مالباتەکا مەخموورێ ژ پەکەکێ داخواز دکە کەچا وان یا رەڤاندی ڤەگەرینە مالێ

چەکدارێن پەکەکێ د کارێ خاپاندن و رەڤاندنا زارۆکێن کوردان دە بەردەوامە، هەری داوی کەچەکا 17 سالی یا نیشتەجیا کامپا مەخموورێ ژی رەڤاندیە.

چاڤکانیێن پێگەها دارکا مازی ئەشکەرە کرن، چەکدارێن پەکەکێ کەچەکا مەخمووری یا 17 سالی ب ناڤێ “تەیبەت سالح ئەحمەد” رەڤاندیە.

چاڤکانیێن دارکا مازی ددن ئەشکەرە کرن، ڤێ کەچێ دەما سالەکێ وەک ئاساییشا کامپا مەخموورێ کار کریە، پشترە بێی ئاگاهدارکرنا مالباتا وێ لگەل شۆفێرەکی کامپێ یێ ب ناڤێ “نورەدین شەمسەدین مارونسی”، ب ترومبێلەکا ژ جورێ میتسوبیشی ژ بۆی باژارێ سلێمانیێ هاتیە شاندن و ل ور بەر ب کامپێن چەکدارێن پەکەکێ ل چیا هاتیە شاندن.

هەروەها تەکەز کرن، مالباتا ڤێ کەچێ وەکە نەرازیبوونەک چوونە جەم بەرپرسێن پەکەکێ و داخوازا ڤەگەراندنا کەچا خوە کریە، لێ بەلێ بەرپرسێن پەکەکێ ژ وان رە راگهاندیە کو ب چ ئاوا رێ نادن ئەو کەچ جارەکا دن ڤەگەرە کامپێ و دڤێت ل چیا بمینە و ببە گەریلا.

تەیبەت ژ شێنیێن گوندێ ئاڤیڤان یێ سەر ب پارێزگەها شەرنەخێ یە، نیشتەجیا کامپا مەخموورێ بوو، ناڤێ دایکا وێ ئامینا یە، بابێ وێ د ناڤبەرا سالا 1990-2004ا دە چەکدارێ پەکەکێ بوویە، ژ بەر پرسگرێکێن ناڤخوەیی یێن پەکەکێ د وێ دەمێ دە ژ پەکەکێ قوت بوویە و ل مەخموورێ نیشتەجێ بوویە، د نها دە وەکە کارکەر ل بەغدایێ کار دکە.