمە ل دەرڤەیی کوردستانێ یە. ژ بۆ نموونە پار پرا ل ھەولێرێ ھاتە تەقاندن.”
ماھر سرووج گۆت: “ئەو کەسێن ل باژارێ ھەولێرێ بۆ کریارێن وھا تێن بکارانین، وھا تێن پەروەردەکرن، یەکەم: بکارئانینا نەخشەیا ئەلەکترۆنیکا باژارێ ھەولێرێ و دیارکرنا جیھێ بوویەرێ. دویەم: ئەو کەسانە ل سینۆرێ نێزیک ل دەستھلاتا پەکەکێ تێن پەروەردەکرن، وەک نموونە ل ناڤچەیا کفری و خانەقین، ل جیھەکی 3 مەھ پەروەردەیا ئیدەۆلۆژیک و لەشکەری دکن و ئەو پەروەردە گەلەک جاران تێن دوبارە کرن.”
ھەروھا گۆت، ژ دەستپێکێ ڤە گومان ژ وی تشتی کریە کو ئەو بوویەرێن شەواتێ یێن ل ھەولێرێ کارێ پەکەکێ یە، ژ بەر کو “مە ناڤ پەکەکێ دە ئەو پەروەردە کرنە، ب تایبەت ژی شەواتێن وھا زێدەتر ل سلۆپی و دیاربەکر و شرنەخێ کو باژارێن باکورێ کوردستانێ نە، ل دژی شیرکەت و بازارێن مەزنێن بازرگانان دھاتن ئەنجامدان، لێ دیسا ژی ئەو بازرگان ھەر کورد بوون.”
ماھر سرووج گۆت: “تشتا ل ھەولێرێ ھاتیە کرن، ب رێیا تاکتیکەکا جودا بوویە، کەسەکی پەیوەندیا وی ب گەلەک کەسێن دن ڤە ھەبوویە و وەک تۆرەکی کار کرنە. ئەو مادەیێن بکارئانینە بۆ پشتی دەمەکی درێژ دەست ب تەقاندنێ دکە و شەوات و باندۆرا وێ یەکسەر دیار نابە، پشتی چەند دەمژمێران بازارێ دە دەست ب شەواتێ دکە. ئەو مادەیێ کو ئاگر دگرە ل جیھەکی تێ ئاڤێتن کو ب ئاسانی ل وێ دەرێ شەوات دەربکەڤە، ئەو تیم ناڤ پەکەکێ دە چالاکە و ل قەندیلێ ژ ئالیێ 3 فەرماندارێن پەکەکێ ڤە تێن پەروەردەکرن و بەشەک ژ وان تایبەتن ژ بۆ تەقاندنا ئۆتۆمۆبیلێن خەلکێ، بنکەیێن پارتیان و تەقاندنا کەسان، وەکی د دەما بۆری دە ل کفری پێکھات.”
