هێزێن ترکیێ و گرووپێن چەکدارێن سەر ب وێ ڤە، ل عه‌فرین و ئه‌عزازێ 12 وەلاتیێن کو بەشداری خوەپێشاندانان بوونە گرتن و برن ترکیەیێ.
رەوانگەها سووری بۆ مافێن مرۆڤان (سۆهر) بەلاڤ کر، هێزێن ترکیەیێ ب پشتەڤانیا گرووپا «پۆلیسا لەشکەری» دەست ب کامپانیا گرتنێ ل گوندەوارێ باکورێ حەلەبێ کرن، ئەو ژی پشتی تەماشەکرنا ڤیدیۆیان و ناسکرنا کەسێن بەشداری خوەنیشاندانێن ل دژی ترکیەیێ و کۆمێن ئالیگرێن وان بوونە.
دیار کر ژی، «هێزێن ترکیەیێ ل ئه‌عزازێ 4 وەلاتی گرتن و دەرباسی ترکیەیێ کرن. هەروها ل عه‌فرینێ ژی 8 وەلاتی هاتن گرتن و بەر ب جهەکی نەدیار ڤە برن و هەتا نها چارەنڤیسا وان نایێ زانین».
ئاماژە ب وێ ژی کر، هەردو گرووپێن ب ناڤێن «ئەل-عەمشات» و «حەمزات» ژی پشتگریا خوە ژ کامپانیا گرتنێ رە راگهاندن و هێزێن خوە ل عه‌فرینێ بجهـ کرن.
ئەڤ یەک پشتی وێ تێ، عەرەبێن هاوەردە بەری دو رۆژان ل عه‌فرین و ناڤچەیێن دن یێن باکور و رۆژئاڤایێ حەلەبێ، یێن د دەستێ ئارتێشا ترکیەیێ و چەکدارێن ئۆپۆزیسیۆنا سووریەیێ دە نە، خوەپێشاندان ل دژی ئێریشا ل پەنابەرێن سووری ل باژارێ قەیسەریێ یێ ترکیەیێ و داخویانیێن پێوەندیێن ئاساییکرنا پێوەندیێن ترکیە – سووریەیێ، دەرکەتبوون.
ل گۆری زانیاریان ژی، د خەپێشاندانان دە 6 خوەپێشاندەر ل عه‌فرینێ و خوەپێشاندەرەکی دن ل جەرابلوسێ هاتن کوشتن و زێدەتر ژ 20 خوەپێشاندەرێن دن ژی بریندار بوون.
