ئیرۆ رۆژا پێنجشەمبێ 4ێ تیرمەھا 2024ێ، 12 سال ب سەر کۆمکوژیا کو ژ ئالیێ چەکدارێن پەیەدێ ڤە ل سەر مالباتا شێخ حەنان شێخ حەسەن یا ژ گوندێ ئافرازێ یێ ناڤچەیا ماباتایا عەفرینێ پێک هاتی، دەرباس دبن، د ڤێ کۆمکوژیێ دە شێخ حەنان و کورێ وی عەبدولرەحمان د مالێن خوە دە ھاتن کوشتن، و کورێ دویەمین ژی د بن ئشێکەنجەیا هۆڤانە دە د زیندانا راجویێ دە ھات کوشتن.
کۆمکوژییا هۆڤانە یا کو چەکدارێن پەیەدێ د 4ێ تیرمەھا 2012 دە ب شەڤ ئەنجامدای، پشتی وێ یەکێ هات کو ڤان چەکداران ل دەمژمێر 12ێ شەڤێ ب سەر مالا شێخ حەنان یا ل ناڤەندا باژارێ عەفرینێ دە گرتی، چەند رۆژان پشتی ئێریشا ل سەر گوندێ ئافرازێ د 29ێ خزیرانا 2012ێ دە و گرتنا ئەندامێ ئەنجوومەنا ھەرێمی یا پارتیا دەمۆکراتا کوردستانێ – سووریێ (پەدەکە-سێ) ھاشم شێخ نەعسان د مالا خالێ وی ئەمین شێخ کولین دە.
چەکدارێن پەیەدێ تەرمێن شەھید شێخ حەنان و کورێ وی عەبدولرەحمان کاش کرن و ئاڤێتن سەرێ کۆلانا نەخوەشخانەیا دێرسیمێ، و نەھشتن کو مالباتێن وان نێزیکی جەنازەیان ببن دا کو ب ئاخێ بسپێرن، جەنازەیێن وان ب دەمژمێران ل سەر جادەیێ مان، پشترە چەکدارێن پەیەدێ دەست ب تالانکرنا مالا شێخ حەنان و جیرانێ وی عزەدین مووسا یێ خەلکێ گوندێ رەمەزان کرن و پاشێ مال و دوکانێن وان ژی شەوتاندن.
چەکدارێن پەیەدێ چەندین رۆژان هاتن و جوونا د ناڤا باژاری دە قەدەغە کر، پشتی شەهیدکرنا 3 کەسان ژ مالباتێ، دەستەسەرکرنا 27 کەسان هێژان ژی بەردەوام بوون ل سەر شەهیدکرنا ئەندامێن ڤێ مالباتا وەلاتپارێز و بریارا کوشتنا 12 کەسێن دن ژی دەرخست، لێ دەستوەردانا سەرۆک مەسعوود بارزانی نەھشت کو ئەو کۆمکوژی بەرفەرەھتر ببە.
سەدەمێن ئەنجامدانا ڤێ کۆمکوژیێ ئەڤ بوو کو مالباتا شێخ حەنان مالباتەکا وەلاتپارێز و ل سەر رێبازا بارزانی بوون، و نە ل سەر شۆپا پەکەکێ و پەیەدێ بوون، ھەروھا ل دژی رێژیما سووریێ بوون، لەوما پەیەدێ ئەو مالباتا ناڤدار ئارمانج کر و ئەڤ کۆمکوژیا ھۆڤانە ئەنجام دا.
