شەرێ سەختە یێ د ناڤبەرا لەشکەرێ ترکیێ و چەکدارێن پەکەکێ د ناڤا ئاخا هەرێما کوردستانێ دە بەردەوام دکە، هەر کو دچە لەشکەرێ ترک پێتر دەرباسی ناڤا ئاخا هەرێما کوردستانێ دبە و پەکەکە ژی پاشڤە ڤەدکشە و جیهێن کو ب ت ئاوا پەکەکە رازی نەدبوو تەسلیمی پێشمەرگەیان بکە، بێی شەر تەسلیمی لەشکەرێ ترکیێ دکە.
د دو رۆژێن رابۆری دە ئارتێشا ترک ل سەر خەتا ئامێدیێ شێلادزێ پێتر چالاک بوویە و هەژمارەک ژ وەساییتێن خوە یێن لەشکەری بێی کو ت پرسگرێکەک ژ ئالیێ پەکەکێ ڤە ژ وان رە چێ ببە دەرباسی ئامێدیێ و ب تایبەتی دەڤەرا نهێلێ کرن، لەشکەرێ ترکیێ دەرباسی گوندێن سەرگەلێ، بەلاڤە و گوهەرزێ بوو و چەکدارێن پەکەکێ ژی ب تەقاندنا چەند گولـلەیێن تڤەنگێ ژ بۆی کو وسا نیشان بدن ل بەر خوە ددن تەڤ هەرێم تەسلیمی لەشکەرێ ترکیێ کر.
پەکەکێ بێی شەر بارەگەهێ خوە یێ سەرەکە یێ ل گوندێ سەرگەلێ تەسلیمی لەشکەرێ ترکیێ کر، وەساییتێن لەشکەری یێن ترکیێ ژ باکورێ کوردستانێ بێی کو ت پرسگرێکەک ژ وان رە دەرکەڤە د هەرێمێن کو بەرێ د بن دەستهلاتداریا پەکەکێ دە بوون و رێ نەددا ت کەس دەرباسی وان هەرێمان ببە، دەرباسی ئامێدیێ بوون و چوون گوندێ سەرگەلێ، پەکەکە پاشدە ڤەکشیا و ب تەنێ چەند گولـلەیێن تڤەنگێ تەقاندن هەیا کو د چاپەمەنیا خوە دە وسا نیشان بدە ل بەر خوە ددە و خەلکێ پێ بخاپینە، لێ گەلێ هەرێمێ ب ڤێ سەناریۆیا شەرێ سەختە دزانە و ئێدی هەر تشت ژ وان رە زەلال بوویە.
نها ل سیلسیلە چیایێ مەتینا ب تەنێ چەند چەکدارێن پەکەکێ د تونەلا کو دکەڤە چیایێ مەتینا یێ هنداڤی گوندێ گوهەرزێ مانە، پەکەکێ هەر دەر تەسلیم کریە و ل گۆر تشتا تێ دیتن د دەمەک نێز دە دێ وێ دەرێ ژی تەسلیم بکە.
ئەڤ شەرێ ب شێور یێ کو د نێڤبەرا چەکدارێن پەکەکێ و لەشکەرێ ترکیێ دە دمەشە، بوویە خەتەریەک مەزن ل سەر گەلێ هەرێمێ، گوندێن نهێلێ دشەوتن، تۆپ ب ناڤەندێن گوندێن وان دکەڤن و گەل پڕ پەریشان بوویە، رۆژانە ئەڤ گوند ب سەدەما ڤی شەرێ سەختە راستی شەوتاندنێ و تۆپبارانکرنێ تێن و ئێدی ژیانا شێنیێن ڤان گوندان کەتیە د خەتەریێ دە، پەکەکە ژی بێی کو گرینگیێ ب ژیانا شێنیێن ڤێ هەرێمێ بدە، بێی گوهدانە داخوازیێن گەل و حکوومەتا هەرێما کوردستانێ هەر کو دچە پێتر لەشکەرێ ترکیێ کاشی ناڤا ئاخا هەرێما کوردستانێ دکە.
د سۆسیال مەدیایێ دە ژی گەلێ دەڤەرا نهێلێ داخوازا راوەستاندنا ڤی شەرێ سەختە و ب شێور دکە و دخوازە سەر و مالێ وان بێ پاراستن، لێ بەلێ ئەڤ یەک نە ژ پەکەکێ رە و نە ژی ژ ترکیێ رە نەگرینگە، ژ پەکەکێ رە پرۆپاگاندایا مەدیایی و ژ ترکیێ رە ژی زێدەتر داگیرکرنا باشوور تشتا هەرە سەرەکە و گرینگە، د ڤێ ناڤبەرێ دە یێن کو راستی زرارێ تێن ب تەنێ گەلێ هەرێمێ و حکوومەتا هەرێما کوردستانێ نە.
بەلێ، پەکەکە نە ژ بۆی رزگارکرنا کوردستانێ، بەلکو ژ بۆی زێدەتر داگیرکرنا کوردستانێ و ژناڤبرنا تاکە پەرچەیا ئازاد یا کوردستانێ دخەبتە، مخابن هەیانی رادەیەکی مەزن ژی د ڤی کارێ خوە دە ب سەر کەتیە.
