وەک ھوون دزانن، ل ترکییێ باژارێ قەیسەرییێ ژ بەر ھندەک بەهانە و سەدەمان رۆمییێن ھۆڤ ئێریشی ھەموەلاتییێن سوورییێ کرن، مال و ترومبێلێن وان شەوتاندن و ئەڤ یەک ل ھندەک باژارێن دن ژی بەلاڤ بوو. ل ھەمبەر ڤێ یەکێ، ل سوورییێ ژی ھندەک گرۆپێن چەکدار ئێریشی کامیۆنێن ترکا کرن، ئەو و ئالایێن ترکییێ شەوتاندن.
فەرماندارێ گشتی یێ ھێزێن سووریەیا دەمۆکراتیک (ھەسەدێ مەزلووم کۆبانی تێکلداری بوویەرێن ل باژارێن وەک باب، جەرابلووس، ئدلب و عەفرینێ پەیامەک پارڤە کر. کۆبانی ب رێیا پلاتفۆرما ئیکسێ داخویانیەک دا و ئەڤ گۆتن ب کار ئانین: “تەڤگەرا سوورییەیی یێن ل ھەرێمێن داگیرکری نیشان ددە کو ئەم چقاسی ژ ھەڤ جودا بن ژی، روومەتا نەتەوی و سەرخوەبوونێ خالێن سەرەکە نە کو مە دکە یەک. ئەم ئێریشێن ل دژی گەلێ سوورییەیێ یێن ل قەیسەریا ترکییێ شەرمەزار دکن و بانگا پاراستنا جان و روومەتا وان دکین. ئەم ل باکور و رۆژھلاتێ سووریێ نە؛ نھا ئەم بخێرھاتنا ھەر وەلاتپارێزەکی سووری دکن کو دەستێ خوە درێژی ھەموو گەلێ سوورییێ بکن دا کو وەلات و گەلێ خوە رزگار بکن”.
ب ڤێ داخویانیێ جارەک دن ئەشکەرە بوو کو ژ کەسێن و ئالیێن وەک کۆبانی، ھەسەدێ، پەیەدێ و پەکەکێ رە نە برایەتیا کوردان لێ برایەتیا ترک، عەرەب و فارسان فەرزترە. کەسێن کو ھەر رۆژ ئێریشی ئەنەکەسێ و ئۆفیسێن وێ دکن، ئالایێن کوردستانێ دشەوتینن، کوردێن وەلاتپەروەر درەڤینن و گەفان ل وان دکن، دەستێ ئالیکاریێ بۆعەرەبێن سووریێ درێژ دکن و ژ وان رە دبن سەیوان.
چ ناڤ ل ڤێ یەکێ تێ کرن ئەم نزانن، لێ ژ قەولا سۆفی ئەحمەد ڤە، بخوەدەریتن ژی ھونەرەک ب سەرێ خوەیە…
