سەرۆک بارزانی بۆ لهەڤنێزیککرنا ئالیێن ئیراقێ ل به‌غدایێ یه‌

پشتی دەربازبوونا نێزی شەش سالان، سەرۆک بارزانی جارەکە دن ژ بۆ دانووستاندنێن ل سەر چەند پرسان سەردانا به‌غدایێ كر.

بارەگایێ بارزانی ئیرۆ (چارشەم، 03.07.2024) د بەیاننامەیەکێ دە راگەهاند، «سەرۆک مەسعوود بارزانی ب مەرەما هەژمارەکە جڤینان ب ئالیێن فەرمی و سەرکردەیێن سیاسی یێن ئیراقێ رە سەردانا باژارێ به‌غدایێ دکە».

پشتی دەربازبوونا نێزی شەش سالان، جارەکە دن سەرۆک بارزانی ژ بۆ دانووستاندنان ل سەر چەند پرسێن گرێدایی هەرێما کوردستانێ و به‌غدایێ و لهەڤنێزیککرنا ئالیێن ئیراقێ سەردانا به‌غدایێ دکە.

پرسا مووچەیان، پێکانینا حکوومەتا خوەجهی یا کەرکووکێ، دۆزا شنگالێ و هلبژارتنێن سەرۆکێ جڤاتا نوونەرێن ئیراقێ دێ هن مژارێن گرنگێن وان جڤینان بن.

سەردانا سەرۆک بارزانی ژ بۆ چارەکرنا چەند پرسێن ناڤبەرا شیعە و سونەیانە، کو هەر جار د رەوشێن وەسا دە سەرۆک بارزانی ناڤبەینکاری ژێ رە کریە.

هەروەسا ئارمانجا سەردانا سەرۆک بارزانی ژ بۆ ڤەدیتنا چارەسەریێن گونجایی و بداویهاتنا بیەکجاری یا ئارێشەیێن هلاویستی یێن ناڤبەرا هەرێما کوردستانێ و حکوومەتا فەدەرالی و دانووستاندنێن ل سەر چەند پرسێن ناڤبەرا ئالیێن سونە و شیعەیێن ئیراقێ یە.

سەردانا سەرۆک بارزانی هەروەسا ژ بۆ دانووستاندنێن ل سەر پشکا بودجەیا هەرێما کوردستانێ، مووچەیێن مووچەخوران، قانوونا پەترۆل و گازێ، هلبژارتنان، پێکانینا حکوومەتا خوەجهی یا کەرکووکێ، هلبژارتنێن سەرۆکێ جڤاتا نوونەرێن ئیراقێ، دۆزا شنگالێ، پێکانینا جڤاتا بلندا فەدەرالی و هەژمارەکە پرسێن دنە.

سەرۆک بارزانی رۆلەکی مەزن د لهەڤنێزیککرنا ئالیێن ئیراقی دە هەبوویە و د دەما قەیرانێن مەزن دە رزگارکەر بوویە. ژ بلی کو سونە و شیعە هەر جار ڤەدگەرن ئالیێ وی، بارزانی رۆلەکی مەزنتر ژی د داهێلانا رهـ و ریشالێن پرنسیپا پێکڤەژیانێ دە هەبوویە.